Proverbes 16 - Ma Zhiklè

¹ Ndo a hér skwi te gèɗ na; aman Ndo nzi pèc pècèk a ngra na, ara man a gèɗèʼa.

² Ndohi ta hur a ta gaɗa civèɗ nga ntila ma; aman Ndo nzi pèc pècèk a ɗèl ndav.

³ Feda mizlinè tèlèba a ri Ndo nzi pèc pècèk, a skwi man ka huro a da gi amba.

⁴ Ndo nzi pèc pècèk a ngu skwi tèlèba, ngiɗè a ngima na, ngiɗè a ngima na, ko ndo ambaɓiaʼa ba, ha a da ndikè a sam matakwan.

⁵ Ndo man a fi va, a ndara na Ndo nzi pèc pècèk. A vava, a da ngècè kita na.

⁶ A pombai, a gumai, mali a prèʼa, a ndo man a gi zlau Ndo nzi pèc pècèk a jèkeda skwi man ambaɓai.

⁷ Aman Ndo nzi pèc pècèk a wuffè a gèɗ civèɗ ndo ngiɗè, a gi aman ko mayamhi nengaʼa ta tsi gumi a vna.

⁸ Dara man nga ngots skwi kètè a ngi-zuraʼa, a géɗ man nga ngots skwi kumba tʼhwaɗ malai.

⁹ Ndav ndo a hèsh civèɗ na; aman sèi Ndo nzi pèc pècèk a pa na sak a civèɗ man a dè a pa.

¹⁰ Aman ma Zhiklè a zhè te ma bai, a pats man a bèzlè kita, a jèr kita azɓai.

¹¹ Skwi nlivè skwai, gandaf man a livè skwi a vna zuraʼa, Zhiklè a ngau, tèlèba.

¹² Ngi skwi man ambaɓai, bihi ta gi shèwa a pa; sam nʼnzi bai a ngècè wuɗai sèi te ngi-zuraʼa.

¹³ Ma nzuraʼa, ambaha bai; ndo man a gèɗè ma nzuraʼa, bi a woyaʼa.

¹⁴ Ndzoan bai a kelawa ka mʼmetsi a daʼai; aman ndo maya a slaha a mbatsedaha ndzoan nengaʼa.

¹⁵ Aman di bai nciɗa, nshèffè a menkaɗ na a pa, pombi nengaʼa ara iyam mbelèkwai.

¹⁶ Dara nga ngots maya, a gèɗ man nga ngots guro; dara man nga sun skwai, a géɗ man nga ngècè sulai.

¹⁷ Ndohi nzuraʼa ta bezli va ta auda a sam skwi man ambaɓai; ndo man a wèr civèɗ na, a ɓer nshèffè na.

¹⁸ Ndo nfi va, a fa va na di ba, a di a gédèsh na. Ndo njégèr va a dzagara va na di ba, a di a kèlnahai.

¹⁹ Dara man nga manda gèɗ a hai a nda mbelawahai, a géɗ man nga kezla skwi man ndohi nfi va ta ɓüco.

²⁰ Ndo man a fi gèɗ a ma Ndo nzi pèc pècèk, manam a va. Mwuffe a sam ndo man a pi ndav a Ndo nzi pèc pècèk!

²¹ Ndo maya man a sun nɗèl skwai, ta baha na ndo maya; ma mbelaʼa a senda ta ndohi a ma ma.

²² Maya te gèɗ ndo, nara nlèlè nshèffè; nrzlè ndohi nrzlaʼa, nasa kita ta.

²³ Maya te gèɗ ndo a shkè auda te ma, a ma maya man a gèɗèʼa, a senda ta ndohi a ma ma.

²⁴ Ma mbelaʼa nara dazli vongwom, a gi jineslèʼa a ndav, a tsal ka te va.

²⁵ Civèɗ tsaɗ tsaɗ: ndohi ta hur a ta gaɗa civèɗ nzuraʼa, aman te deɓaʼa a da na ma a mʼmetsai.

²⁶ Ndo man mi a ga na, a wèsl va a mizline, mi a daʼa a mizlinè.

²⁷ Ndo falai a ngi ɓalai a hi a va na, ngèɗè nengaʼa worworaʼa ara vogwa.

²⁸ Ndo nʼngwèdè ndo a pi gèɗ a va ndo, a ndo man a gi tiflè a kezla ta gèɗ a mandalahai.

²⁹ Ndo shèwa a pi nslamagi nengaʼa a wai, a bidèʼa a civèɗ man ambaɓai.

³⁰ Ndo man a pi di shèwaʼa, a hér nʼngwèdè ndo; ndo man a tèɓèc ma, a ngau malai.

³¹ Mokozlar te gèɗ ndo, mpèɗè gèɗ mbelaʼa, ta ngècèʼa a civèɗ ngi-zuraʼa.

³² Ndo man a gi ndav tsam tsam azɓai, a fena ngul-ndo; a ndo man a gsa va na, a fena ndo ndüm kokwar.

³³ Ta gu jimèr tʼhwaɗ rai, a Ndo nzi pèc pècèk a ntilko maʼa tèlèba.