Proverbes 31 - Ma Zhiklè

¹ Ma Lemuel, bai, man mam na a senda na.

² Kra ga, kra hwaɗ ga, kra man i gadda ma a hai a gèɗ nengaʼa.

³ Ka zede wuɗi ngaya a verzi ngwozi ɓai, ka gedassa civèɗ ngaya a civèɗ man a zlakeda ta bihi ɓai!

⁴ Ndo man a si zom, amba a bi ɓai; skwi mɓeslaʼa, skwi nsi wud bihi ka ɓai.

⁵ Man ɓai a siaʼa, a ma kita a pca na a gèɗ, a ngwoda ta kita a gèɗ a mbelawahai.

⁶ Dara kin jèka ta zom a ndohi man ta zi ta, a kin va na zom a ndo man a gi ndav tungrungaʼa.

⁷ Aman a si zom, ntèwèsh nengaʼa, skwi mwuɗitpa nengaʼa, a pca na a gèɗ.

⁸ Gaɗa na ma a va man a ngwoz mazai; nza ta a deɓa a wud dikihai!

⁹ Goɗ ngèɗè zuraʼa a ka bozlo kita zuraʼa, nza ta a deɓa a mbelawahai a ndohi ntawassaʼa.

¹⁰ Nkèlèkèlè ngwoz a fena Suli kumba; nda ngècè wa?

¹¹ Baki na a pi ndav a vna, a ngècè skwi a vna kumba.

¹² A ga na skwi man amba, a ga na skwi ambaɓiaʼa azɓai, a pats nshèffè nengaʼa tèlèba.

¹³ A hèsh gogumai a maslaka, a tsiaʼa, a ɗehaʼa, a ri mwosla.

¹⁴ Nengaʼa a ngècè skwi nʼndi na, ara ndohi ganai man ta hulko dra.

¹⁵ A slèmbèdè a prèk te gai, a til skwi nʼndi ndohi gi na, a ngra ta mizlinè a ndohi mizlinè tèlèba.

¹⁶ A skwi man a ngots te mizlinè na, a shum skwi a nfi a hai.

¹⁷ A mana maslaka na, a pra ri na, a ngi mizlinè.

¹⁸ A nʼngots mizlinè nengaʼa a gi amba amba, a mbècè vogwa a hi te rèwèc azɓai.

¹⁹ A kerzh kizlèɗ, a min gogumai.

²⁰ A prè rai a takaha ndo ntawassaʼa, a gsa mbelaw ndo.

²¹ A gi zlau mtasl azɓai a géɗ ndohi gi na; ndohi gi na tèlèba ta ngècè maslaka cèw cèw.

²² A tsi borkwa a ri na. Maslaka nengaʼa matsali mbelaʼa a vèvèzh.

²³ Ta slébèrdè baki nengaʼa a gaba a géɗ nengaʼa, aman a nzi te va ndohi nhalaʼa.

²⁴ A ɗèh maslaka, a prèʼa, a dèh gadagar, a pra ta a ndohi ganai.

²⁵ Wuɗai a nɗaɗav a va ara maslaka, a ngwèshè a géɗ mangoslèm.

²⁶ A winè ma, a ma maya a shkè auda; ma nhènèkèa man a senda ka, te ma na.

²⁷ Mizlinè mèmè, skwi mèmè te gi na, nengaʼa a ɓirèʼa. A peɗi movar ngworaʼa azɓai.

²⁸ Wudahi nengaʼa ta grè a ta shida na gèɗ, a baki nengaʼa ba a shibèndèʼa.

²⁹ Dalahi ngiɗè kumba ta nda a nkèlèkè-lè; aman ka, ka fen ta tèlèba.

³⁰ Amba a dai, a di a ngwoda na. Ngwoz man amba te dai, mbambi nengaʼa skwi ambalai; aman ngwoz man a gi zlau Ndo nzi pèc pècèk, sèi ta slébèrdèʼa.

³¹ Va-va na skwi ntul mizlinè ri na! Labar ma nengaʼa sèi ta gèɗèʼa a gaba!