Proverbes 17 - Ma Zhiklè

¹ Dara nga nda lolom movar a gumai, a géɗ man nga nda zluèɗ te ngolala a sam ndzoan.

² Ɓèlè man maya na zhè a da gi bai a géɗ kra ngwai man a gi falai, a da ndi skwi gai te va kramamhai.

³ Ara gezla a wèsl züdo a guro, lèmèlèmè arsa Ndo nzi pèc pècèk a jkeda ndav ndohai.

⁴ Ndo man a gi skwi man ambaɓai, a pi di a ndo man a gèɗè ma ambaɓiaʼa, a fi zlembaɗ a ncèkèlma.

⁵ Ndo man a dèrɗè ndo ntawassaʼa, a dèrɗè ndo ngau; ndo man a ngwèshè a géɗ matakwan ndo, a ngècè kita na.

⁶ Wud wudahi ta, a sam babgihai nara skwi mpèdè gèɗ. Skwi man wudahi ta fi va a vna, babhi tengaʼa.

⁷ Ma mbelaʼa a shkè auda te ma ndo fali azɓai. Holholaʼa ndo mbelaʼa ncèkèlma a shkè auda te ma nengaʼa azɓi genè.

⁸ Ndo man a vi skwi mbelaʼa, a ngècè skwi man a fenaʼa. A sam tèlèba man a dè, manam a gidèʼa.

⁹ Ndo man a fa na kwa a gèɗ a skwi man ambaɓai, a hèsh mandala; aman ndo man ma a nzi a gèɗ na azɓai, a ngelè gèɗ mandala.

¹⁰ Aman ka ngatsa na maya a ndo man a hér maya, a dè a ndav na, a fena ndo nrzlaʼa man ka tsi a gada sak 100.

¹¹ Ndo ambaɓiaʼa a woya a nslambada na gèɗ a ndo genè; kita mwuɗitpa a da ga na.

¹² Dara man nga zli gèɗ a kokoya man ta cama na kra na, a géɗ man nga zli gèɗ a ndo nrzlaʼa man maya na azɓai.

¹³ Ndo man a pil skwi man amba a skwi man ambaɓai, matakwan a shkè auda te gi nengaʼa azɓai.

¹⁴ Ndo man a hinè mbèzl va, nara ndo man a mbeɗkoɗi iyam nʼngaʼa. Gar haha, ga a hinèʼa, menda va ngaya a deɓa!

¹⁵ Ndo man a pra ndo malai, a ga na kita a gèɗ ndo man mali na azɓai, cèw ba hori a sam Ndo nzi pèc pècèk.

¹⁶ Ndo nrzlaʼa a gi a Suli na mè? A da shum maya a vna dè? Te man maya na azɓai.

¹⁷ Mandal nzuraʼa a woy ka pèc pècèk; aman ka te matakwan, nara kramam ngaya.

¹⁸ Ndo man a nco skwi man nslamagi na a bezda na a rai, ndo nrzlaʼa.

¹⁹ Ndo man a wuffè a géɗ ndzoan, mali ambaha. Ndo man a gi skwi man a fena wuɗina, a gèdèsh na.

²⁰ Ndo man a ngwèdè ndo, a ngècè manam azɓai. Ndo ncèkèlma a kèlè a matakwan.

²¹ Ndo man a yi kra nrzlaʼa, a ga na matakwan a va na. Bab kra man kra na nrzlaʼa, a ngècè mwuffe azɓai.

²² Mwuffe te ndav, nara madzaf mbelaʼa. Ndav man a mbeɗè, a gwor ka hai.

²³ Ndo ambaɓiaʼa a cè skwi mbalai man ta va na a metsar, aman a ngwèdè civèɗ kita.

²⁴ Ndo man maya na zhè, a pi di a maya; ndo nrzlaʼa a peda di na aussa a verzi herkeda.

²⁵ Kra nrzlaʼa, bab nengaʼa a kuɗi a géɗèʼa, a mam nengaʼa a lèyèʼa.

²⁶ Aman ka ga na ndzoan a ndo nzuraʼa, nasa ambaɓai. Aman ka tsi ndohi mbelaʼa, kita a zhè.

²⁷ Ndo man maya na zhè, a tsi tsaval ambali azɓai. Ndo man a gsa ndav na, nengaʼa ndo man a sun maya.

²⁸ Nrzla ma ba, aman a nza tètè, ta rka ara ndo maya. A ndo man a winè ma na azɓai, ta rka ara ndo man a sun maya.