Proverbes 27 - Ma Zhiklè

¹ Ka fu va a géɗ mangoslèm ɓai! Ka sun skwi man a da gi angoslèm ɓai.

² Ndo ngiɗè da slebarde ka, ka slubordo va ngaya a ri ngaya ɓai! Ndo te verzi ngiɗè, a ma ngaya ka ɓai!

³ Ndo man a gi ndav a géɗ ndo nrzlaʼa, dara ka zuɓa kwa a wyak.

⁴ Ndo man a gi ndav worworaʼa, wuɗitpa; aman mba srak.

⁵ Dara ndzoan man ta ga ka a di a dai langa, a géɗ mandala man a woy ka, a géɗè gèɗ auda azɓai.

⁶ Aman mandal ngaya a tse ka, dara nengaʼa a géɗ ndo mayam ngaya man a kelawa ka ri a daʼai.

⁷ Ndo man a ngeza, a mbatsaha dazli vongwom a sak. Ndo man mi a keɗaʼa, ko skwi nduzlekzlekaʼa a jènaha.

⁸ Ara ɗiak man a hu na dra, a zlak na, a ngècè gi na asaɓai, lèmèlèmè ndo man a jèkeda kokwar bab na.

⁹ Mbar a ɓurdi ta wuffedè ndav; ma man mandal ngaya a ngatsa ka maya a vna, a fena maya man ka ngots a ri ngaya.

¹⁰ Ka kwola mandal ngaya, a mandal bab ngaya ɓai! A pats matakwan ka hu a gi kramam ngaya ɓai! Dara nslamagi ngaya man a tsagi ngaya, a géɗ kramam ngaya man na dra.

¹¹ Kra ga, gu maya, a ndav ga a gi langlangaʼa, a i slaha i mbeda na ma a ndo man a livyè a géɗ ngaya.

¹² Ndo man a sun maya, a rka matakwan a shkè, a nghédè va na. Deɓi ndohai ta da na gèɗ durroʼa.

¹³ Co maslaka ndo man a nco skwi ngaya a mva na ndo ngiɗè; aman a mvu a ngwoz man verzi na tsaɗ, co gi nengaʼa tèlèba!

¹⁴ Ndo man a bèhèdè mpshè ma a nslamagi nengaʼa, mpshè ma nengaʼa a ndi na a skwi mphomdaʼa.

¹⁵ Iyam mana tkwe ka te vavaz pèc pècèk, a ngwoz man a gi ma, ndara te va azɓai.

¹⁶ Aman ka woya man ka gshèʼa hai, dara man ka gs kozlar.

¹⁷ Züdo ka tèslè a züdo; a ngurhi ta pi gèɗ va ta auda.

¹⁸ Ndo man a wèr di wof te gi lak na, a ndi nyiaʼa. A ndo man a wèr di a bi na, ta slébèrdèʼa.

¹⁹ Ara man ka rka di ngaya te iyam, ndohi ngiɗè ta rka ndav ngaya.

²⁰ Lèmèlèmè ara sam mʼmetsai a vèvèɗ mpèltemtemaʼa a ndhè azɓai, di ndo a ngèzhè azɓai.

²¹ Vizhèu man amba a ɗèlè te gezla; züdo man amba te kulkwèsl; ndav man amba a ɗèlè te labar ma nengaʼa.

²² Ko ka wosla ndo nrzlaʼa te gezla, nrzlè nengaʼa a shkè auda te nengaʼa azɓai.

²³ A woy ka sun tambaki ngaya, a ka wara ta dai.

²⁴ Skwi mèshèlè a skwi te wov ta nzi a mèdèp azɓai.

²⁵ Aman mandi klèng ma, ko ksof ba klèng ma, ko a vara ba klèng ma,

²⁶ ka ngots zluèɗ, a ka ngots ɓok a ka sum gi dau a vna.

²⁷ A ka ngots skwi mandai a kinè a ndohi gi ngaya a ɓèlèlihi ngaya kin ndiaʼa.