Osée 12 - Ma Zhiklè

¹ Ndohi Ephraim ta cèkèlma a tsagi ga tèlèba, a ndohi Israel ta ngwodyè. Aman Juda, nengaʼa a sam Zhiklè dai, a gshè va a Zhiklè nkezlaʼa dai.

² Ephraim a gshè va a kozlar, a hi a verzi kozlar civèɗ mvèng pats. Ta cèkèlma a ta gi metsar a ma ma. Ta derzla ma ta a ndohi Assyrie a ta da mbar a Egypte.

Mali Israel nhalaʼa

³ Ndo nzi pèc pècèk ta verslè a Juda, a da ga na Jacob ara skwi man a gau.

⁴ Daga man ta tʼhwaɗ mam ta dai, a ngseda kramam nengaʼa a hai. Aman ngra ma, a ta bozl va a Zhiklè;

⁵ ta bozl va a gol Zhiklè, a mfa na a gèɗ, a nkuɗau a ntsu rai aman a sia te va. Aman ta zlü gèɗ a Zhiklè te Bethel, a ta goɗ ngèɗè a vna.

⁶ Ndo nzi pèc pècèk, Zhiklè bi mbiaʼa, nasa nzlembaɗ nengaʼa.

⁷ Ka, sèi ka menkada deɓa a sam Zhiklè ngaya; gso va a mwoy-ndo a ngi-zuraʼa, zhor Bi Zhiklè ngaya!

⁸ Ephraim a nʼngwoda ndo te nlivè skwai, a woy a ndi ndo te pa.

⁹ Ephraim a gaɗa: i gaʼa a ndo mèshèlè, i ngots skwi ga. Te skwi man i büco tèlèba, i ga mali te pa ɓai.

¹⁰ Iyè Ndo nzi pèc pècèk, Zhiklè ngaya, daga man ka shkè auda te kokwar Egypte; i da mende ka a deɓa a gi maslaka zaʼa ara nte va nasa.

¹¹ A i gaɗa ta ma ga a ndohi nhadka ma, i ngra ta ma te nshunè, i ngra ta skwi a ma ndohi nhadka ma.

¹² Malai a zhè te Galaad; skwi nzuraʼa azɓai. Te Guilgal ta mbèh skwai a marai. Gar haha sèi ta ndedahi ara ndüdö te gi dau.

¹³ Jacob a hu na a kokwar Aram. Israel a ngu mizlinè a ngwoz, a wèr ɓokwai, aman a ngècè ngwoz.

¹⁴ Ndo nzi pèc pècèk a nhelka ta ndohi Israel auda te kokwar Egypte a ri ndo nhadka ma, a ndo nhadka ma a mɓüro.

¹⁵ Ephraim a mpoko na gèɗ ndav auda kumba. Zhiklè a da kalda na mali na a gèɗ man a nkuɗ ndo. Ndo nzi pèc pècèk a da pela ta skwi man ambaɓi man ta gau.