Osée 10 - Ma Zhiklè

Kita Zhiklè a géɗ Israel

¹ Israel ara wof te gi lak mbelaʼa, man a yi wuda kumba. Ara man a yu wuda a ta mènè a ma ma, ta gu vri kumba. Ara man herkeda ta, ntila a ma ma, ta tila skwi mbèh skwi tengaʼa a ma ma.

² Ta pi gèɗ cèw. Aman sèi ta pil gèɗ! Zhiklè a da mbeɗa mblom tengaʼa, a mbatseda vrihi tengaʼa aussa.

³ Ta gaɗa: Bi nga azɓai, te man nga gi zlau Ndo nzi pèc pècèk azɓai. Bi a slaha a ntakaha nga a mè?

⁴ Ta goɗ ma ambalai, ta mbada a ncèkèlma, ta derzla ma ncèkèl-ma, a kita tengaʼa a fcè a sam tengaʼa ara kuza ambalai te gi dau.

⁵ Ndohi Samarie ta gudzai a géɗ marai te Beth-Aven. Ndohi tengaʼa ta kuɗi a géɗèʼa. Ndohi mvi skwi a marai ta lèyè nʼnjèl nengaʼa man ngedas na.

⁶ Marai, ta da da na bi mbiaʼa te Assyrie a skwi ɓèlè. Ephraim a ngècè hori a dai. Skwi man Israel a nhur a da giaʼa, a dzakaɓama na gèɗ.

⁷ Samarie ngedas na, bi a ngedas na ara ma slokof a géɗ iyam.

⁸ Mblom Israel a géɗ za ta gedas ta. Nkuɗdzarai a vatak a da grè a sam mblom tengaʼa! Ta da gada ta zahai: Va-pizla nga a pa! A ngègèɗhai: Va-mbeɗka nga a gèɗ!

Ko wawa da hoss Zhiklè!

⁹ Israel, ka gu malai daga man ka te Guibea! Te pa ta nza te malai. Var man a gs ta te Guibea a ndeva mali tengaʼa ɓai.

¹⁰ I kalka ma, aman i ga ta kita. A ndohi herkeda ta da ɓica va, a ta gi var a tengaʼa, a ta ga ta kita a géɗ mali tengaʼa cèw ba.

¹¹ Ephraim nara zlè man a slebau mpizhè. I kelawa na wof a daʼai nengaʼa mbelaʼa. Ephraim a wof te daʼai; Juda a da pizhè; Jacob a da mbèɗèʼa.

¹² Va-zlekau ngizuraʼa, va-ɓüco skwi te mwoy-ndo! Va-slebau skwi mɓuaʼa! Tidè sama ma, aman kin woy Ndo nzi pèc pècèk, a nengaʼa a shkè, a va kinè ngi-zuraʼa ara iyam.

¹³ Kin zlekau malai, kin ɓico skwi nzura ka ɓai. Kin ndau skwi man a shkè auda te ncèkèlma. Aman ka pu di a civèɗ ngaya, a ka pu ndav a ngul ndohi ngaya kumba,

Béthel ngedas na

¹⁴ nguzli var a ngu te kokwar ngaya, a zlazlar nengaʼa nʼngalaʼa ta mbeɗ ta. Ara Shalman-Beth-Arbel a ngedas na a pats var, aman ta keɗa mamaʼa a va wud na,

¹⁵ lèmèlèmè i da ga kinè, ndohi gi Israel, a géɗ shèwa kinè mbiaʼa. A prèk te gai, ta da keɗa bi Israel langa.