Osée 9 - Ma Zhiklè

Pats kita

¹ Israel, ka wuffa ɓai, ndav ngaya da gu langlanga ara ndohi herkeda ngiɗè ɓai, a géɗ man ka jèkeda Zhiklè a ka gu mphömè, a skwi mbalai man ka patseda a hedak tèlèba ambaha ka.

² Skwi man te hedak a skwi nʼndha te klok a ngeza ta azɓai.

³ Zom ba ta wuffè a géɗèʼa azɓai. Ta da nzi tʼherkeda Ndo nzi pèc pècèk azɓai. Ephraim sèi da mena a deɓa a kokwar Egypte, a ta ndi tsahkaɓi skwi te Assyrie.

⁴ Te deɓaʼa ta da va na skwi nsi a Ndo nzi pèc pècèk azɓai, ta da zla na skwi azɓai. Movar man ta ndiaʼa ta lèyè a géɗèʼa. Tèlè man ta ndiaʼa, a lizhèma ta ndav. Movar tengaʼa a ngeza ta a hwaɗ ta genè, aman ta vi a gi Ndo nzi pèc pècèk azɓai.

⁵ Kin woy a kin gi mè a pats ngolala, a pats ngolala Ndo nzi pèc pècèk?

⁶ Na haha, sèi ta dè a kokwar Assyrie, ndohi Egypte ta da ɓic ta, a ndohi Memphis ta da re ta a vèvèɗ. A sam man skwi mèshèlè tengaʼa, kuɗdzarai a ftskaɗa pa, a sam gi tengaʼa vatak a ftskaɗa pa.

⁷ Pats kita a mshkè ma, pats mpil gèɗ a mshkè ma. Ndohi Israel ta da suna. Ndo nhadka ma a nrzl na a pa. Ndo man Mèzhèɓ Zhiklè te ndav na, a nyakedama na gèɗ. A géɗ mali ngaya man kumba, kita ba a gi mbiaʼa.

⁸ Ephraim a pi va a ndo nhadka ma. Ndo nhadka ma a civèɗ nengaʼa tèlèba nara votok man ta gshè ɗiakihi a vna. Shèwa a zhè te gi Zhiklè na.

⁹ Nʼndi hwaɗ tengaʼa a gedas ta tèlèba, lèmèlèmè ara man ta gu te Guibea. Ndo nzi pèc pècèk a hér maharam ta, a da gi kita a géɗ mali ta.

Zhiklè a nkwola Israel

¹⁰ I ngots Israel te va nasa ara kslor tʼhèshèkèɗ. I rka babhi kinè ara nslakawi wof kslor. A tengaʼa ta shkè a Baal-Peor, a ta dzodzor Baal, vrai, a ta ndarayè lèmèlèmè ara vrai man ta tsu riaʼa.

¹¹ Ndohi Ephraim, nʼnjèl tengaʼa a nze na ara ɗiak man a giɗfèk. Ta yi kra azɓai, ta ngècè kra a hwaɗ azɓai, ngwoz man a hwaɗ azɓai.

¹² Ko ta gre wud ta, i da bazl ta aussa te gola. Wobau a géɗ tengaʼa man i kwol ta.

¹³ I pu di a géɗ Ephraim tèlèba, nʼngaʼa a sam mbelaʼa. Aman Ephraim a di a hel ta wudahi nengaʼa auda a sam ndohi nkeda ndo a ri na.

¹⁴ Ndo nzi pèc pècèk, va ta ara man ka woyaʼa: ndede ta a delai, ɓutoma ta wa!

¹⁵ Shèwa tengaʼa mɓica tèlèba te Guilgal; te pa i ga a ndo mayam ta. A géɗ skwi man ta gi a shèwa, i woy a i dzam ta auda te gi ga. I woy ta te deɓaʼa asaɓai. Tsuvomhi tengaʼa tèlèba ndohai mèdègèɗ.

¹⁶ Zhiklè a ntsu Ephraim. Verzi Ephraim nʼngelaʼa, ta yi wuda azɓai. Ko ta yi wuda, i da bazl ta genè.

¹⁷ Zhiklè ga a da kwol ta, te man ta tsena ma nenga ɓai, a ta da zlak ta te va ndohi herkeda.