Proverbes 12 - Ma Zhiklè

¹ Ndo man a cè njè-ma ndohai, a shin skwai; ndo man ambaha ɓai, aman ta ngatsa na maya, ndo nrzlaʼa.

² Ndo man amba a ngècè pombai a sam Ndo nzi pèc pècèk; aman ndo nʼngwèdè ndo, a phomda.

³ Ngi skwi man ambaɓai a va na wuɗi a ndo azɓai; aman zluzlor ndohi nzuraʼa a ngi a hai.

⁴ Ngwoz man amba ndzuwaɗaɗaʼa, skwi mpèɗè gèɗ baki na; tsokoɗof ngwoz, nara mblè gurdzo man a kala ka a va.

⁵ Ndohi nzuraʼa ta hér skwi man amba; ndohi nzuraʼa ka bai ta hér ncèkèl-ma.

⁶ Ndohi ambaɓihiaʼa ta guvè ndo; aman ndohi nzuraʼa ta gèɗè ma mʼmbel ndo.

⁷ Ndohi ambaɓihiaʼa ta wush ta hai, a ta bazl ta; aman gi ndohi nzuraʼa a nzi dai.

⁸ Ta ɗèl ndo te maya nengaʼa man amba; aman ndo man ndav nengaʼa nzura ka ɓai, ta dérɗèʼa.

⁹ Dara man nga nzi ara matakahiaʼa ngiɗè, a nga gi mizlinè nga, a géɗ man nga fi va nga a ndo mbiaʼa, a skwi gi nga a slra ɓai.

¹⁰ Ndo nzuraʼa a sun nwèr di skwi kudom na; aman ndo ambaɓiaʼa, skwi a sia te va azɓai.

¹¹ Ndo man a pizhè gi dau na, a ngècè movar na; aman ndo man a jèjèr skwi ambalai, mi a da kéɗèʼa.

¹² Ndo ambaɓiaʼa a hèsh maya ambaɓiaʼa; aman zluzlor ndo nzuraʼa a tsai a yi skwi man amba.

¹³ Ndo ambaɓiaʼa, mali man a shkè auda te ma nengaʼa a ngwoda na va a gèɗ; aman ndo nzuraʼa a mbel na auda te matakwan.

¹⁴ A géɗ ma man ndo a gèɗèʼa, a ngé-zhè a skwi man amba. Ko wawa a ngècè skwi ntul na te di skwi man ri nengaʼa a gau.

¹⁵ Ndo nrzlaʼa a hur a ngaɗa civèɗ ga zuraʼa; aman ndo man a fi gèɗ a ma man ta njè na, nengaʼa ndo maya.

¹⁶ Ndo man a gi ndav, a ndav nengaʼa a senkaɗauda a nasa nasa, nrzla. Ndo man maya na zhè, a fa na kwa a gèɗ a ndzoan ndohai.

¹⁷ Ndo man a gèɗè ma nzuraʼa, a cko skwi nzuraʼa auda; aman ndo malwuɗi ncèkèlma a cko ncèkèlma auda.

¹⁸ Ndo ngiɗè a tsi tsaval, a kèlè a ndav a ndo; aman ma ndohi maya a gi a ndav jinèslèʼa.

¹⁹ Nèʼèn man a gèɗè skwi nzuraʼa, a nzi a mèdèp. Nèʼèn ncèkèlma a ndev na a nasa nasa.

²⁰ Ndohi man ta hér skwi man ambaɓai, maya nʼngwèdè ndo te ndav ta; aman tengaʼa man ta ngra na maya mbelaʼa a ndo, ta ngècè mwuffe.

²¹ Ndo nzuraʼa a lèlèyè azɓai; aman ndohi ambaɓihiaʼa, matakwan a ndiv a sam ta azɓai.

²² Ndohi ncèkèlma ta ndara na Ndo nzi pèc pècèk; aman tengaʼa man ta gi zuraʼa, ta ambaha.

²³ Ndo man maya na zhè, a cückwa ma maya na; ndohi man maya ta azɓai, ta ngreda nrzlè tengaʼa auda.

²⁴ Ndohi man ta wosla te mizlinè, ta gi bai; aman ndohi man ta gi wudar, sèi ta da gi mizlinè ɓèlè.

²⁵ Nlèyè te ndav a hohoya ndo; ma nhènèkèʼa a manda na ndav a hai.

²⁶ Ndo nzuraʼa a ngra na civèɗ zuraʼa a mandal na; civèɗ ndohi ambaɓihiaʼa a zlakede ta.

²⁷ Ndo wudar a ta zluèɗ na azɓai; ndo mwosla te mizlinè a ngècè skwi mbelaʼa.

²⁸ Ka ngècè nshèffè a civèɗ ngi-zuraʼa; civèɗ ndo nʼngwèdè ndo a da na ma a mʼmetsai.