Proverbes 23 - Ma Zhiklè

¹ Aman ka zhè a sam ndo mbiaʼa, a ka ndi skwai, gu maya a skwi man a sam ngaya!

² Keɗa na gèɗ dai, ko man mi a keɗ ka holholáʼa!

³ Skwi njèn-njènaʼa da zlama ka ndav ɓai, movar man a vit ka.

⁴ Ka keɗa va ngaya a verzi mwoy skwi mèshèlè ɓai, jèkeda maya va nasa!

⁵ Ka gi pi di a pa – ufè! A ɗüzh na ara mbokwom.

⁶ Ka ndama na skwi nʼndi a ndo hurong ɓai, ka tétékèma na skwi njèn-njènaʼa nengaʼa ɓai!

⁷ Nengaʼa a hur te ndav na tsaɗ; a gaɗa: ndau, sau ma ba, aman te ndav nengaʼa a woya nva ka ɓai.

⁸ Ncèk ri staɗ man ka feda a ma ngaya, ka da saffedaussa, ka gedassa ma ngaya mbelaʼa ambalai.

⁹ Ka goɗ ma a zlembaɗ ndo nrzlaʼa ɓai! Nengaʼa a rka ma ngaya man maya te pa, ara ma ambalai.

¹⁰ Ka herdaha kuma ngwoz mazai a pa ɓai, ka ngelama na dak a kra diki ɓai!

¹¹ Te man nengaʼa man a da pelko na di man a na auda, wuɗi na zhè, nengaʼa a da ga ka kita a gèɗ.

¹² Ngwoda ndav ngaya, a ka sundo skwai, fau zlembaɗ a ma maya!

¹³ Ngatsa na maya a kra ngaya, ka gu zlau ɓai, ndoho a mènèwèɗ, a metsi azɓai.

¹⁴ Ndèhè ar ka ndoho a mènèwèɗ gokwèn; aman ka mbela na nshèffè te mʼmetsai.

¹⁵ Kra ga, aman ndav ngaya a ngots maya, i ba i wuffè te ndav ga.

¹⁶ I ngwèshè te ndav ga tʼhwaɗaʼa, aman ma ngaya a gèɗè ma zuraʼa.

¹⁷ Ndav ngaya da gu srak a géɗ ndohi malihi ɓai; aman da gu zlau Ndo nzi pèc pècèk!

¹⁸ A takaha ka a gèɗ angoslèm ba, a skwi man ka zhèrèʼa a zhè dai.

¹⁹ Tsena, a kra ga, a ka ngècè maya. Ngwoda ndav ngaya a civèɗ nzuraʼa!

²⁰ Ka humda va a ndohi zom ɓai, a ndohi golahwaɗ ɓai;

²¹ aman ndo zom a ndo golahwaɗ ta tèwèsh ta, a menda ta a hi a ta nzi a maslaka nhuslaʼa a va.

²² Tsun ma bab ngaya man a yaka ka, ka kwola ma mam ngaya man nhala ɓai;

²³ woy ma nzuraʼa, a ma maya, ka preda ma ɓai; gso va a nshin skwai!

²⁴ Bab ndo nzuraʼa a slaha a nwuffè. Bab kra man maya kra na a zhè a slaha a ngi langlangaʼa.

²⁵ Bab ngaya a mam ngaya ta da wuffè; mam ngaya man a yaka ka a da wuffè a gèɗ ngaya.

²⁶ Kra ga, vay ndav ngaya, pu di a civèɗ ga!

²⁷ Aman fali ngwoz nara vèvèɗ nraʼa; ngwoz verzi ngiɗè nara thal man ma nterzlaʼa.

²⁸ A pa ka va ara ndo metsar, a gi aman ndohi malihai ta gi a vata.

²⁹ Ta gi wai, wai, wai, tema? Matakwan tema? Ndzoan tema? Nkudi tema? Ta tsi ndo ambali tema? Ndo man di nduzoa tema?

³⁰ A sam ndohi man ta vèkè a gi zom, a ta hèsh zom.

³¹ Ka pu di a zom ɓai, man nduzoa a pa ka wi a ma, man te kokwi kuzlèr-kuzlèrèa a hi a hwaɗ a ri na.

³² Aman te deɓaʼa a je ka ara zhüzhok, a da ka dèrè a va ara ntümsho.

³³ Te deɓaʼa di ngaya a rka skwi nʼngwodaʼa, a ma ngaya a dzakaɓ na.

³⁴ Ka ara ndo man a dè a géɗ iyam, ara ndo wurom te va ndombozlor.

³⁵ Ta tsiyè – a ndzay ɓai! – ta kedyè – i senaha ɓai; i da ciɗ di a ngèmè? Te deɓaʼa i minè géɗè zaʼa.