Proverbes 19 - Ma Zhiklè

¹ Dara ndo ntawassaʼa man a dè zuraʼa, a géɗ ndo mèshèlè man ma nengaʼa ndzaraʼa.

² Ndo man maya na azɓai, ambaɓai; a ndo man a vèshè ndè, a zlèk na.

³ Nrzlè a zlèkèdè ndo, te deɓaʼa a gi ndav a géɗ Ndo nzi pèc pècèk.

⁴ Skwi mèshèlè a ɓica ka mandalahi kumba. Ndo ntawassaʼa, mandal nengaʼa a kwolaʼa.

⁵ Ndo malwuɗi ncèkèlma a ngècè kita na. Ndo ncèkèlma a mbelè azɓai, ta gshèʼa.

⁶ Ndohi kumba man ta da na ma a ndo mbiaʼa. Ko wawa a gi mandala a ndo man a mvrè.

⁷ Aman kramamhi ndo ntawassaʼa tè-lèba ta gi shèwa a vna, azɓa mandalahi nengaʼa dè! A woya a bid ta, tʼasaɓai.

⁸ Ndo man a woy maya, a woy nshèffè na. Ndo man a hér maya, a ngècè skwi manam.

⁹ Ndo malwuɗi ncèkèlma a ngècè kita na. Ndo nhèdè ncèkèlma a gédèsh na.

¹⁰ Mwèl va, skwi ndo nrzlaʼa ka ɓai. Lèmèlèmè ɓèlè a nzi a géɗ bihi azɓai.

¹¹ Ndo man a gi ndav tsam tsam azɓai a ngredè maya na auda. Ndo man a fa na kwa a gèɗ a malai a ngredè nʼnjèl na auda.

¹² Aman bi a gi ndzoan, nara kuɗ ma-rizhelè; mwoy-ndo nengaʼa nara minmèn a kuza.

¹³ Man kra nguraʼa nrzla, Woba bab na. A ngwoz man a gi ma, nara iyam man a tkwa ka te vavaz.

¹⁴ Gai a skwi gai ka slaha ka ngècè a skwi nʼndi gi bab ngaya; aman ngwoz man maya na zhè ka ngècè sèi te ri Ndo nzi pèc pècèk.

¹⁵ Wudar a ruɓ ka a hai; ndo man a gi mizlinè azɓai, mi a da kéɗèʼa.

¹⁶ Ndo man a jèjèr ma kita, a ɓer nshèffè na. Ndo man a kwolaʼa, a zi na.

¹⁷ Ndo man ndo ntawassaʼa a sia te va, a vi skwi a Zhiklè. A nengaʼa a da pela na skwi man a gu amba a deɓa.

¹⁸ Nguzo kra ngaya, man amba a ngézhè dai, ga a shèl na!

¹⁹ Ndo man ndav a va, ndokoɗko ria, auda; man nda ndakaɗa ria ɓai, a dè a ma ma a vna.

²⁰ Fu zlembaɗ man ta ngatsa ka maya. Co man ta senda ka! Te deɓaʼa ka ndi a ndo maya!

²¹ Ndo a hér skwi man a woya a ngia kumba; aman sèi skwi man Ndo nzi pèc pècèk a woyaʼa, a gai.

²² Pombi ndo, man a woy ndo, a ndo ntawassaʼa a fena ndo ncèkèlma.

²³ Zlau Ndo nzi pèc pècèk a de ka a sam nshèffè. Ka mènèhi a hwaɗ ngezaʼa, ka gi zlau skwi ambaɓia azɓai.

²⁴ Ndo wudar a tèr ri a gandaf, wudar a dza na a nfi a ma.

²⁵ Aman ka tsi ndo mpèrè a ndo, deɓi ndo a gi maya. Aman ka ngatsa na maya a ndo maya, a shindè maya.

²⁶ Ndo man a keslèhdè skwi bab na, a kwola mam na, nasa tsokoɗof kra, kra mphomaʼa.

²⁷ Kra ga, tsenaʼa, man ta ngez ka; jè-keda nbizhè zlawa, dzodzor ma maya!

²⁸ Ndo malwuɗi ambalai a ngwèshe a géɗ ma kita. Malai a hakaɗauda te va ndohi ndérɗè Zhiklè.

²⁹ Mènèwèd mɓuto tʼhai a géɗ ndohi ngwossa ma Zhiklè. Gada nfa tʼhai a géɗ ndohi nrzlaʼa.