Proverbes 4 - Ma Zhiklè

¹ Wudahi ga, va-tsena ma man bab kinè a ngreda kinè! Va-fu zlembaɗ, a kin slebi skwi nzuraʼa!

² Iyè man i njè kinè ma man amba. Njè-ma ga kin kwola bai!

³ Te va man i kra dai, iyè a sam bab ga, i shfa di ɓai, mam ga a wa-ryè,

⁴ bab ga a sendayè, a gaɗayè: Ndav ngaya da ɓür ma ga, dzodzor ma nkwèr ga, a ka nzi a nshèffè.

⁵ Woy maya, gau aman a ka sun skwai; da pca ka a gèɗ ɓai, ka jèkeda ma ga ɓai!

⁶ Ka jèkeda ɓai, nengaʼa a da ɓer ka; woyo a ndav ngaya, a da wara ka dai.

⁷ Maya a hinè te skwi haha: ngots maya, gau aman a ka sun skwai, a nda skwi man ka ngotso tèlèba.

⁸ Va na civèɗ, a da slambaɗda ka gèɗ; aman ka gso a ndav ngaya, a va ka nʼnjèlè,

⁹ ara man a paɗa ka gèɗ a maslaka man amba, a va ka mpèɗè gèɗ mbelaʼa.

¹⁰ Tsena, a kra ga, co ma ga, a ka vi kumba.

¹¹ I ngra ka civèɗ maya; i feda ka ma a civèɗ nzuraʼa.

¹² Aman ka dè, skwa a pa ka ngudɓi a sak azɓai; aman ka hai, sak ngaya a jèvèdè azɓai.

¹³ Gso va a nshindè skwai, ka jèkeda ɓai, ɓüro, aman nengaʼa nshèffè ngaya.

¹⁴ Ko do a civèɗ ndohi nderɗa Zhiklè ɓai, ka dzodzor civèɗ ndohi malihi ɓai!

¹⁵ Jèkeda, ka mbatseda sak a pa ɓai! Bezla na va ngaya auda a pa!

¹⁶ Aman ta nzhun azɓai, nzhunè a gsama ta di azɓai, sèi ta kalda ndo ngiɗè a hi dai.

¹⁷ A ta fa mali a skwi nʼndi ta; a ta fa shèwa a skwi nsi ta.

¹⁸ Civèɗ ndohi nzuraʼa, nara skwi nhél sam man a hél sam a ma ma, ha géɗ pats.

¹⁹ Civèɗ ndohi ambaɓihiaʼa te ruva, ta sun skwi man a slafadama ta sak ɓai.

²⁰ Kra ga, tsun ma ga, fu zlembaɗ a njè-ma ga!

²¹ Do do auda te gèɗ ngaya ɓai, ɓüro te ndav ngaya tʼhwaɗaʼa!

²² Tengaʼa man ta suna, a gi a nshèffè ta, nara madzaf va nengaʼa tèlèba.

²³ A géɗ skwi tèlèba, ɓüro ndav ngaya, a nshèffè mbelaʼa a shkè auda te pa!

²⁴ Ka tsokol ma ɓi fèt ba, ka zlu ma ɓai!

²⁵ Pu di ngaya zuraʼa a ma, winè di ngaya zuraʼa a ma ngaya!

²⁶ Pu di a civèɗ man sak ngaya a bizhè a pa; a woy civèɗ ngaya ntila.

²⁷ Ka beza zlawa ɓai; ce na sak ngaya auda a sam malai.