Proverbes 25 - Ma Zhiklè

¹ Na haha ba ngèlègèɗ ma Salomon, man golahi Ezéchias, bi Juda, ta ɓicaʼa.

² Nʼnjèl Ndo nzi pèc pècèk a nghédè skwai; nʼnjèl bai a wuzhè skwai.

³ Ara man zhiklè a zhè te géɗèʼa, a herkeda tʼhai, lèmèlèmè ndo a sun ndav bi ɓai.

⁴ Aman ta woslkoɗi zi auda te guro, guro a viɗè amba amba.

⁵ Cko ndo ambaɓiaʼa auda te va golahi bai, a sam nʼnzi bi nengaʼa a ngècè wuɗai te ngi-zuraʼa.

⁶ Ka slubordo va ngaya a sam di bi ɓai! Ka fu va ngaya a ndo mbiaʼa ɓai!

⁷ Dara man ta gada ka: Washkè a ma! a géɗ man ta menda ka a deɓa a sam nʼnzi te deɓa, a sam di bai.

⁸ Aman di ngaya a rka skwi ngiɗè ka ngreda a sam kita tsam tsam ɓai! Ka da gi kè, aman ndo ngiɗè a pa ka hori a dai?

⁹ Tilda ma a hai a nslamagi ngaya; aman a ha ka a ndav, da nza a gèɗ ngaya!

¹⁰ Man ɓai ndo man a ntsenaʼa, a derɗe ka, a ta ngre ka.

¹¹ Ma man ka goɗ te di na te di na, nara matawai te kokwi mbelaʼa.

¹² Ndo maya man a ngatsa na maya a ndo man a fi gèɗ a ma nengaʼa, nara tèslri guro, nara skwi daʼai mbelaʼa.

¹³ Ndo sak nzuraʼa a sam ndo nzlündo, ara iyam ntasla a pats vazaza, a gi latsatsaʼa te ndav bi na.

¹⁴ Ndo man a gada ka: i va ka skwai – aman a vi azɓai, nara vani malama man iyam a te pa ɓai.

¹⁵ Aman ka vèshè a ma azɓai, ndo kita a sun a ngaɗa a ngel ma ka ɓai. Ma gumi a pèslè vatasl a va ndo.

¹⁶ Aman ka ngots vongwom, ndau tedè a hwaɗ ngaya genè, man ɓai a ngezla ka a gèɗ, a vnèhède ka.

¹⁷ Ko do a gi nslamagi ngaya pèc pècèk ɓai, man ɓai ka ngezla na a gèɗ, a ga ka shèwa.

¹⁸ Ndo man a gi malwuɗi ncèkèlma a géɗ nslamagi na, nara géɗ gada, nara tsakwal a sulom ntaslaʼa.

¹⁹ Aman ka gshè va a ndo ambaɓiaʼa a pats matakwan, nara zlèʼèn man gojèrè a ndiaʼa, nara sak mpaslaʼa.

²⁰ Ndo man a sla na dimesh a ndo man ndav na a kuɗai, nara vah mèmèɗ man ka ɗatsa na a ma mblè.

²¹ Aman mi a keɗa ndo mayam ngaya, va na skwi nʼndai; aman iyam a dza na, va na iyam nsai;

²² hori a da keɗda pa, a Ndo nzi pèc pècèk a da pel ka.

²³ Kozlar iyam a cko iyam; a tsaval man ta tsu a metsar, a gi a ndo a ɓeslè dai.

²⁴ Dara man nga nza a dala, a géɗ man nga nza te gi a ngwoz man a gi ma.

²⁵ Ma mbelaʼa te kokwar dra, nara iyam nkèdècèa a sam ndo man iyam a dza na.

²⁶ Ndo nzuraʼa man a gudzi a sam ndo ambaɓiaʼa, nara nlèlè iyam ndhwoɗaʼa, a thal iyam man a zhkè.

²⁷ Nʼndi vongwom kumba kumba, ambaɓai; gu maya, ka feda va a pa a ri ngaya ɓai!

²⁸ Ndo man a gshè va azɓai, nara zlazlar kokwar mʼmbeɗaʼa.