Osée 7 - Ma Zhiklè

¹ Aman i woy a i mbel ta ndohi Israel, mali Ephraim a ngrédè auda, a skwi ambaɓiaʼa man Samarie a ngau. Ta cèkèlma, ta gi metsar, ndo metsar a zlin gai matrhiaʼa ta hil skwi tʼuda.

² Ta hér a ɓai: Zhiklè a hér mali nga. Aman antanta skwi man ta gau a mpaɗ ta a pa, skwi man ta gau i rka tèlèba.

³ Ta gi a bi a wuffè a géɗ mali ta, a wud bihi a géɗ ncèkèlma tengaʼa.

⁴ Ta tèlèba ndohi mphömè, ta lèmèlèmè ara rèwèc nti daf, man daf te pa, vogwa a te pa ɓai, ha a ɓesl na a pa.

⁵ A pats ngolala bi ga, skwa a ndza ta wud bihi nga a géɗ zom man a keɗ ta. Bi a ngu mandala a nda ndohi nkeda ndo.

⁶ Ndav tengaʼa nara rèwèc man vogwa te pa. A vaɗ tèlèba ta gi ndzoan, ta nzi tètè azɓai, aman a prèk a slèmbèɗè ara nèʼèn vogwa mbiaʼa.

⁷ Vogwa te pa, ara vogwa te rèwèc, a ta ndeda ndohi kita tengaʼa a ma. Bihi tengaʼa tèlèba klèng ma, ko staɗ azɓai man a bèhè a sam ga.

⁸ Ephraim a ndzakaɓa va a ndohi nte verzi ngidè. Ephraim nara mɓelaslasla man a tu te tsagi staɗgenè.

⁹ Ndohi nte verzi ngidè ta cèma na wuɗi nengaʼa, a nengaʼa a sun ɓai.

¹⁰ Nfi va ndohi Israel a nʼngwoda ta va a gèɗ, aman ko aranta ta menkada deɓa a sam Ndo nzi pèc pècèk, Zhiklè tengaʼa ɓai, ko aranta ta woya ɓai.

¹¹ Ephraim nara nkuɗhom man a hér skwa azɓai, man maya na azɓai. Ta bahka ta ndohi Egypte, to do a sam ndohi Assyrie.

¹² Aman ta dè, i pi votok a hai a i gs ta ara ɗiakihai tʼhwaɗ gidfèk, a i ga ta matakwan a géɗ shèwa tengaʼa.

¹³ Wobau a géɗ tengaʼa, a géɗ man to do ta dra a sam ga. Matakwan da ga ta, te man ta jèkyè. Iyè i woy a i da mbel ta, aman tengaʼa ta tsokolma a géɗ ga.

¹⁴ Ta kuɗau a sam ga a ma genè, a ndav tèlè ka ɓai, aman ta manahi a matakwan. Ta gi zlau a géɗ dau a iyam nyi wof, a ta gi mèdègèɗ a sam ga.

¹⁵ Iyè i gau a i Sala ta ri ta; aman ta hur skwi ambaɓiaʼa a géɗ ga.

¹⁶ Ta dè a ta woy Baal, ta ara lèkèɗ man a nʼngwoda ta va a gèɗ. Bihi tengaʼa sèi ta bazl ta a tsakwal, a géɗ ma tengaʼa man ta derdyè a vna. A ndohi Egypte ta da ngwossaha ta.