Proverbes 20 - Ma Zhiklè

¹ Zom a mbèhwali a ka, skwi mɓeslaʼa a pi mverslè a ma ndo. Ko wawa man a kéɗèʼa, a ngècè maya azɓai.

² Aman bai a gi ndzoan, lèmèlèmè ara wud marizhèlè man ta kuɗkaɗai. Ndo man a mbedkoɗa a va, a goko na a géɗ a nshèffè na.

³ Ndo man a kèlè a ma ndohi man ta verslè azɓai, ta nzalaʼa. Ndo man ndav nengaʼa a slèmbèdè, nrzla.

⁴ Ndo wudar a hér mpizhè a zovaɗ genè. Aman ta tsi dau, a ngècè skwa azɓai.

⁵ Maya te ndav ndo, skwi nʼnghedaʼa ara te drav nkalaʼa, aman ndo maya a slaha a nckoɗauda.

⁶ Ndohi kumba ta fi va ta a ndohi mbelaʼa. Aman ndo nlèɓèslèʼa na tema?

⁷ Ndo nzuraʼa a gi mali a civèɗ na azɓai. Mwuffè a sam wudahi nte verzi na!

⁸ Skwi ambaɓiaʼa a nghédè a sam bai man a nza a géɗ sam nʼnzi kita azɓai.

⁹ Nslaha a ngaɗa i tila mali ga, i pana; te mali ga, wa?

¹⁰ Ka pu agoda cèw a ka gu tu nkèshèʼa tu mbia ɓai! Skwi nlivè skwi, ngiɗè arsa; cèw ba a ndara na Ndo nzi pèc pècèk.

¹¹ Maya ndo, man amba, man zuraʼa, a shinè te kra langa.

¹² Zlembaɗ man a tsena skwai, dai man a rka skwai, cèw ba Ndo nzi pèc pècèk a ngau.

¹³ Ka nzhun kumba ɓai, man ɓai a da tawassede ka. Ciɗa di ngaya, a skwi nʼndi a da ngeza ka.

¹⁴ Ndo nshum skwai a gaɗa: Ambaɓai, ambaɓai! Man kal na ma, a ngwèshè.

¹⁵ Ko guro a zhè, ko Suli a zhè, skwi man a fenaʼa, ndo man a sun maya.

¹⁶ Co maslaka ndo man a co skwi ngaya, a mva na ndo ngiɗè; aman a mvu a ngwoz man verzi na tsaɗ, co gi nengaʼa tèlèba!

¹⁷ Movar man ka luhuda nlühüdè a jèn te ma; aman a daʼai nara dodongwas.

¹⁸ Skwi man ka woy a ka giaʼa, dzhoɗo maya a vaʼa, te deɓaʼa a gai. Aman ka gi var, sèi zolom ndo var a zhè.

¹⁹ Ndo man ma na a nzi tʼhi azɓai, a ngredè skwi nʼnghedaʼa. Gar haha ka humda va a vna ɓai!

²⁰ Ndo man a dérɗè bab na a mam na, verzi nengaʼa a zi na.

²¹ Kra man a ndi gi bab na a di tʼuda, a ngècè mpshè ma te deɓaʼa azbai.

²² Ka goɗ a ka gaɗa: i da pela di man a ga ɓai. Zhor te ri Ndo nzi pèc pècèk, a da takaha ka.

²³ Ka pu agoda cèw ɓai a ka gu tu nkè-shèʼa tu mbia ɓai! Skwi nliv skwi ngiɗè arsa, ambaɓai.

²⁴ Ndo nzi pèc pècèk a ngra nga civèɗ. Man ndo a géɗ na, a sunko civèɗ tema?

²⁵ Ndo man a goɗ ma duak duak kata, a nherè ma ɓai, a gi gadda man a kèlèhi a pa.

²⁶ Bai man maya na zhè, a venda ta gèɗ a ndohi ambaɓihiaʼa. A skwi tengaʼa ambaɓiaʼa a ngwoda ta va a gèɗ.

²⁷ Skwi nhél sam Ndo nzi pèc pècèk, nasa Mèzhèɓ ndo, a dè ta a vatasl.

²⁸ Ndav amba a nlèɓèslè ta ɓer bai. Ngi-zuraʼa a salkoɗi sam nʼnzi bi nengaʼa auda.

²⁹ Njèzl va golahai, wuɗi ta. Njèzl va babgihai, mokozlar ta.

³⁰ Vovi mènèwèɗ a ngatsa na maya a ndo ambaɓiaʼa; vovi mènèwèɗ man a dzi tʼhwaɗaʼa.