Proverbes 30 - Ma Zhiklè

¹ Ma Agur, kra Jaké, mana ngaɗa ta a nda Ithiel a Ucal. Ndo a gaɗa: I keɗa ndhtsan a gèɗ ambalai, Zhiklè, ntulè a keɗyè ma, Zhiklè i ngeza ma!

² Maya ga maya ndo ka ɓai, iyè ara gelakai.

³ I sleba maya bai. I ngatsa maya a i shin Zhiklè nkezlaʼa ɓai.

⁴ Nʼndo Zhiklè wa? Mshke a deɓa te zhiklè wa? Ngshè kozlar a ri wa? Ka sun dè? Mpu verzi herkeda wa? Nzlembaɗ na wa?

⁵ Ma Zhiklè tèlèba, ta jkeda ma, gambar ndohi tèlèba man ta nzi a diaʼa.

⁶ Ka va na ma a vaʼa ɓai, man ɓai a ga ka ndzoan, a ka gi a ndo ncèkèlma.

⁷ I jhèɗè skwi cèw a sam ngaya: kam, kam, vayè, ga i metsi ga:

⁸ Nʼngél ma, a ncèkèlma, kaldaussa dra a sam ga! Giyè, i za ndo ntawassa ka ɓai, i za ndo mèshèlè ka ɓai, vay skwi nʼndi teɗè hwaɗ ga genè,

⁹ man ɓai, man i wèl va, i da ga ka ri a gèɗ a i gaɗa: Zhiklè tema? Man ɓai, man i tawassa, i da gi metsar, a i gi mali a sam nzlembaɗ Zhiklè.

¹⁰ Ka ta na daf a gèɗ a ɓèlè a sam babgi na ɓai; man a da phomde ka, mali ngaya.

¹¹ Verzi ndohai, man ta phomde bab ta, man ta slébèrdè mam ta azbai.

¹² Verzi ndohai man ta hur a ta gada: nga ndohi nzuraʼa, aman ndav tengaʼa nlizhèa, ntil ɓai.

¹³ Verzi ndohi nfi va, man ta gurshè dai.

¹⁴ Verzi ndohai man zlèʼèn tengaʼa nara gwèsh, mahazau tengaʼa, nara zhèn-gèzhè, a ta ndeda mbelawahi a ma a géɗ herkeda, a ta bazla ndohi ntawassaʼa a géɗ herkeda!

¹⁵ Dalahi feftèm cèw: Vay dai, vay dai! Skwi makar man ta ngézhè azɓai; skwi mafaɗaʼa man a gèɗè: dèʼa nga ma, azɓai.

¹⁶ Sam mʼmetsai; deli ngwoz; herkeda man iyam a ngeza na azɓai. Vogwa a gèɗè azɓai: Dèʼay ma.

¹⁷ Ndo man a livè bab na, ndo man a kwola ma mam na, ngwak da cko na di auda, zligijè da ndedama!

¹⁸ Skwi makar man a fena maya ga, skwi mafaɗaʼa man i sun asaɓai.

¹⁹ Civèɗ mangayak te giɗfèk, civèɗ zhüzhok te gi za, civèɗ wurom a géɗ iyam mbiaʼa, civèɗ gola nte ndav bidalai.

²⁰ Civèɗ fali ngwoz a na haha: a ndi skwai, a saha ma na, a gada: i ga mali ɓai.

²¹ Herkeda a gudzi te ri skwi makar; skwi mafadaʼa a fena wuɗi na:

²² Ɓèlè man ta fi a bai, ndo nrzlaʼa man a wèl va.

²³ Ngwoz man ndohi ta kwolaʼa, te deɓaʼa a ngotso bakai. Ɓèlè man a vurɗko mamgi na auda.

²⁴ Skwi nküt-kütèa fad a géɗ herkeda, ta fena ndohi maya a maya ta:

²⁵ Ngwo-lèlè; wuɗi ta azɓai, aman ta ɓiceda skwi nʼndi ta a gi a ngwar.

²⁶ Htap; wuɗi na azɓai, aman a ri gi nengaʼa te za.

²⁷ Dzarai; bi tengaʼa azɓai, aman ta dè a civèɗ staɗ.

²⁸ Nguzotok; ta jèrè auda te gai, aman gi bai ba a dè a pa.

²⁹ Skwi makar man va tengaʼa ngatsa; skwi mafaɗaʼa man a dè ndè bai.

³⁰ Marizhèlè; mba nengaʼa te va skwi dak tèlèba, a gi zlau skwi ngiɗè azɓai.

³¹ Ngarah man a dè te va dalahi wotsakai. Mazawal man a dè a ma ɓokwai. Bai man a ma ndohi var nengaʼa.

³² Aman ma ngaya a woy a gèɗè ma nfi va ara ndo nrzlaʼa, pizlè ma ngaya!

³³ Aman ka kala wa, ka ngècè mbar wa; aman ka ɗuts htsan, pombaz a shkè auda; aman ka kala na a va ndzoan, a ndi na a mbèzl va.