Osée 2 - Ma Zhiklè

¹ Te deɓaʼa ndohi Israel kumba, ta ngrè azɓai, ta livè azɓai ara wyak te woyam. I da gaɗa ta azɓai: Kinè ndohi ga ka ɓai; aman i da gaɗa ta: Wudahi Zhiklè man a zhè a nshèffè.

² Te deɓaʼa ndohi Juda a ndohi Israel ta da humdè va, a ta da vi bi staɗgenè, a ta da ndha te kokwar. Nasa pats mbiaʼa a sam Jizreel.

Ngwoz nlèɓèslɓiaʼa

³ Va-baha ta kramamhi kinè: Ammi, ndohi ga! a demamhi kinè: Ruchama, tengaʼa man ta si ndo te va.

⁴ Va-ga na ndzoan a mam kinè (nengaʼa ngwoz ga ka ɓai, iyè baki nengaʼa ka ɓai), da jèkeda fali na a mphömè na.

⁵ Man ɓai i suɗama na maslaka auda a va, a nzi adai ara pats nyi nengaʼa. A i ngwoda na va a ngi ara hèshèkèɗ, ara sam nharkangkangaʼa, a i zeda te ri mi iyam.

⁶ Wudahi nengaʼa ta da siyè te va azɓai, a géɗ man tengaʼa ta fali wudahai.

⁷ Mam tengaʼa a nʼnde na a fali ngwoz, ko na hwaɗ a hèsh baki ngidè, a ngaɗa: I jèjèr golahi ga man ta vay movar a iyam a gogumi a maslaka a mbar a skwi nsi ga.

⁸ Gar haha i woy a i va na vatak a civèɗ a i ngalda pa a zlazlar, a slaha a hi auda ɓai.

⁹ A nengaʼa a jèjèr golahi na, a nda ndikè a sam ta azɓai. A has ta, a nʼngats ta ɓai, a da gada: I woy a i minè a deɓa a sam baki ga nshèlèkuraʼa. Nʼnzi ga ambahayè te pa a fena mpatsna.

¹⁰ A sun ɓai, iyè Zhiklè man i va na dau a barassa a mbar. A i va na ver-zhègenè a guro kumba; aman ta ngwoda a skwi vrai.

¹¹ Gar haha i shkè a pats man dau a zhè, a i cè dau ga a deɓa, aman barassa a zhè, a i cè a deɓa, a i cè gogumi ga a maslaka ga, man a i hur a i da fi a va.

¹² A i ngreda auda a sam golahi na, a ta rka va na ngedas na, a nengaʼa a mbelè auda te ri ga azɓai.

¹³ I da gedassa mwuffe nengaʼa tèlèba, a ngolala nengaʼa, a ngolala kia, a pats nshèk va na, a ngolala mbiaʼa tèlèba.

¹⁴ A i da gedassa gi lak na, a wof barassa na man a gèâè a géɗèʼa: skwi man i ngots a fali ga.

¹⁵ A i ndeda dak a hèshèkèɗ, a skwi dakhi ta nzi a pa. Aman a da pil gèɗ a géɗ mizlinè man a nʼnga na Baal, a skwi man a mva na, aman a vau skwi wi nengaʼa a va, a jèjèr golahi na, a i pca na a gèɗ, Ndo nzi pèc pècèk a gaɗa.

A sam baki na zaʼa

¹⁶ A géɗ nengaʼa i da pètèda hèshèkèɗ, i da njè na ma a gèɗ te pa.

¹⁷ I da va na gi lak na, a i ngwoda dal Acor a pi ndav a vna a ma ma. A dè a pa, ara man a gu te dali na, a pats man a mshkè auda te kokwar Egypte.

¹⁸ A pats nasa, a da bahayè ‘baki ga’, Ndo nzi pèc pècèk a gada. A bahayè ‘Baal ga’ asaɓai.

¹⁹ A i cèma na nzlembaɗ Baalhai auda te ma na, a baha ta te deɓaʼa asaɓai.

Kinè ndohi ga

²⁰ A pats nasa i da dérzlè ma a nda skwi dak, ɗiak tʼhwaɗ giɗfèk, skwi ndè a hwaɗhai, a géɗ Israel. A i pasla lèkèɗ a tsakwal a i ndeva var tʼherkeda aman ta nzi a gumai.

²¹ A nga dérzlè va a ka a mèdèp, nga dérzlè va a ka te ngi-zuraʼa, te ma kita, te mwoy-ndo, te nsi ndo te va.

²² Nga dérzlè va a ka te nlèɓèslè, aman ka da sun Ndo nzi pèc pècèk.

²³ A pats nasa i da mbeɗa ta a ma te zhiklè te géɗèʼa, Ndo nzi pèc pècèk a gada; a tengaʼa ta da mbeɗkay a ma tʼherkeda.

²⁴ A herkeda a cko dau a barassa a mbar auda a va na Jizreel.

²⁵ I woy a i ngi a kokwar ga, Lo-Ruchama, a da siyè te va; a i gada na Lo-Ammi: Kinè ndohi ga, a nengaʼa a da gada: Zhiklè ga!