Philippiens 2 - Ma Zhiklè

Kristi a manda gèâ a hai

¹ Aman antanta ma, ncè-a-ndav kinè te Kristi a va kinè wuɗi ɗè? Mwoyndo a ndav nengaʼa a bid kinè ɗè? Kin humda a Mèzhèɓ nkezlaʼa ɗè? Kin woy va kinè ɗè? Ndo a se kinè te va ɗè?

² Man arsa, va-gau aman i wuffè holholaʼa, va-hur te ndav lèmèlèmè, a ndav staɗ, va-woy va kinè lèmèlèmè a ndav staɗ a mèzhèɓ staɗ.

³ Kin büzh va, a géɗ nfi va mbalai ɓai; aman va-manda gèɗ a hai, a kin rka ndo ngiɗè ara man a fen kinè.

⁴ Staɗ staɗ tèlèba da hur skwi na genè ka ɓai, aman a géɗ ndo ngiɗè ba.

⁵ Gar haha va-huro, ara man Yèsu Kristi a huro.

⁶ Nengaʼa, ko a nʼngots va Zhiklè, a ngu a géɗ ngi nengaʼa a srak ka ɓai, aman a gi lèmèlèmè ara Zhiklè;

⁷ aman a ndeda va na a ɓèlè. A ngu lèmèlèmè ara ndo, a nʼnza ara ndo.

⁸ Te Skwi man a gau ara ndo, a mʼmanda gèɗ na a hai, a nfu gèɗ a Zhiklè, ha a nco mʼmetsai, mʼmetsai a wof ngézlèlèʼa.

⁹ Gar haha Zhiklè a nʼnzalaʼa a vata, a mva na nzlembaɗ a géɗ nzlembaɗ tèlèba,

¹⁰ aman a nzlembaɗ Yèsu, gurmbèzh tèlè ta da gurɓè a hai, ko te zhiklè, ko a géɗ herkeda, ko tʼhwaɗ herkeda.

¹¹ A nèʼèn tèlè ta ngrédèʼa, Yèsu Kristi Bai, a nʼnjèl Zhiklè, Bab na.

Nhél sam tʼherkeda

¹² Gar haha kinè dalahimam ga, ara man kin fi gèɗ a ma ga pèc pècèk, va-gu arsa man i zhè a sam kinè genè ka ɓai, aman ko antanta ba, man iyè az a sam kinè ɓai. Va-gu a zlau a ngudzai, aman kin mbél kinè.

¹³ Aman Zhiklè, nengaʼa a gi te ndav kinè, aman kin woyaʼa, a kin giaʼa, ara man ambaha.

¹⁴ Va-gu skwi tèlèba a nkuɗi a va ka ɓai, a mpi gèɗ cèw ka ɓai.

¹⁵ Aman kinè, va-nza, ma az a géɗ kinè ɓai, zuraʼa, wudahi Zhiklè, mali az a sam kinè ɓai, te ndev ndohi herkeda man ta gedas ta, a ta ngwode ta a ndohi ambaɓihiaʼa, te ndev tengaʼa kin hél sam ara skwi nhél sam tʼherkeda,

¹⁶ a ma nshèffè te rai. Aranta kinè ara skwi njégèr va ga a pats Kristi, man a ngrédè auda, i hau ambali ka ɓai,

¹⁷ i ga mizlinè ambali ɓai. Ko ta giyè a skwi man ta va na Zhiklè, nshèffè ga skwi man ta vi a Zhiklè a géɗ ncè-a-ndav kinè, i wuffè genè, a i wuffè a nda kinè tèlèba.

¹⁸ Kinè ba, sèi kin wuffè lèmèlèmè, a kin gi langlangaʼa a nda iyè!

Timothée a Epaphrodite

¹⁹ Aman i zhèrè te ndav te Bai Yèsu, i da zlinda kinè Timothée ndul ndul, a nda mendkoy ma kinè a deɓa, a ndav ga a gi langlangaʼa.

²⁰ Aman i ngatsa ndo ngiɗè ɓai, man a hérèa ara ga ga, a ndzaraha kinè a ndav tèlèba, sèi nengaʼa.

²¹ Aman ta tèlèba ta woy skwi ta, skwi Yèsu Kristi ka ɓai.

²² Aman kin sun Timothée, nengaʼa njkudo ma, a nʼnza a sam ga, a ntakahayè a géɗ ma mbelaʼa, ara kra man a takaha bab na.

²³ I zhèrè te ndav, te deɓaʼa man i tsena skwi man ta da gi a sam ga a ma ma, i war i zlinda kinè Timothée.

²⁴ Aman i fi gèɗ a vna, te Bi Yèsu, aman iyè a ri ga, a di i dè a sam kinè ndul ndul.

²⁵ Aman i huro amba aman i zlinda kinè Epaphrodite ba, kramam nga. Nengaʼa ndo mizlinè ga, ndo man nga gi var a vna, ndo sak kinè, ndo ntakaha kinè te di man a ga.

²⁶ Mpataka kinè tèlèba a keɗaʼa, a ndav nengaʼa mʼmbeɗa, a géɗ man kin tsenaʼa, ara man nengaʼa mbelakaɓai.

²⁷ A patsakai skwa a ndza na man a vèvèɗ a vava. Aman a nsau Bi Zhiklè te va, nengaʼa genè ka ɓai, aman iyè ba, a woy a mbeɗamay ndav pèc pècèk azɓai.

²⁸ A i zlindè ani tsam tsam, aman kin da rkaʼa, a kin wuffè zaʼa, a iyè ba, i kuɗi a vata azɓai.

²⁹ Vo-co nengaʼa te Bi Yèsu a mwuffè tèlèba, va-slebarde ta ndohi haha!

³⁰ Aman a géɗ mizlinè Kristi a mʼmbel na pshetühtüh, a nrka nshèffè na ara skwi ambalai, a géɗ man a slaha a ntakahayè te di man a kinè.