Proverbes 11 - Ma Zhiklè

¹ Ngi rai te nlivè skwai a ndara na Ndo nzi pèc pècèk; aman nlivè skwi zuraʼa ambaha.

² Ndo nfi va, hori a jèjèrèʼa te deɓa; aman ndohi man ta manda gèɗ a hai, maya a zhè a sam ta.

³ Ndohi nzuraʼa, skwi nzuraʼa a de ta; ndohi malihai, skwi ambaɓiaʼa a zede ta.

⁴ Skwi mèshèlè a takaha ka a pats ndzoan azɓai; aman ngi-zuraʼa a mbelka ka auda te mʼmetsai.

⁵ Ngi-zuraʼa a tila ta civèɗ a ndohi nzuraʼa; ndo ambaɓiaʼa a kèlèhi a géɗ shèwa na.

⁶ Ngi-zuraʼa a mbel ta ndohi nzuraʼa; aman ndohi malihai, ntétékè tengaʼa a dzaw ta.

⁷ Aman ndo ambaɓiaʼa a mets na, skwi man a zhor te ndav na, klèng ma; skwi mèshèlè man a ngso ndav a vna, a takaha azɓai.

⁸ Ndo nzuraʼa a mbélè auda te ri zlau mʼmetsai; ndo ambaɓiaʼa a dè mènè a di man a na.

⁹ Nderkèzhè ndo a gi ma a géɗ nslamagi na, a woy a ngédèshèʼa; a ndohi maya ta mbelaʼa a géɗ maya ta.

¹⁰ Kokwar tèlèba a wuffè a géɗ manam ndohi nzuraʼa; a ta ngwèshè, aman ndohi ambaɓihiaʼa ta zi ta.

¹¹ Kokwar a ngècè nʼnjèlè a géɗ mpshè ma ndohi nzuraʼa; aman a gedas na a géɗ ma ndohi ambaɓihiaʼa.

¹² Ndo man maya na azɓai, a dérɗè ndo na; aman ndo man maya na zhè, a nʼnza tètèʼa.

¹³ Ndo nhèdè ma a ngreda skwi nʼnghedaʼa auda; ndo man a sun maya a nʼngheda a ndav na.

¹⁴ Ndohi man ta ngatsa ndohi ncè te ma ɓai, ta kèlèhai; aman ta ngots ndohi ncèmma kumba, ta nza.

¹⁵ Ndo man a bezda na skwi nengaʼa a ri a ndo ngiɗè, a da ngècè matakwan te pa; ndo man a gi aranta azɓai, skwa a ga na azɓai.

¹⁶ Ngwoz nlèɓèslèʼa a ngècè nʼnjèlè; ndohi man ri ta mwosla, ta ngècè skwi mèshèlè.

¹⁷ Ndo man ndo a sia te va, a ga na skwi man ambaha a va na. Ndo man ndav nengaʼa ngwora, a gedassa va na.

¹⁸ Ndo ambaɓiaʼa a gi skwi ambaɓiaʼa; aman ndo man a zleki ngi-zuraʼa, a da ɓicè skwi te deɓaʼa zuraʼa.

¹⁹ Ndo man a nzi taraʼa te ngi-zuraʼa, a dè a sam nshèffè; ndo man a hi a verzi skwi man ambaɓai, a da na ma a mʼmetsai.

²⁰ Tengaʼa man ta ngwèdè ndo, ta ndara na Ndo nzi pèc pècèk; tengaʼa man ta dè a civèɗ tengaʼa zuraʼa, ta ambaha.

²¹ A vava! Ndo ambaɓiaʼa a ngècè kita na; verzi ndohi nzuraʼa ta mbel ta.

²² Ara dasi guro tʼhtsan wadala, nasa ngwoz man amba te dai, man maya na azɓai.

²³ Skwi man ndohi nzuraʼa ta woyaʼa, sèi skwi man amba; a skwi man ndohi ambaɓihiaʼa ta zhèrèʼa, kita a ndzoan.

²⁴ Ndo ngiɗè a vi skwi kumba, a skwi nengaʼa a zlèzlèmè a ma ma; ndo ngiɗè a gi ndrè, a tèwèsh na a ma ma.

²⁵ Ndo man a pshè ma, a ngècè skwi kumba; ndo man a vrè, ta vrè a nengaʼa.

²⁶ Ndo man a hèdè dau a ndo, ndohi ta derɗaʼa; aman ndo man a viaʼa, ta shida na gèɗ.

²⁷ Ndo man a woy skwi man amba, a ngècè pombai a sam Ndo nzi pèc pècèk; ndo man a woy skwi ambaɓiaʼa, skwi ambaɓiaʼa a ngwoda na va a gèɗ.

²⁸ Ndo man a pi ndav na a skwi mèshèlè nengaʼa, a kèlèhai; aman ndohi nzuraʼa ta ɗai ara mandai.

²⁹ Ndo man a dzakaɓa gi na, skwi nʼndi gi a te gi na ɓai, kozlar a ha na hwaɗ; ndo nrzlaʼa a gi a ɓèl ndo maya.

³⁰ Nyi skwi man ndo nzuraʼa a giaʼa, nara wof nshèffè; a ndo maya a ngècè ndohai.

³¹ Aman ta pela na ndo nzuraʼa a géɗ skwi man a ngau a géɗ herkeda, holholaʼa ndo ambaɓiaʼa a ndo malai.