Osée 11 - Ma Zhiklè

Zhiklè a woy Israel

¹ Aman Israel a mvau a vata di ɓai, i woya kumba, a i bahka na kra ga auda te kokwar Egypte.

² Aman i baha ta, a mpoko ta gèɗ auda, a ta dè ta holholaʼa. Ta vau skwi a Baalhai, ta ndara ta skwi a vrihai.

³ Iyè man i senda ta ndè ndèr-ndèraʼa a ndohi Ephraim, a i gsa te rai. Aman ta woy a ta rka ɓai, ara man i mbel ta.

⁴ I bidka ta a sam ga a teɓa gumai, a teɓa mwoy-ndo. I pra ta rai, a i cèma ta wof nkelawa te daʼai auda, a i va ta skwi nʼndai.

⁵ Sèi ta minè a deɓa a kokwar Egypte asaɓai. Aman ndo Assyrie a da gi bi ta, a géɗ man ta woy a ta menkada deɓa a sam ga ɓai.

⁶ Tsakwal a da gedassa kokwarhi tengaʼa, a da bazl ta ndohai.

⁷ Ndohi ga ta dzawa te malai. I baha ta a deɓa a sam Zhiklè te géɗèʼa, ko staɗ a slèmbèɗè azɓai.

⁸ Ephraim, i jèke ka èhèmè? Israel, i pre ka èhèmè? I kwol ka ara Adma èhèmè, i ge ka ara Tseboim èhèmè? A mbeɗamay ndav, a ndaramay ndav tʼhwaɗaʼa.

⁹ I woy a i gi ndav a i gi a ndzoan azɓai, i woy a i gedassa Ephraim te deɓaʼa azɓai, te man i Zhiklè, ndo ka ɓai;

¹⁰ i kezla, i gédèshè ndo ka ɓai. Ta da jèjèr Ndo nzi pèc pècèk man a kuɗi ara marizhèlè. Aman a kuɗai, wudahi tʼherkeda a ma woyam mbiaʼa ta gudzai.

¹¹ Ta da shkè te kokwar Egypte ara ɗiakihai a ta gudzai, ara nkuɗhomhai te kokwar Assyrie, a i woy a i pe ta a deɓa a gi ta, Ndo nzi pèc pècèk a gaɗa.