Proverbes 22 - Ma Zhiklè

¹ Labar ma man amba a fena skwi mèshèlè. Pombai a fena sulai a guro.

² Ndo mèshèlè a zhè, ndo ntawassaʼa a zhè. Ndo nzi pèc pècèk a nge ta cèw ba.

³ Ndo maya a rka skwi mwuɗitpa man a shkè, a nghéɗè va na; madaɗau ndo a dè a ma ma a kèlè a ndzoan.

⁴ Ndo man a manda gèɗ a hi a gi zlau Ndo nzi pèc pècèk, skwi mèshèlè a nʼnjè-lè a gi a skwi ntul nengaʼa.

⁵ Vatak a ɓalai ta zhè a civèɗ ndo nʼngwèdè ndo. Ndo man a woya a mbel nshèffè na, da herda va na a deɓa.

⁶ Senda na skwi man ka woy a kra ngaya a ngiaʼa. Te deɓaʼa, ko nhala ma, a jè-keda azɓai.

⁷ Ndo mèshèlè a kwor ta ndohi ntawassaʼa. Ndo man dua a gèɗ, a gi ɓèlè bab skwi man a nco te ri na.

⁸ Ndo man a zleki malai, a ɓicè matakwan. Gada ndzoan nengaʼa a ngwoda na va a gèɗ.

⁹ Ndo gumai a da ngècè mpshè ma, a gèɗ man a tsaka na movar a ndo ntawassaʼa.

¹⁰ Dzama ndo ndérdè ndo; a ma nverslè klèng, ndzoan a mbèzl va a ndev na.

¹¹ Ndo man ndav nzuraʼa, ambaha Zhiklè, a gèɗè ma pombai, a gi a mandal bai.

¹² Di Ndo nzi pèc pècèk a cè auda a verzi na azɓai, a gedassama na ma a ndo ncèkèlma.

¹³ Ndo wudar a gaɗa: Marizhèlè a zhè tʼuda, a da ndiyè a ma a civèɗ.

¹⁴ Ma fali ngwozihai nara vèvèɗ nkalay, a ndo man Ndo nzi pèc pècèk a gi ndav a géɗèʼa, a kèlè a pa.

¹⁵ Nrzlè a zhè te ndav gola; aman mènèwèɗ a ndohkoɗauda.

¹⁶ Aman ka keɗa na gèɗ a ndo ntawassa dai, a ngècè skwi mèshèlè. Aman ka va na skwi a ndo mèshèlè, a tétékè a vaʼa.

¹⁷ Fu zlembaɗ, a ka tsena ma ndohi maya! Ndav ngaya da dzodzor maya ga!

¹⁸ Aman ka ɓirèʼa te ndav ngaya, na zhè a tapiɗaf ma ngaya.

¹⁹ I senda ka civèɗ a patsna, a gèɗ man ka da pi ndav a Ndo nzi pèc pècèk.

²⁰ Te va nasa ba i windè ka, i ngra ka, i senda ka,

²¹ a i gada ka ma nzuraʼa, aman ka slaha ka mbeɗa na ma a ndo man a dzhaɗ ka.

²² Ka cèma na skwi a ndo ntawassaʼa, a gèɗ man ka gada ntawassa ɓai! Ka ga na matakwan a mbelawa te kita ɓai!

²³ Te man Ndo nzi pèc pècèk a da nza ta a deɓa, a gedassa ta nshèffè a ndohi man ta gedassa nshèffè mbelaw ndohai.

²⁴ Ka gu mandala a ndo man ndav a va ɓai, a kin mba ma a ndo shèwa ɓai!

²⁵ Man ɓai ka da jèjèr civèɗ na, a ka zeda nshèffè ngaya te pa.

²⁶ Ka kala a ma ndohi man ta gi dua ɓai, ka mba ma a ndohi godèrè ɓai.

²⁷ Aman te deɓaʼa ka slaha ka da pilè ɓai, ta patsama ka dau ngaya tèlè.

²⁸ Ka herdaha kuma babab ngaya a deɓa ɓai!

²⁹ Aman ka rka ndo ngiɗè man a sun maya mizlinè, nengaʼa a slaha a ngi mizlinè te gi bai, a woy mizlinè te gi ndo ambali ɓai.