Proverbes 10 - Ma Zhiklè

¹ Kra man maya na zhè, bab gaʼa a wuffè a géɗèʼa; kra nrzlaʼa, mam nengaʼa a kuɗi a géɗèʼa.

² Skwi mèshèlè man ka co a metsar, a takaha ka azɓai; aman ngi skwi zuraʼa a mbelka ka auda te mʼmetsai.

³ Ndo nzi pèc pècèk a gi aman ndo nzuraʼa a tidè a mi azɓai; aman a zukda ntétékè man a ndo ambaɓiaʼa a deɓa.

⁴ Ri man mwosl te mizlinè ɓai, a tawassede ka; ri ndohi mwosla a walde ta.

⁵ Ndo man a ɓicè skwi a zovaɗ, maya na zhè; ndo man a nzhun a pats mɓiceskwai, hori a dai.

⁶ Mpshè ma a zhè a géɗ ndo nzuraʼa; aman ma wuɗai a shkè auda te ma ndohi ambaɓihiaʼa.

⁷ Ndo nzuraʼa a pca ta a gèɗ a ndohi azɓai, ta slébèrdè nzlembaɗ nengaʼa; nzlembaɗ ndo ambaɓiaʼa a gédèsh na.

⁸ Ndo man maya na zhè, a jèjèr ma nkwèrèʼa; ndo ntsi tsaval ambalai a kèlèhai.

⁹ Ndo man a gi mali azɓai, a dè zuraʼa; ndo man a dzara civèɗ na, ta gshè a géɗèʼa.

¹⁰ Ndo man a rèɓècè dai, a kuɗofama na ndav a ndo; ndo ntsi tsaval ambalai, a kèlèhai.

¹¹ Ma ndohi nzuraʼa nara nlèlè iyam nshèffè; aman ma wuɗai a shkè auda te ma ndohi ambaɓihiaʼa.

¹² Shèwa a ngwèd na a mbèzl va; mwoy-ndo a pizlèda mali a pa tèlèba.

¹³ Maya a zhè te ma ndohi man ta sun skwai; aman ndo nrzlaʼa a dè a gada a deɓa.

¹⁴ Ndohi maya ta cückwa ma maya; aman ma ndohi nrzlaʼa a bèhè skwi ngedassa ndo.

¹⁵ Skwi ndo mèshèlè nara gi nengaʼa ndakemaʼa; ntèwèshè ndohi man ta ngatsa skwi ɓai a bazl ta.

¹⁶ Ndo maya a gi mizlinè aman a nzi a nshèffè; ndo ambaɓiaʼa a woy skwai aman a gi mali a vna.

¹⁷ Ndo man a cè skwi man ta slebda na, a dè a civèɗ nshèffè; aman ndo man a woy a ta ngatsa na maya ɓai, a zlèk na.

¹⁸ Ndo man a ngheda ma a ndav na, a gi tiflè; aman ndo man a ngre ndo, nengaʼa nrzlaʼa.

¹⁹ A sam man ta gèɗè ma kumba, mali a wuc na a vaʼa; aman ndo man a pizlè ma na, a gi amba.

²⁰ Ma ndo nzuraʼa nara guro ndaɓalaʼa; ndav ndohi ambaɓihiaʼa nara skwi ambalai.

²¹ Ma ndohi nzuraʼa a tasl ta ndohi kumba; aman ndohi nrzlaʼa ta bazl ta a géɗ man maya ta azɓai.

²² Mpshè ma Ndo nzi pèc pècèk, nengaʼa man a walde ka; wuɗi ngaya a va ka skwi a vaʼa azɓai.

²³ Nhér malai a wuffedè ndav ndo nrzlaʼa; aman maya a wuffedè ndo maya.

²⁴ Skwi man ndo nrzlaʼa a gi zlauaʼa, a da ga na; aman ndohi nzuraʼa ta ngècè skwi man ta woyaʼa.

²⁵ Aman skwi mwuɗitpa a shkè, ndo ambaɓiaʼa klèng ma; aman ndo nzuraʼa a nzi gedeng-gedengaʼa a mèdèp.

²⁶ Lèmèlèmè ara mbrom man a pa ka ɓorom a ma, ara vodzok man a da ka dai – ndo wudar a sam ndo nzlindèʼa.

²⁷ Zlau Ndo nzi pèc pècèk a nderɗa ka pats nshèffè ngaya a ma ma; aman mvi ndohi ambaɓihiaʼa a helaha.

²⁸ Skwi man ndohi nzuraʼa ta zhèrè a ma ma, a ndikè a sam mwuffè; aman skwi man ndohi ambaɓihiaʼa ta zhèrèʼa, a zi na.

²⁹ Civèɗ Ndo nzi pèc pècèk, sam nlèa ndohi nzuraʼa; aman sam man ndohi amtaɓihiaʼa ta kèlèhi a pa.

³⁰ Ndo nzuraʼa a nzi gedeng-gedengaʼa a mèdèp; aman ndohi ambaɓihiaʼa ta nzi a géɗ herkeda azɓai.

³¹ Maya a shkè auda te ma ndo nzuraʼa; aman nèʼèn ndohi ambaɓihiaʼa ta zlama ta auda te ma.

³² Ndohi nzuraʼa ta sun ngèɗè ma mwoy-ndo; aman ndohi ncèkèlma ta gèɗè ma ambaɓiaʼa.