Proverbes 6 - Ma Zhiklè

¹ Kra ga, amari ndo ngiɗè a mva ka skwi nengaʼa a rai, a ka co,

² a ka gaɗa, i da fa ka hai, ka dzawa ma, ma ngaya a ndzaw ka.

³ Kra ga, gu maya haha, a ka proko va ngaya auda! Do, kalahi a deɓ sak nslamagi ngaya, te man ka ɓèl na ma; ndzaraha a ma genè!

⁴ Ka feda nzhunè a di ɓai, ko hèzlèmèmaʼa.

⁵ Mbeldoko va ngaya auda ara mènèɗ man a hi na a ndo mɓèrèʼa, ara ɗiak a sam ndo mpi votok.

⁶ Do a gi ngwolèlè, ka ndo wudar! Pu di a mizlinè tengaʼa, a ka ngècè maya.

⁷ Bi ta azɓai, ndo ndzaraha ta azɓai, ndo ngaɗa ta azɓai,

⁸ a tengaʼa ta ɓica skwi nʼndi ta man a ngwar, ta ɓicè skwi nʼndi ta, a pats mɓicè skwai.

⁹ Ka ndo wudar, ka manatʼhi ha ngèmè? Ka da slèmbèɗè a nzhunè a ngèmè?

¹⁰ I nzhun kètè dai i nzhun a di ga zerɓaɓa dai i ndérɗè va dai, ar ka;

¹¹ a ntèwèshè a kala ka va ara ndo metsar, a ndalalai a gs ka ara man ta gshè ɓèlè a ma var.

¹² Ndo falai, ndo malai, man ncèkèlma te ma nengaʼa,

¹³ a raɓatsa ka dai, a ftèh ka a sak, a ɗèfka a rai,

¹⁴ a gi nderkèzhè, a hér skwi man ambaɓai pèc pècèk, a pi gèɗ ndo a va.

¹⁵ A géɗ nengaʼa a gédèsh na a nasanasa, a tseda na gèɗ kwah, maya ngiɗè asaɓai.

¹⁶ Skwi mokwa man Ndo nzi pèc pècèk a gi shèwa a vna. Skwi matsaradaʼa man a ndara na:

¹⁷ Mpi di nfi va; nèʼèn ncèkèlma; ri man a keɗa ndo man mali na azɓai;

¹⁸ ndav man a ngwèdè ndo; sak man a hi a verzi skwi ambaɓiaʼa;

¹⁹ ndo ngi malwuɗi ncèkèlma; ndo mpa ta gèɗ a va a kramamhai.

²⁰ Kra ga, ɓür ma man bab ngaya a fa ka a gèɗ; ka kwola njè-ma mam ngaya ɓai!

²¹ Gsa te ndav ngaya pèc pècèk; feda a daʼai, ara skwi daʼai!

²² Aman ka dè, a feda ka ma; aman ka nzhuna, a ɓer ka; aman ka pidèkwe ngaya, a gada ka.

²³ Ma nkwèrè, nara pitirla. Njè-ma man ta njè ka, nara skwi nhel sam. Man ta ngatsa ka maya, a ta slebda ka, nasa civèɗ nshèffè ngaya.

²⁴ A ta ɓer ka te ri ngwoz mphomaʼa, te ri nèʼèn ngwoz ndo ngiɗè man jinèslèa ara gogom.

²⁵ Ka tütüko te ndav ngaya ɓai, a gèɗ man a hudemshè te dai. Mbèzlè di nengaʼa da zlama ka ndav ɓai!

²⁶ Fali dam nʼnda movar, dèʼa na; aman ngwoz ndo, sèi a gedas ka nshèffè ngaya tèlèba.

²⁷ Ka slaha ka shèwèlè a vogwa te gozhèm maslaka dè, a ndi maslaka azɓi dè?

²⁸ Ka slaha ka mbècè a ndazli vogwa a sak, vogwa a ndi sak azɓi dè?

²⁹ Lèmèlèmè ndo man a dè a woy ngwoz nslamagi na; ndo man a lama na, a ngècè kita na.

³⁰ Ndo man a gi metsar, a géɗ mi man a keɗaʼa, ta jè-keda azɓi genè.

³¹ Aman ta ngots a géɗèʼa, a pilèʼa sak tsaraɗ, ko a pilèʼa a skwi nte gi na tèlèba.

³² Aman ndo man a ndeda ngwoz ngiɗè a mphöme, maya na azɓi pal ba; ndo man a giaʼa, a woya a zeda nshèffè na.

³³ Hori a tussoma na dai, hori a shkè auda a di nengaʼa azɓai.

³⁴ Aman baki ngwoz a gi srak, a ndav a dza na, a pats man a ka pilèʼa, ka sia te va azɓai.

³⁵ Ka slaha a ka pilèʼa a Suli azɓai; skwi mèmè man ka woy a ka va na, a cè azɓai.