Proverbes 29 - Ma Zhiklè

¹ Ndo man ka ngatsa na maya, a tsena gèɗ ɓi genè, a kèlèhi a nasa nasa, skwi ntakaha azɓai.

² Aman ndohi nzuraʼa ta zlèzlèmè a ma ma, ndohi kokwar ta wuffè. Aman ndo ambaɓiaʼa a gi bai, ndohi ta ɓishè a pa.

³ Ndo man ma maya ambaha, bab nengaʼa a wuffè a gèɗ nengaʼa; ndo man a dè a verzi fali ngwozihai, a zede skwi na.

⁴ Bi a til kokwar na a skwi nzuraʼa; aman bi man a ndi skwi ndo, a gédèshè kokwar.

⁵ Ndo man a dzegarde ka, a ra ka vèvèɗ a hwaɗaʼa.

⁶ Ndo ambaɓiaʼa, mali na a slafadama na sak; aman ndo nzuraʼa a gi a ngulaʼa, a wuffè.

⁷ Ndo nzuraʼa a hér mbelawhai; ndo ambaɓiaʼa a sun aranta ɓai.

⁸ Ndohi mpèrè a ndo ta jèkèɓè kokwar; aman ndohi maya ta mbatsedaha gèɗ ndav.

⁹ Aman ndo maya a ndo nrzlaʼa ta versl ma, ko ma ndzoan, ko ma ngwèshè, ma a ndivè azɓai.

¹⁰ Ndohi nked ndo ta gi shèwa a skwi nzuraʼa; aman ndohi nzuraʼa ta ɓirèʼa.

¹¹ Ndo nrzlaʼa a pelèɗ ma auda tèlè; aman ndo maya a godkoɗauda azɓai.

¹² Aman bai a fi zlembaɗ a ma ncèkèl-ma, golahi nengaʼa tèlèba ta ndi a ndohi shèwa.

¹³ Aman ndo ntawassa a a ndo man a ga na matakwan, ta zli gèɗ, sèi Ndo nzi pèc pècèk a winè ta zlembaɗ cèw ba.

¹⁴ Bai man a ga ta kita zuraʼa a ndohi ntawassaʼa, sam nʼnzi bi nengaʼa a nzi a ma ma.

¹⁵ Mènèwèɗ a ndzoan ta ngatsa na maya a ndo. Aman gola man ta pra na ma a gèɗ, a da pa na hori a di a mam na.

¹⁶ Aman ndohi ambaɓihiaʼa ta zlèzlèmè, mali ba a zlèzlèmè; aman ndohi nzuraʼa ta da rka man ta wushahai.

¹⁷ Nguz kra ngaya, ka da ngècè nshèk va, a da wuffede ka!

¹⁸ Aman ndo nhadka ma Zhiklè azɓai, skwi ngska ta ndohi a hi azɓai. Mwuffè a sam ndo man a jèjèr ma kita!

¹⁹ Ɓèlè a ngézhè a ma ambali azɓai; a tsena a zlembaɗ ma ba, aman a fa na gèɗ azbai.

²⁰ Aman ka rka ndo ngiɗè man a vèsh ngèɗè, dara ndo nrzlaʼa.

²¹ Ka fa na gèɗ a pa a kra te wudahi ɓai, man ɓai nda gra, a da gi mèdègèɗ.

²² Ndo man ndav a va a hèsh mbèzl va; a ndo man a gèɗ ma a wuɗai a gi mali kumba.

²³ Nfi va a da manda na gèɗ a hi a ndo nfi va; aman ndo man a manda gèɗ a hi a ngècè nʼnjèlè.

²⁴ Ndo man ta kezli skwi a ndo metsar, kala man a gi shèwa va na; a sun skwi mphomdaʼa, aman a ngredè azɓai.

²⁵ Ndo man a gi zlau ndohai, a kèlèhai; aman ndo man a pi ndav a Ndo nzi pèc pècèk, ta lama na azɓai.

²⁶ Ndohi kumba ta woy a bi a pe ta a ndo; aman Ndo nzi pèc pècèk a dèlè ta skwi a ndo staɗ staɗ tèlèba.

²⁷ Ndo man a gi malai, a ndara ta ndohi nzuraʼa; aman ndohi man ta dè zuraʼa, ta ndara ta ndohi ambaɓihiaʼa.