Proverbes 2 - Ma Zhiklè

¹ Kra ga, aman ka cè ma ga, a ka ɓer ma man i njè ka a gèɗ,

² a ka fi zlembaɗ a ma maya a ka herda ndav ngaya a sam nɗèl skwi zuraʼa;

³ aman a vava ka hèsh maya a ka jhèɗè aman ka ɗèl skwi zuraʼa;

⁴ aman ka woyaʼa ara man ka woy sulai, a ka hèshèʼa ara man ka hèsh mèshèlè,

⁵ te deɓaʼa ka da shin zlau Ndo nzi pèc pècèk, a ka da shin Zhiklè.

⁶ Aman maya a shkè te ri Ndo nzi pèc pècèk; nslebi a nshin skwai a shke auda te ma nengaʼa.

⁷ A mpa ta skwi mʼmbel ta a hai a ndohi nzuraʼa, a ndohi man mali ta azɓai, nara gambar man ta nzi a diaʼa.

⁸ A ɓir civèɗ ndohi nzuraʼa, a pi di a civèɗ ndohi nzuraʼa, a pi di a civèɗ ɓèlèlihi na.

⁹ Te deɓaʼa ka da sun ngi-zuraʼa a mbèzlè kita zuraʼa, skwi zuraʼa tsarayaʼa, civèɗ man amba tèlèba;

¹⁰ te man maya a dè a ndav ngaya, nshin skwai a wuffèdè ndav ngaya.

¹¹ Nhér maya a da ɓer ka, nshin nɗèl skwi zuraʼa a da takaha ka:

¹² a ngazlka ka a deɓa a civèɗ man ambaɓai, a sam ndo man a hér skwi nzuraʼa ka ɓai,

¹³ a sam ndohi man ta jèkeda civèɗ nzuraʼa a ta dè a civèɗ ruva,

¹⁴ man ta wuffè a ngi skwi man ambaɓai, ta ngwèshè a gèɗ skwi man ambaɓai, man zuraʼa ka ɓai,

¹⁵ a ta beza zlawa a ta lèwèdè nlèwèɗè a ta zlak ta.

¹⁶ A ɓir ka zaʼa a sam mphöme ngwoz, a sam ngwoz nte deɓa man a huɗokwa ka ma a hai,

¹⁷ man a jèkeda baki gol na; nderzlè-ma Zhiklè nengaʼa mpca na a gèɗ.

¹⁸ Sam nʼnzi nengaʼa a da na ma a mʼmetsai; civèɗ nengaʼa a da na ma a sam man nshèffè az a pa ɓai.

¹⁹ Ta tèlèba man ta dè a sam nengaʼa, ta shkè a deɓa te pa azɓai; ta ngècè civèɗ nshèffè azɓai.

²⁰ Gar haha sèi ka dè a ka bizhè a civèɗ ndohi man amba, a ka jèjèr civèɗ ndohi nzuraʼa,

²¹ te man ndohi nzuraʼa ta da nzi a géɗ herkeda, a ndohi man mali ta azɓai ta nzi a pa.

²² Ndohi ambaɓihiaʼa ta nzi azɓai a géɗ herkeda; ndohi man ta woy Zhiklè ɓai, ta gedas ta.