Osée 8 - Ma Zhiklè

Israel a jèkeda ma kita

¹ Tsu tolom! Kala ta va a ndohi gi Ndo nzi pèc pècèk, ara mangayak, a géɗ man ta tawaɗaha nderzlè-ma ga, a ta gu malai, a ta jèkeda ma kita ga.

² Ta bèhè a sam ga: Zhiklè ga, nga sen ka, nga ndohi Israel!

³ Aman Israel a zukda skwi man ambaha aussa a sam na, ndo mayam a da paraha.

⁴ Ta fau bai, aman ta dzhaɗyè ɓai. Ta par ta wud bihai, aman i sun ɓai. Ta gu skwi mbèh skwai a ver-zhègenè a guro, aman ta da gédèshè ndohai.

⁵ Samarie, kra zlè ngaya a ndarayè! Ndav a dzayè worworaʼa a géɗ tengaʼa; ta da jèkeda mali a ngèmè?

⁶ Israel a ngu genè. Ndo nsun nvidè guro a ngau, nengaʼa Zhiklè ka ɓai.

⁷ Skwi man ta gau, ara man ta zleki kozlar, ta da ɓicè ndombozlor. Dau a dè auda, a nde na shèkètèr, matakaʼa ko tsera a pa staɗ staɗ, ndohi ngidè ta da ndeda ma.

⁸ Ta ndeda Israel a ma! Ephraim a nzi a géɗ na. Ta te va ndohi herkeda aman ta gi skwa a vna azɓai.

⁹ Aman to do Assyrie, to do Egypte, a ta va ta skwi mbalai a ta woy a ta gi mandala a nda ta.

¹⁰ Ko ta va ta skwi mbalai a ndohi herkeda, i da ɓickoɗa deɓa, a ta da gudzi te ri skwi man ta cè-kèlè a bai.

¹¹ Ephraim a ngau sam mvi skwi a Zhiklè kumba, a ta gi mali a samaʼa.

¹² I winda na ma kita ga tsaɗ tsaɗ kumba, ta rka ara skwi gwoli ta ka ɓai.

¹³ Nzli skwi a Zhiklè ambaha ta. Ta zlèhaʼa, aman ta ndeda zluèɗ a ma. Ndo nzi pèc pècèk a wuffè a géɗ tengaʼa azɓai. Antanta a da hér mali ta, a da ga ta kita a géɗ mali ta. Sèi ta minè a deɓa a kokwar Egypte.

¹⁴ Ndo ngau Israel mpca na a gèɗ, a ta rèm gi bihai. Juda a nrom kokwar mbibihiaʼa a vaʼa a vaʼa. Aman i da fa na vogwa a kokwarhi nengaʼa, a da ndeda gi bihi tengaʼa a ma.