Osée 1 - Ma Zhiklè

¹ Ma man Ndo nzi pèc pècèk a gada na Osée, kra Beeri, te va man Ozias, Jotham, Achaz a Ezéchias ta gu bi te Juda, a Jéroboam, kra Joas, a ngu bi te Israel.

Ngwoz Osée a wudahi na

² Ma man Ndo nzi pèc pècèk a gaɗa na Osée nshèlèkuraʼa: Do a ka co fali ngwoz a ngwoz ngaya, a ka da yu fali wudahi te pa! Aman a vava kokwar a nʼngwode na ara fali ngwoz, a njèkeda Ndo nzi pèc pècèk.

³ A Osée a mdo, a nco Gomer, dem Diblaim, a ngwoz na.

⁴ A nengaʼa a nʼngots kra, a nyu kra nguraʼa. Ndo nzi pèc pècèk a ngaɗa na: Va na nzlembaɗ na Jizreel. Aman njèkè kètè dai, ndohi te gi Jehu sèi ta pela na gèɗ a Jizreel, a géɗ man ta bazl ta ndohi na, a i zede kokwar-bi Israel.

⁵ A pats nasa i da paslama ta lèkèɗ a ndohi Israel a dal var Jizreel.

⁶ A nʼngots kra zaʼa, a myu demaʼa. A ngaɗa na: Va na nzlembaɗ na Lo-Ruchama (i woya ɓai, a siyè te va asaɓai); aman Israel a da siyè te va a ma ma asaɓai, i da pra ta mali asaɓai.

⁷ Aman ndohi gi Juda ta da siyè te va, a iyè Ndo nzi pèc pècèk, Zhiklè tengaʼa, i da mbel ta. I da mbel ta a lèkèɗ a tsakwal a plèsh a ndohi plèsh ka ɓai.

⁸ Aman Lo-Ruchama a njèkeda nciɗ wa ma, mam na a nʼngots kra zaʼa, a nʼngots kra nguraʼa.

⁹ Ndo nzi pèc pècèk a ngaɗa: Va na nzlembaɗ na Lo-Ammi (ndohi ga ka ɓai); aman kinè ndohi ga ka ɓai, a iyè i Zhiklè kinè ka ɓai.