Proverbes 14 - Ma Zhiklè

¹ Maya a rèm gi na. Nrzlè a mbeɗa gi na a ri na.

² Ndo man a dè a civèɗ zuraʼa, a gi zlau Ndo nzi pèc pècèk; ndo man a beza zlawa, a dérɗèʼa.

³ Ma ndo nrzlaʼa nara mènèwèɗ man a ndèhè va na a vna. Ndohi maya, tapiɗaf ma tengaʼa a ɓir ta.

⁴ A sam man zlè azɓai, dau a te wov ɓai; aman ka ngècè skwi kumba te ri wuɗi zlè.

⁵ Ndo malwuɗi nzuraʼa a cèkèlma azɓai; aman ndo malwuɗi man ambaɓai a cèkèl ma.

⁶ Ndo mpèrè a ndo a hèsh maya, aman a ngècè azɓai; aman a sam ndo maya, nshin skwai wuɗi a te pa ɓai.

⁷ Bezla na va ngaya auda a sam ndo nrzlaʼa, man ɓai ka sun nɗèl ndo man a gèɗè ma maya ɓai.

⁸ Ndo man a hér maya, maya nengaʼa a ngredè auda te man a gi maya a civèɗ na; aman nrzlè ndohi nrzlaʼa a zlèkèdè ndo.

⁹ Ndohi nrzlaʼa ta til mali ta azɓai; aman ndohi nzuraʼa ta tsi gumi a va ta.

¹⁰ Ndav a sun skwi man a dza na; aman ndo ngiɗè a slaha a ngècè mwuffe nengaʼa azɓai.

¹¹ Gi ndohi ambaɓihiaʼa a da gédèsh na; gi ndohi nzuraʼa a da nzi dezaʼa.

¹² Civèɗ tsaɗ tsaɗ: ndohi ta hur a ta gaɗa civèɗ nzuraʼa, aman te deɓaʼa a da na ma a mʼmetsai.

¹³ Ko ngwèshè te ma, ngwèshè man a deɓa genè; mwuffe a ngwode na a kuɗa.

¹⁴ Ndo man a beza zlawa, a ngeza te riaʼa; aman ndo man amba a ngézhè a skwi man amba.

¹⁵ Deɓi ndo a cè a ndav na ko mèmè; aman ndo a maya te gèɗ a ngel di a sam man a mbècè a pa.

¹⁶ Ndo maya a gi zlau Zhiklè, a ngwoda na deɓa a malai; aman ndo nrzla a kala na va skwi genè cilèv-cilèvaʼa.

¹⁷ Ndo man ndav a dza na tsam-tsam, a yèk na; ndo man a hér maya a slaha skwi kumba.

¹⁸ Deɓi ndohai ta ngècè skwi nrzlè; a ndohi maya ta pèdè gèɗ a maya ta.

¹⁹ Ndohi ambaɓihiaʼa sèi ta gürɓahai a sam ndohi man amba; a ndohi ambaɓihiaʼa ta gürɓahi a ntamagi ndohi nzuraʼa.

²⁰ Ndo ntawassaʼa ambaha ndo ɓai, ko a nslamagi nengaʼa; aman ndo mèshèlè, ndohi na a zhè kumba.

²¹ Ndo man a kwola nslamagi na, a gi malai; aman mwuffe a sam ndo man mbelaw ndohai ta sia te va!

²² Ndohi man ta hér skwi ambaɓiaʼa, ta zlak ta azɓi ɗè? Ndohi man ta hér skwi man amba, ta ngècè pombai a gumi ka bi dè?

²³ Te mizlinè mwuɗitpa tèlèba, ta ngècè skwi ntulè te pa kumba; aman te tsaval ma ambalai skwi a zi na.

²⁴ Nshin maya te gèɗ, mpèɗè gèɗ ndohi maya; nrzlè, mpèɗè gèɗ ndohi nrzlaʼa.

²⁵ Ndo malwuɗi nzuraʼa a mbel nshèffê ndohai; aman ndo man a cèkèlma a gi ri a géɗ ndo.

²⁶ Ndo man a gi zlau Ndo nzi pèc pècèk, a nʼngots skwi man a slaha a ngshè va a vna zuraʼa, sam nlèaʼa, ko a sam wudahi na ba.

²⁷ Zlau Ndo nzi pèc pècèk, nara nlèlè iyam nshèffè. A cèma na skwi nkéɗè ndo auda te ri a mʼmetsai.

²⁸ Aman ndohi kumba, a gi a nʼnjèl bai; aman ndohi azɓai, ko bai a slaha a ngi bi ɓai.

²⁹ Ndo man a gi ndav tsam tsam azɓai, maya na zhè kumba; aman ndo man a gi ndav ɗekeɗekaʼa, a gidè nrzlè na auda.

³⁰ Aman gumi te ndav, a til nshèffè te va tèlèba; ntétékè nara mblè gurdzo man a ndi vatasl.

³¹ Ndo man a gi shèwa a mbelaw ndo, a dérɗè ndo ngau; aman ndo man ndo ntawassaʼa a sia te va, a slébèrdè ndo ngau.

³² Ndo ambaɓiaʼa, shèwa nengaʼa a kaldahai; aman ndo nzuraʼa a ngècè sam na nlèaʼa, ko te mʼmetsai.

³³ Ndo maya, sam nʼnzi maya a zhè te ndav na; aman te ndav ndohi nrzlaʼa, nʼazɓai.

³⁴ Ngi-zuraʼa a va na nʼnjèlè a kokwar-bai; aman malai, skwi mphomda ta ndohi kokwar.

³⁵ Ɓèl man a sun maya, ambaha bi na, aman a géɗ nengaʼa man a pa na hori a dai, a gi ndav.