Proverbes 3 - Ma Zhiklè

¹ Kra ga, njè-ma ga da pca ka a gèɗ ɓai! Ndav ngaya da ɓür ma man i njè ka a gèɗ!

² A nherɗa ka pats nshèffè ngaya a ma ma, a ka nzi amba amba.

³ Mwoy-ndo a nlèɓèslè da nza a sam ngaya, ara skwi daʼai te daʼai ngaya, windeda a ndav ngaya!

⁴ A ka ngècè pombai a manam a sam di Zhiklè, a sam di ndohai.

⁵ Gso va a Ndo nzi pèc pècèk, a ndav ngaya tèlèba, ka gso va a maya ngaya ɓai!

⁶ Hur nengaʼa a civèɗ ngaya tèlèba, a nengaʼa a da lèmdè ka civèɗ ngaya fèhèʼa.

⁷ Ka hur te ndav ngaya a ri ngaya ɓai a ka gada: i ndo maya. Gu zlau Ndo nzi pèc pècèk, a ka bezla na va ngaya auda a sam skwi man ambaɓai.

⁸ Skwi haha a da mbél ka dzaf-dzafaʼa, a shfe ka.

⁹ Slubordo Ndo nzi pèc pècèk te skwi ngaya man ka va na te nshèlèkur skwi man ka ngots tèlèba.

¹⁰ A wov ngaya a ndhè srafafaʼa, a klok ngaya a ndhè shefefaʼa.

¹¹ Kra ga, ka kwola ɓai, aman Ndo nzi pèc pècèk a ngatsa ka maya; aman nengaʼa a ga ka ndzoan, ka gu ndav ɓai!

¹² Ndo man Ndo nzi pèc pècèk a woyaʼa, a ngatsa na maya, ara bab kra man a ngézhè kra man a woyaʼa.

¹³ Mwuffè a sam ndo man a ngots maya ma, a sam ndo man a nslebau skwai.

¹⁴ Ndo man a ngotso, a nʼngots skwi a fena sulai; skwi man a shkè auda te pa, a fena guro.

¹⁵ A fena kwa mbelaʼa; a skwi mbelaʼa mèmè man ka ngots tèlè a lèmdè va a vna azɓai.

¹⁶ Nshèffè man a nzi dai, nte ri mandi nengaʼa; skwi mèshèlè a nʼnjèlè nte ri gula nengaʼa.

¹⁷ Civèɗ nengaʼa, civèɗ mwuffè; civèɗ nengaʼa tèlèba, civèɗ gumai.

¹⁸ Maya nara wof nshèffè, a sam tengaʼa man ta gshè va a vna. Ndo man a prèʼa azɓai, a wuffè.

¹⁹ Ndo nzi pèc pècèk a ngu herkeda a maya na, a nfu giɗfèk a maya te gèɗ na.

²⁰ A géɗ maya man a suna, iyam a hakaɗauda te vèvèɗ, a minmèn a shkèhi te zhiklè.

²¹ Kra ga, maya do do na auda te gèɗ ngaya ɓai! Ɓür maya, hur skwi man a ma;

²² a da va ka nshèffè a ndav ngaya, a gi ara skwi daʼai ngaya.

²³ Te deɓaʼa ka dè a civèɗ ngaya gidim-gidimaʼa, skwa a tsama ka sak azɓai.

²⁴ Aman ka mènèhai, ka gudzi azɓai, aman ka nzhunè, a da ka a ndav hinnaʼa.

²⁵ Ka gi zlau skwi man a guv ka azɓai, ka gi zlau matakwan, a sam skwi ambaɓiaʼa, azɓai.

²⁶ Aman Ndo nzi pèc pècèk, nengaʼa man ka pi ndav a vna, a ɓer ka a sam skwi mana slawama ka sak.

²⁷ Aman ka ngots skwai, va na ndo man a ngatsa skwa ɓai.

²⁸ Aman skwi a zhè te ri ngaya, ka gada na nslamagi ngaya: Do a ka shkè a deɓa angoslèm, i da va ka, – ka gada na arsa ɓai!

²⁹ Ka hur skwi man ambaɓai a géɗ nslamagi ngaya ɓai, man a zhè a sam ngaya, man a gshè va a ka.

³⁰ Ka vursl ma ambali a ndo ɓai, aman a nga ka skwa ɓai!

³¹ Ka büzh va a ndo man a gi shèwa ɓai, ko do a civèɗ nengaʼa ɓai!

³² Ndo nzura ka ɓai a ndara na Ndo nzi pèc pècèk. Aman ndohi nzuraʼa ta gi a mandal nengaʼa.

³³ Ndo nzi pèc pècèk a phomde gi ndohi man ambaɓai, a pshè ta ma a gi ndohi nzuraʼa.

³⁴ A ngwossaha ta ndohi man ta ngwossaha, aman a va ta pombai a ndohi mʼmanda gèɗ ta a hai.

³⁵ A slebarde ta ndohi maya, aman a pa ta hori a di a ndohi nrzlaʼa.