Proverbes 21 - Ma Zhiklè

¹ Ndav bai te ri Ndo nzi pèc pècèk nara woyam, a ngaldama na ma ara man a woyaʼa.

² Ndo a hur pèc pècèk, civèɗ ga amba; aman Ndo nzi pèc pècèk a wuzhè ndav ndo.

³ Ngi skwi nzuraʼa, nɗèl skwi nzuraʼa, ambaha Ndo nzi pèc pècèk, a fena skwi man nga va na.

⁴ Di nfi va, ngrè gèɗ, malai, a sam ndohi malihai ara skwi nhél sam.

⁵ Ndo man a hér mizlinè, a ngècè skwai; ndo man a vasseda skwai, skwi nengaʼa a gédèsh na.

⁶ Ndo man a ɓicè skwi mèshèlè a ncè-kèlma, a hi a verzi skwi ambalai, a da na ma a mʼmetsai.

⁷ Ndohi ambaɓihiaʼa, shèwa a gedas ta. Ta woy a ta gi skwi zuraʼa azɓai.

⁸ Civèɗ ndo malai nlèwèdè nlèwèdè; a skwi ndo man a gi mali azɓai a dè zuraʼa.

⁹ Dara man nga nza a dala a géɗ man nga nza a gai a ngwoz man a gi ma.

¹⁰ Ndo ambaɓiaʼa a woy skwi man ambaɓai. Nslamagi nengaʼa a ngècè pombi a sam di nengaʼa azɓai.

¹¹ Aman ta ngézhè ndo mpèrè a ndo, deɓi ndo a ngècè maya. Aman ta senda na ndo maya, tsam tsam a cèʼa.

¹² Ndo nzuraʼa a til gi na; malai a gé-dèshè ndo malai.

¹³ Ndo man a fi zlembaɗ a kuɗ ndo ntawassaʼa azɓai, nengaʼa man a da kuɗi ba, ta da fi zlembaɗ a kuɗ nengaʼa azɓai.

¹⁴ Skwi man ka va na ndo a ka pa na a pa a ndav a vna, a mbatsa ndzoan na. Aman ka va na skwi mbalai, ko man a gi ndzoan holholaʼa, a nzai na.

¹⁵ Ndo nzuraʼa a wuffè aman skwi ntila zuraʼa. Aman ndohi ambaɓihiaʼa zlau a dza ta a pa.

¹⁶ Ndo man a zlèk na auda a civèɗ mbelaʼa, a da na ma a mʼmetsai.

¹⁷ Ndo man a woy a ngi wi pèc pècèk, a tèwèsh na. Ndo man a jèjèr zom, a mbar nfèɗè a va, a slaha a ngècè skwi ɓai.

¹⁸ Ndo nzura ka ɓai a pil gèɗ a ndo nzuraʼa, a ndo nzuraʼa a ceda sam nʼnzi ndo nzura ka ɓi a ma.

¹⁹ Dara man nga nza a dala, a géɗ man nga nza a gi a ngwoz man a gi ndzoan, a ngwor ka a hi a ma.

²⁰ Ndo maya, skwi mèshèlè mbelaʼa a zhè te gi na. Aman ndo nrzlaʼa a parda skwi na a hwaɗ a hwaɗ.

²¹ Ndo man a gi skwi zuraʼa, a woy Zhiklè, a ngècè nshèffè, a nwèl va, a njèlè.

²² Ndo maya a gi ngulaʼa te kokwar mbiaʼa, a mbeɗa zlazlar man ta gshè va a vna.

²³ Ndo man a ɓer ma na a nèʼèn na, a ɓer nshèffè na te ri skwi mwuɗitpa.

²⁴ Ndo man a fi va, a paraha ta ndohai, ta baha na mbeɗawai, a fi va holholaʼa.

²⁵ Skwi man ndo wudar a tétékèʼa, a da na ma a mʼmetsai; a woya a nguɓdè deɓa a hi ɓai.

²⁶ Ndo nzura ka ɓai a tétékè skwi pèc pècèk; aman ndo nzuraʼa a vi skwai, ri na mpra.

²⁷ Skwi man ndo ambaɓiaʼa a vi a Zhiklè, a derde Zhiklè a vna, holholaʼa nengaʼa man a va na, a woya a ngwèdèʼa.

²⁸ Ndo malwuɗi ncèkèlma a da zi na; ndo malwuɗi man a rka skwa a di na, a slaha a ngèɗèʼa.

²⁹ Ndo man ambaɓai a gwora di na kusat-kusataʼa; ndo nzuraʼa a nzala civèɗ na.

³⁰ Skwi ngiɗè azɓai, maya ngiɗè azɓai, nshin skwi ngiɗè azɓai, man a slaha a nzlècè a sam Ndo nzi pèc pècèk.

³¹ Ta jèwè plèsh man a ndè var; aman ngi a ngulaʼa, sèi Ndo nzi pèc pècèk a viaʼa.