Philippiens 1 - Ma Zhiklè

Mbalai

¹ Paul a Timothée, ɓèlèlihi Kristi Yèsu, a sam ndohi Zhiklè tèlèba man ta kezla a nzlembaɗ Kristi Yèsu tèlèba, te kokwar Philippes; a sam ndohi mɓer mizlinè Zhiklè a ndohi ntakaha ta ba.

² Pombai a gumai da zhè a nda kinè, te Zhiklè, Bab nga, te Bai Yèsu Kristi!

Ntsi ri Paul a géɗ ndohi Zhiklè te Philippes

³ I shid gèɗ a Bi Zhiklè pèc pècèk, aman i hér kinè,

⁴ a i gi arsa pèc pècèk te ntsi ri ga tèlèba a géɗ kinè, a i tsi rai a mwuffe,

⁵ te man kin humda te ma mbelaw, te pats nshèlèkuraʼa, ha patsna.

⁶ A i fi gèɗ a vna: nengaʼa man a hüno mizlinè mbelaʼa te ndav kinè, a dè a ma ma a nrufaʼa, ha pats Yèsu Kristi.

⁷ Amba aman i hérè arsa a géɗ kin tèlèba, a géɗ man kinè te ndav ga. Ko i ndo dangai, ko i te kita man i tsoko na gèɗ ma mbelaʼa auda. Kinè, man kin ngècè pombi ara ga.

⁸ Bi Zhiklè a suna, mpataka kinè a keɗyè a vata, te mwoy-ndo Yèsu Kristi.

⁹ A i tsi rai aman mwoy-ndo a ndav kinè a grè a ma ma te nshin skwai, a kin shin Yèsu te ndav kinè,

¹⁰ aman kin ɗèlè ar haha skwi man amba a skwi man ambaɓai. Te deɓaʼa a pats Kristi kin gaʼa a ndohi nzuraʼa, mali az a sam kinè ɓai;

¹¹ a nyiè kinè ngutsuɓaʼa te ngi-zuraʼa man a shkè te Yèsu Kristi, a da zhè a nslébèrdè a nshid gèɗ a Bi Zhiklè a vna.

Kristi, nshèffè ga

¹² Aman i gaɗa kinè, dalahimam ga, skwi man a gu a sam ga, a gu aman ma mbelaʼa a zlèzlèmè a ma ma.

¹³ Aman antanta ta sun te gi bi tèlèba, a sam ngiɗè tèlèba, i ndo dangai a géɗ Kristi;

¹⁴ a kramamhi kumba te Bi Zhiklè ta ngots wuɗi te man iye te dangai, a ta gu a ndohi slagama, a ta njè ma Zhiklè a zlau ka ɓai.

¹⁵ Matrhiaʼa a vava, ta njè Yèsu a srak a ndzoan. Matrhiaʼa te nhér skwi man amba,

¹⁶ te man ta woya a ndav ta. Ta suna, i nzi a haha, aman i tsoko gèɗ ma mbelaʼa auda.

¹⁷ Tengahi ngiɗè ta njè ma Kristi, zuraʼa ka ɓai, a ta woy ma te pa, a ta woy a ta gay matakwan te gi dangai a vaʼa.

¹⁸ A ga ga pa mè? Ko man ta njè Kristi a maya tsaɗ tsaɗ tèlèba, ko a maya ambaɓiaʼa, ko a ndav nzuraʼa, i wuffè a géɗèʼa genè, a i woya man i wuffè a ma ma dai.

¹⁹ Aman i suna, ndikèma skwi haha, i da mbél ga, a géɗ ntsi ri kinè, a géɗ Mèzhèɓ Yèsu Kristi man a takahayè.

²⁰ A i zhèrè te ndav, a i hérèʼa, i woy a i ngècè hori a di azɓai, ko te skwi staɗ. Pèc pècèk, ko antanta ba, i slébèrdè Kristi te va ga, a i fi gèɗ a vna, ko man i zhè a nshèffè, ko i metsi ga.

²¹ A nshèffè ga, i te Kristi, te mʼmetsai i da ngècè skwi nfenaʼa.

²² Aman i zhè a nshèffè a takahayè, aman i gi mizlinè a ma ma dai, i sun skwi man i woya te va ɓai:

²³ Cèw cèw ambahayè: i woya man i dè ga, a i nzi a sam Kristi, skwi man amba holholaʼa.

²⁴ Aman sèi i nzi a nshèffè dai a géɗ kinè.

²⁵ I fi gèɗ a vna: i suna, i da nzi dai, a i da zhè a sam kin tèlèba, aman kin grè a ma ma, a kin wuffè te ncè-a-ndav,

²⁶ a kin da jégèr va kumba te Yèsu Kristi a géɗ ga, a pats man i dè a sam kinè zaʼa.

²⁷ Va-nza a maya te nshèffè kinè, aman kin nzala ma mbelaʼa te Kristi! Ko i dè a i rka kinè, ko i az a sam kinè ɓai, i da tsena ma kinè, kin nzi taraʼa te Mèzhèɓ nstaɗ, a kin gi var a nda nga a ndav staɗ, a géɗ ncè ma mbelaʼa a ndav.

²⁸ A kin gi aman ndohi mayamhi kinè ta slaha ta pra kinè zlau a va azɓai, ko te skwi staɗ. A skwi ar haha a ngreda ta, ta za; aman a sam kinè a ngreda kinè, kinè mbela, skwi haha a shkè te Bi Zhiklè.

²⁹ Aman kin ngots pombai te Kristi, a kin cè nengaʼa a ndav, a kin si matakwan a géɗ Kristi ba.

³⁰ Kin gi var lèmèlèmè ara man kin rka a sam ga, a kin tsena antanta te ma ga.