Philippiens 3 - Ma Zhiklè

Ngi-zura a

¹ A vaʼa, dalahimam ga, va-wuffa te Bi Yèsu! I ngézhè azɓai, aman i windè kinè ma lèmèlèmè pèc pècèk, a kin da ngècè wudi a vna.

² Va-gu maya a kdadihai, va-gu maya a ndohi mizlinè ambaɓihiaʼa, va-gu maya a ma nʼngél ngwon ncèkèlma.

³ Aman nga ngots nʼngél ngwon nzuraʼa, nga man nga gi mizlinè Zhiklè te Mèzhèɓ nengaʼa, a njégèr va nga a zhè, nengaʼa Yèsu Kristi; nga fi gèɗ a ndo ara nyakaɗ na ka ɓai.

⁴ I ba i slaha i fi gèɗ a va ga ara nyakaɗ ga, man i woyaʼa. Aman ndo ngiɗè a huro, a slaha a nfi gèɗ ara nyakaɗ na, iyè i slaha holholaʼa:

⁵ Ta ngelay ngwon te mʼmèn matsamakaɗaʼa; i ndo Israel, te gwoli Benjamin, ndo Hébreu te verzi Hébreu; te njèjèr ma kita Zhiklè i ndo pharisie;

⁶ a géɗ srak i ndo mparaha mpi ndohi Zhiklè; a géɗ ngi-zuraʼa ara ma kita Zhiklè, i ndo man ma az a gèɗ na ɓai.

⁷ Aman skwi man halaʼa skwi mbiaʼa a sam di ga, i rka ara skwi man i kal ga a iyam, a géɗ Kristi.

⁸ A vava, ko anai i rka tèlèba ara skwi man i kal ga a iyam, a gèɗ i shin Yèsu Kristi Bi ga a i rka ara zai, a i woya a i ngècè Kristi,

⁹ a ta da ngatsyè te nengaʼa. I ga a ndo nzuraʼa ga a géɗ man i fu gèɗ a ma kita Zhiklè ka ɓai; aman ngi-zuraʼa man a shkè te ncè Yèsu Kristi a ndav, ngi-zuraʼa man a shkè te Bi Zhiklè a géɗ ncè-a-ndav.

¹⁰ I war a i shin wuɗi nslambaɗkaɗauda nengaʼa, a nsi matakwan a nda nengaʼa, a i lèmdè va ga a mʼmetsi nenga a,

¹¹ aman i ngècè nslambaɗkaɗauda te ndev ndohi mʼmetsaʼa, aman i slaha.

Nhi a ma ma a sam nʼndikè-maʼa

¹² Anai ara man i ngatsa di ɓai, a i ga njèlèlèʼa di ɓai. Aman i hi a verziaʼa, man i slaha a i gshèʼa, te man Yèsu a ngsyè ma.

¹³ Dalahimam ga, i rka va ga, ara man i ngatsa skwi haha di ɓai. Aman i gi skwi staɗ: Skwi nte deɓa a pcokoy a gèɗ, a i kokür va,

¹⁴ a i hi a sam skwi man a zhè a ma, a sam nʼndikè-ma, a sam skwi ntulè, a sam man Zhiklè a baha nga a pa te Yèsu Kristi.

¹⁵ Tèlèba te ndev kinè, man ta gra ma, sèi ngo-hurokoy arsa. Aman a sam ngiɗè kin hér skwi tsaɗ, a di Zhiklè a ngreda kinè.

¹⁶ Te skwi man nga ngots ma, ngo-gsokoy va a vna!

¹⁷ Va-gu lèmèlèmè ara ga, dalahimam ga, va-pu di a tengaʼa man ta gi arsa! Va-lèmda va kinè a nga!

¹⁸ Aman ta kumba ta ga a mayamhi wof ngézlèl Kristi. A géɗ tengaʼa i gaɗa kinè sak kumba ma; aman anai i gaɗa kinè a kuɗa a dai.

¹⁹ Ndikè-ma tengaʼa, sam ngédèsh ta. Zhiklè tengaʼa, hwaɗ ta. Nʼnjèl tengaʼa, hori ta, ta hér skwi herkeda.

²⁰ Aman nga ndohi kokwar Zhiklè te géɗèʼa, te nengaʼa nga zhèr ndo mʼmbel ndo, Bi Yèsu Kristi,

²¹ nengaʼa man a di a ngwèdè va nga ambali haha, a va nʼnjèl na, te wuɗi nengaʼa, man a slaha a feda skwi tèlèba a hwaɗ sak na.