Proverbes 13 - Ma Zhiklè

¹ Kra man maya na zhè, a cè ma bab na man a slebda na; aman ndo ambaɓiaʼa a fi ma a ndav azɓai.

² Ndo nzuraʼa a ndi nyi ngi-zuraʼa nengaʼa; ndo ambaɓiaʼa a woya a ngi skwi a wuɗai.

³ Ndo man a gi maya a géɗ ma na, a ɓer nshèffè na; ndo man dzuwi a nza na a ma azɓai, a gédèsh na.

⁴ Ndo wudar a tétékè skwi kumba, a tétékè ambalai; aman ndohi nzuraʼa ta woy skwai, a ta ngècè a vata ba.

⁵ Ndo nzuraʼa a gi shèwa a ncèkèlma; ndo ambaɓiaʼa a gi skwi horai, skwi mphomaʼa.

⁶ Ngi-zuraʼa a ɓir ndo nzuraʼa a civèɗ nshèffè nengaʼa; aman malai a gedassa ndo ambaɓiaʼa.

⁷ Ndo ngiɗè a fi va na a ndo mèshèlè, ko skwi na azɓi ba; ndo ngiɗè a fi va na a ndo ntawassaʼa, ko skwi na a zhè kumba.

⁸ Skwi mpil gèɗ nshèffè, nasa skwi mèshèlè ndo; aman ndo ntawassaʼa a fi ma ndo ngiɗè a ndav azɓai.

⁹ Skwi nhél sam ndohi nzuraʼa a hél sam ndèy-ndèyaʼa; pitirla ndohi ambaɓihiaʼa a mbats na.

¹⁰ Ndo nfi va a poko ta gèɗ auda a ndohai, a ta bèzi va; aman maya a zhe a sam ndohi man ta cè ma ndo.

¹¹ Skwi mèshèlè man ta ngots pats staɗ, a ndevaha va na. Ndo man a hoyo nhèyè, a ngatsa na va.

¹² Ndo man skwa a zhera na di ɓai, a kuɗi te ndav na; aman ndo man a ngots skwi man a zhoro, nara wof nshèffè.

¹³ Ndo man a kwola ma ndo ngiɗè, a zi na; aman ndo man a gi zlau ma nkwèr ndohai, a nzai na.

¹⁴ Njè-ma ndo maya nara nlèlè iyam nshèffè, a mbelka nga auda te gadda mʼmetsai.

¹⁵ Ndo man mèzhèɓ te ndav, a ngècè pombai; aman civèɗ ndohi malihai a zi na.

¹⁶ Ndo man maya na zhè, a hér skwi a hai; aman ndo nrzlaʼa a géɗè nrzlè na auda.

¹⁷ Ndo sak man a gi shèwa a ga ta matakwan a ndohai: aman ndo sak nlèɓèslèa a takaha ndo.

¹⁸ Ndo man a kwola ma ndo ngiɗè man a ngatsa na maya, a tèwèsh na, a ngècè hori a dai; aman ndo man a fi gèɗ, man ta da ngézhèʼa, ta da slébèrdèʼa.

¹⁹ Skwi man nga zhoro, a nga ngotso, a wuffedè ndav nga; aman ndohi ambaɓihiaʼa ta woy a ta jèkeda skwi ambaɓia ɓai.

²⁰ Gsa va a ndohi maya, a ka ngècè maya. Ndo man a gshè va a ndohi nrzlaʼa a da ngwèdè na a ndo ambaɓiaʼa.

²¹ Matakwan a ndzaraha ta ndohi malihai; aman mwuffe, skwi ntul ndohi nzuraʼa.

²² Ndo man amba, wud wudahi na ta ngècè skwi nʼndi gi a sam na; skwi mèshèlè ndo malai, ndohi nzuraʼa ta da ndiaʼa.

²³ Ndo man a gi skwi man amba, a ngècè skwi nʼndi a ma ma; aman ndo nzuraʼa ka ɓai, a zi na a nasa nasa.

²⁴ Ndo man a ngheda mènèwèɗ, a woy kra na ɓai. Ndo man a woy kra na, a ndè-hèʼa te nkèshèa.

²⁵ Ndo nzuraʼa a ndi skwai, ha a ngeza na; hwaɗ ndohi ambaɓihiaʼa tèslè a deɓa.