Osée 5 - Ma Zhiklè

Kita a ngwèdè azɓai

¹ Kinè ndohi mvi skwi a Zhiklè, va-tsena ma haha! Ndohi gi Israel, vagu maya! Ndohi nte gi bai, va-fu zlembaɗ, kita kinè a zhè. Kin gaʼa a gadda sam Mitspa, a ɓalai a sam Thabor, a géɗ mphömè kinè, kin kala drav.

² Aman iyè, i ga kinè kita a gèɗ tèlèba.

³ Iyè, i sun Ephraim; Israel nʼngheda a sam ga ɓai.

⁴ Ka Ephraim, ka gu mphömè; a Israel a nlizhè va na. Skwi man ta giaʼa a va ta civèɗ a ta menkada deɓa a sam Zhiklè tenga ɓai. Aman mèzhèɓ mphömè a nʼnga ta, a ta sun Ndo nzi pèc pècèk ɓai.

⁵ Nfi va Israel a nʼngwoda ta va a gèɗ. Israel a Ephraim ta kalahi a géɗ mali ta.

⁶ Ko Juda ba a nkalahi a nda tengaʼa. Ta dè a ta hèsh Ndo nzi pèc pècèk a tambak a zlè te ri tengaʼa, a ta ngècè azɓai.

⁷ A ndo na dra a sam di ta. Ta gu malai a sam Ndo nzi pèc pècèk, ta yu wuda te verzi man a tengaʼa ka ɓai. Gar haha a da gedas ta, a nda gi dau tengaʼa ba; a ki staɗ klèng.

⁸ Va-tsu tolom te Guibea! Va-voɗo shingelèk te Rama! Va-guzlau te Beth-Aven! Ta dzar ka, Benjamin!

⁹ Ephraim a da gédèsh na a pats ndzoan. I ngreda skwi man a ga ta ndohi Israel a vava.

¹⁰ Bihi Juda nara ndohi nherda kuma; i zuva ta ndzoan ga a gèɗ ara iyam.

¹¹ Ephraim a gi skwi a wuɗai, a terɗa ma kita, a hi a verzi skwi ambalai.

¹² Aman iyè a sam Ephraim ara goya man a ndi gèɗ. A sam ndohi Juda ara mblè gurdzo.

¹³ Aman Ephraim a rka matakwan nengaʼa, a Juda a rka mblè nengaʼa. Ephraim a mdo a kokwar Assyrie, a nzlündo ndo sak a sam bi Jareb. Aman nengaʼa a slaha a mbel kinè azɓai, a mblè a pkwè a pa azɓai.

¹⁴ Iyè a sam Ephraim ara kokoya, a sam ndohi gi Juda ara marizhèlè. Iyè i cizleda pa a i dè ga. I ceda skwi a ma, a mbélè auda te ri ga azɓai.

¹⁵ I dè ga, i minè a deɓa a sam nʼnzi ga, ha ta ndev ta a géɗ mali ta, a ta hèsh di ga, ha te ri zlau mʼmetsai ta woy iyè.