Philémon 1 - Ma Zhiklè

Mbalai

¹ Paul, ndo dangai a géɗ Yèsu Kristi, a Timothée, kramam nga; a sam Philémon, mandal nga, ndo man nga mba a mizline a vna;

² a sam Appia ba, demam nga, a Archippe, ndohi man nga mba a var a tengaʼa, a sam mpi ndohi Zhiklè man a ɓiceda va a gi ngaya ba.

³ Pombai da zhè a nda kinè, a gumai te Zhiklè, bab nga, a Yèsu Kristi bi nga.

Mwoy-ndo a ncè-a-ndav Philémon

⁴ Pèc pècèk man i tsi rai, i hér ka, a i shid gèɗ a Zhiklè.

⁵ Aman i tsenaʼa, ara man ka woy ndohi Zhiklè tèlèba a ndav ngaya; ara man ka co Bai Yèsu a ndav.

⁶ I tsi rai, aman ncè-a-ndav, man a humde nga, a va ka wuɗai te ndav ngaya, a ka sun skwi man amba tèlèba man nga ngotso te Kristi.

⁷ Aman, kramam ga man i woy ka a ndav ga; ara man ka bidka ta ndohi Zhiklè a mwoy-ndo a ndav ngaya, a gi a mwuffe te ndav ga, a bidyè ba.

Paul a bidè Philémon a géɗ Onésime

⁸ Iyè Paul, te Kristi ar i slaha a i fa ka ma a gèɗ a géɗ skwi man ka da giaʼa.

⁹ Aman i woy a i gaɗa ka te mwoy-ndo a ndav genè. Iyè Paul, ndo nhalaʼa, anai ndo dangai Yèsu Kristi ba.

¹⁰ I tsi rai a sam ngaya a géɗ Onésime, kra ga man i ngotso te gi dangai.

¹¹ Halaʼa a slaha a ntakaha ka ɓai. Aman antanta a slaha a ntakaha nga cèw ba.

¹² Nengaʼa i zlindè a deɓa a sam ngaya, kala man iyè a ndo.

¹³ Te ndav ga i huro, da nza a sam ga, aman a takahayè te di man a ngaya, te man i te gi dangai a géɗ ma mbelaʼa.

¹⁴ Aman i gaɗa i gi a wuɗi azɓai, sèi man ka ngoɗo.

¹⁵ Gar Onésime a njèke ka nʼnzi kètè, aman te deɓaʼa kin da nzi a vna a mèdèp, i sun ɓai.

¹⁶ Aman ara ɓèlè genè ka ɓai, aman a fena ɓèlè; ara kramam nga man nga woya te Kristi; holholaʼa ka, kala kramam ngaya te Kristi.

¹⁷ Aman ka rkayè ara ndo ngaya, sèi ka cèʼa a deɓa ara man ka ciyè.

¹⁸ Aman a ngu mali a sam ngaya, man godèrè ngaya a gèɗ na, na géɗ ga. Iyè Paul, i Windo ma haha a ri ga, i woya a i pilèʼa.

¹⁹ Aman i gi hérèʼa, ka suna, godèrè ga a zhè a sam ngaya a géɗ nshèffè ngaya.

²⁰ Anai, kramam ga man i woy ka, gau aman i ngècè mwuffe a géɗ ngaya te Bai Yèsu, a ndav ga a gi langlangaʼa, ara kramam ngaya te Kristi.

²¹ I winda ka ma haha, a i suna, ka fi gèɗ a ma ga, a i suna ka giaʼa, a fena skwi man i gaɗa ka.

²² Te deɓaʼa tilay sam a hai; aman i huro, a géɗ ntsi ri kinè i ngècè civèɗ, a i dè a sam kinè.

Mbalai man a deɓa

²³ Epaphras, man nga te dangi a vna a géɗ Yèsu Kristi, a ga ka mbalai.

²⁴ Lèmèlèmè Marc, Aristarque, Démas, Luc, man nga mba a mizlinè a nda tengaʼa.

²⁵ Pombai Bi mʼmbel nga Yèsu Kristi da zhè a nda kinè tèlèba!