Osée 13 - Ma Zhiklè

¹ Aman Ephraim a ngoɗa, ko wawa a gudzai. Mbia nengaʼa te va ndohi Israel. Aman te deɓaʼa ta gu malai a Baal,

² a ta bazl ta. Antanta ta gi mali holholaʼa, ta gi zlèhi mʼmbèh skwai a verzhègenè, a ta viɗè mèzhèɓ skwi ta. Tèlèba ngwozlazlihi a ngau. Ta gaɗa: Na haha Zhiklè! Tengaʼa ndohai man ta zli skwai, ta kalahi a deɓ sak zlè.

Zhiklè a wara na di a Israel

³ Gar haha sèi ta ndi lèmèlèmè ara vani prèk, ara minmèn man a wush na, ara topok dau man kozlar a cedama a ma hedak,

⁴ ara vodzok man a bezkaɗa nvakavar. Iyè Ndo nzi pèc pècèk, Zhiklè ngaya, daga man ka te Egypte, ka sun Zhiklè ngiɗè bai, sèi iyè, ndo mʼmbel ndo ngiɗè a tsagi ga azɓai.

⁵ Iyè i ngats ka tʼhèshèkèɗ, i war ka te kokwar man iyam az te pa ɓai.

⁶ Aman ta ngots skwi nʼndai, a ta ngeza, ta gre gèɗ ta, i pca ta a gèɗ.

⁷ A i gu a sam ta ara marizhèlè, i pu va a tengaʼa ara kokoya a zolom civèɗ.

⁸ I kala ta va ara nvalaval man ta helama na wud na, a i cizlèma ta ndav. A kdadihi ta ndiaʼa, a skwi dak a nde ta ma.

⁹ I da gedas ka, Israel nda takaha ka wa?

¹⁰ Ani bi ngaya man a da mbel ka, tema? Wud bihi ngaya tèlèba, man ta ga ka kita, ta tema? Aman ka gada: Ngatsa nga bai, a wud bihai!

¹¹ Ndav a ndzayè a i va ka bai, a ndav a ndzayè holholaʼa, a i ckoɗauda zaʼa.

Kita a géɗ Ephraim

¹² Mali Ephraim a zhè dai, mali nengaʼa a zi azɓai.

¹³ A da ɗishèʼa ara ngwoz man a yi kra. Nengaʼa ara kra man a woykaɗ na auda tʼhwaɗ mam na ɓai.

¹⁴ I da porkoɗauda te ri wuɗi sam mʼmetsai. I da sumka ta a deɓa te ri mʼmetsai. Mʼmetsai, wuɗi ngaya tema? Sam mʼmetsai, ngédèshè ndo ngaya tema? Aman ndo a siyè te va azɓai.

¹⁵ Epraim, ko a wèl va te va kramamhi na, kozlar te civèɗ mvèng pats a slèmbèɗè, Ndo nzi pèc pècèk a saffka te civèɗ hèshèkèɗ, a ngwora thal iyam na, a gi a nlèlè iyam a she na, a nengaʼa a ceda skwi mèshèlè nengaʼa tèlèba a ma.

¹⁶ Samarie a ngu malai, a gèɗ man a ga na ma a va a Zhiklè na. Ta da bazl ta a tsakwal. Wudahi wa tengaʼa ta mbatsaha ta a sak, a ta cizlè ngwozi ta man ta a hwaɗ.