Proverbes 28 - Ma Zhiklè

¹ Ndo ambaɓiaʼa a hi na, ko ndo a hi a verzi nengaʼa azɓai; aman ndo nzuraʼa a nza, a gi zlau azɓai, ara marizhèlè.

² Te kokwar-bai man ma ndzakaɓa te pa, ko wawa a gaɗa i bai; aman te kokwar-bi man ndo ngiɗè a zhè, man maya na zhè, man a sun skwai, kokwar-bi nengaʼa a nzi a ma ma.

³ Ndo ntawassa ngiɗè man a ga ta matakwan a mbelaw ndohai, nara iyam nchè nchè man a tsurha herkeda, a skwi a gi te deɓaʼa azɓai.

⁴ Ndohi man ta kwola ma kita, ta slébèrdè ndo malai; aman ndohi man ta jè-jèr ma kita, ta slambaɗa na va.

⁵ Ndohi ambaɓihiaʼa ta sun skwi nzura ɓai; aman ndohi man ta woy Ndo nzi pèc pècèk, ta sun skwi tèlèba.

⁶ Dara ndo ntawassaʼa man a de te ngi zuraʼa, a géɗ ndo mèshèlè man a beza zlawa.

⁷ Ndo man a jèjèr ma kita, a sun maya; kra man a dè a verzi falihai a pa na hori a di a bab na.

⁸ Ndo man a ɓicè skwi mèshèlè na a ndi mpataka sulai, a mɓica na hi a ndo ngiɗè man ndo a sia te va.

⁹ Ndo man a ndè zlembaɗ a ma kita Zhiklè, ko ntsi ri nengaʼa a ndara na Zhiklè.

¹⁰ Ndo man a zlakeda ta ndohi nzuraʼa a civèɗ ambaɓiaʼa, a kèlè a vèvèɗ man a rau a ri na; aman ndohi nzuraʼa ta ngècè manam.

¹¹ Ndo mèshèlè a sam di na a gaɗa i ndo maya; aman ndo ntawassaʼa man maya na zhè, a wuzhè ndav ndo sa.

¹² Aman ndohi nzuraʼa ta gi a ngulaʼa, nasa nʼnjèl mbiaʼa. Aman ndohi ambaɓihiaʼa ta gi a ngulaʼa, ndohi ta nghédè va ta.

¹³ Ndo man a ngheda mali na, a grè a ma ma azɓai; aman ndo man a ngreda auda, a jèkeda, a si Zhiklè te va.

¹⁴ Mwuffe a sam ndo man a gi zlau Zhiklè pèc pècèk; aman ndo man a sassaya ndav na, a kèlè a matakwan.

¹⁵ Ndo ambaɓiaʼa man a kwèr ndohi man wuɗi ta azɓai, lèmèlèmè ara marizhèlè man a kuɗkaɗai, a kokoya man mi a keɗaʼa.

¹⁶ Bai man maya na a hcè, a gi skwi a wuɗi holholaʼa; aman ndo man a gi skwi a wuɗi azɓai, a nzi a nshèffe.

¹⁷ Ndo man a kéɗ a ndo a hai, a ha na ma a mʼmetsai, a hi na a sam mʼmetsai: ka gseda hi ɓai!

¹⁸ Ndo man a gi mali azɓai, Zhiklè a takaha. Ndo man a beza zlawa, a kèlèhai.

¹⁹ Ndo man a pizhè gi dau na, skwi na a zhè; aman ndo man a woy skwi ngiɗè ambalai, ntèwèshè a ga na.

²⁰ Ndo nlèɓèsléʼa, mpshè ma na a zhè; ndo man a wosla na va a mɓicè skwi mèshèlè, kita a da gshèʼa.

²¹ Ambaɓai aman ka pèr ndo mpèrè; ko a géɗ skwi kèshkata man ta ruɓ ndo a vna, a gi malai.

²² Ndo man a gi ntétékè, a wosla na va a mɓicè skwi mèshèlè, a sun a ngaɗa i da tèwèsh ga ɓai.

²³ Ndo man a ngezh ndo ngiɗè, a ngatsa na maya, a da ambaha, a fena ndo mbezlatsedahi a ma ambalai.

²⁴ Ndo man a cèma na skwi a bab na a mam na, a nhur a gaɗa mali ka ɓai, mandal ndo ngedassa skwai.

²⁵ Ndo mwoy skwai a bidko mbèzl va; aman ndo man a pi ndav a Ndo nzi pèc pècèk, a ngézhè hwaɗ na.

²⁶ Ndo man a pi ndav a maya na, nrzla; aman ndo man a dè a civèɗ na a maya a mbél na.

²⁷ Ndo man a vi skwi a ndo ntawassaʼa, a tèkwèn skwi azɓai; aman ndo man a paha di a ndo ntawassaʼa azɓai, ta phomda.

²⁸ Aman ndohi ambaɓihiaʼa ta kwèr samaʼa, ndohi ta nghédè va ta. Aman ta ze ta, ndohi nzuraʼa ta zlèzlèmè a ma ma.