Proverbes 5 - Ma Zhiklè

¹ Kra ga, fu gèɗ a ma maya ga; fu zlembaɗ a skwi man i senda ka,

² a ka ɓer skwi man i ngra ka, a ka sun ngèɗè ma maya.

³ Ngwoz ndo ngiɗè a gaɗa ka ma ara vongwom, daʼai nengaʼa jinèslèa ara gogom;

⁴ aman ndikè ma nengaʼa ɗuzlekzlekaʼa ara dèrvowa, nara gwèsh ntasla te tsagi cèw.

⁵ Sak nengaʼa a da na ma a mʼmetsai; a ndikè a sam mʼmetsai.

⁶ A fi gèɗ a civèɗ nshèffè azɓai, civèɗ nengaʼa a zlakeda, a sun ɓai.

⁷ Anai a kra ga, tsena ma ga! Ka jèkeda njè-ma ga ɓai!

⁸ Do ngaya auda a civèɗ nenga dra; ka herda va a ntamagi nengaʼa ɓai!

⁹ Man ɓai ndo ngiɗè a cèma ka nʼnjèl ngaya, a ndo man ka sia te va azɓai, a zeda nshèffè ngaya.

¹⁰ Man ɓai ndo ngiɗè a wuffè a géɗ skwi mèshèlè ngaya, a skwi ntul mizlinè ngaya a zi na a sam ndo ngiɗè man ka sun ɓai.

¹¹ Man ɓai ka da gudzai te deɓaʼa, va ngaya a zluèɗ-va ngaya ta da husom ta.

¹² A ka da gada: Hay, i kwola nslebi skwai, aman agassa i da fu gèɗ a ma man ta ngatsay maya a vna!

¹³ I tsena ma ndohi njèngayè ɓai èhèmè? I fu zlembaɗ a skwi man ta senday ɓai èhèmè?

¹⁴ Njèkè kètè genè, ar i zakaɗ ga auda te ndev nhèyè ndohai, a i nzi te matakwan a mèdèp.

¹⁵ Su iyam te vèvèɗ iyam ngaya, iyam nkéɗècèʼa te thal ngaya!

¹⁶ Nlèlè iyam ngaya da hu na ɗè? Iyam ngaya da hu auda a dala dè?

¹⁷ Da ga a skwi ngaya genè, a skwi ndo ngiɗè ka ɓai!

¹⁸ Nlèlè iyam ngaya da ngots mpshè ma; wuffa a géɗ ngwoz gol ngaya!

¹⁹ Mènèɗ pombai, bhwal lèdèdèʼa, da pa ka wa a gèɗ! Woy nengaʼa a ndav pèc pècèk!

²⁰ Ka woya ka pèr wa ngwoz ndo ngiɗè a ka kelawa na ri a daʼai èhèmè?

²¹ Ndo nzi pèc pècèk a sun civèɗ ndo staɗ staɗ tèlèba, a pi di a sam man a dè a pa tèlèba.

²² Ndo malai, mali nengaʼa a ngwoda na va a gèɗ; mali nengaʼa a dzawaʼa ara teɓa;

²³ a metsi na, a géɗ man ta ngatsa na maya ɓai, a zi na, a géɗ nrzlè nengaʼa mbiaʼa.