Nombres 8 - Ma Zhiklè

Aaron aʼtil skwi nfi vogwa

¹ Ndo nzi pèc pècèk a ngaɗa na ma haha a Moise:

² Gaɗa na Aaron aranta: Aman ka vi vogwa a sam skwi nfi vogwa, vogwa tsaraɗ da hela sam te gai, a ma skwi nfi vogwa.

³ A Aaron a ngau arsa. A mvau vogwa nengaʼa a ma skwi nfi vogwa, ara man Ndo nzi pèc pècèk a gada na te ma Moise.

⁴ Skwi nfi vogwa, ta vüɗo a guro, ko saka ba, a skwi nwurz-hè nengaʼa, tèlèba mviɗaʼa a guro. Lèmèlèmè ara Ndo nzi pèc pècèk a nʼngra na Moise te va nasa, ta gu skwi nfi vogwa arsa.

Ndohi Lévi, ta a Zhiklè

⁵ A Ndo nzi pèc pècèk a ngaɗa na Moise aranta:

⁶ Pe ta ndohi Lévi, te va ndohi Israel, a géɗ ta, a ka til ta!

⁷ Aman ka til ta, gu aranta: Guca ta iyam mprè malai a va, a ka shèma ta gwots auda a va tèlèba. A ta pana maslaka ta, a ta tila va ta arsa.

⁸ Te deɓaʼa ta da cè matsaraɗ marai, a movar, man ta va na Zhiklè a vna, gufa dau mbsomaʼa a mbar. Aman ka, ka da cè matsaraɗ marai ngiɗè a géɗ malai.

⁹ Te deɓaʼa baha ta ndohi Lévi, aman ta zlècè a ma gi mɓicè-va, a ka ɓic ta mpi ndohi Israel tèlèba.

¹⁰ Ka baha ta ndohi Lévi, a ta herda na va a Ndo nzi pèc pècèk, a ndohi Israel ta fa ta ri a gèɗ a ndohi Lévi.

¹¹ A Aaron a nzatseda ta ndohi Lévi a sam Ndo nzi pèc pècèk te di man a ndohi Israel, a mpe ta a mizlinè Ndo nzi pèc pècèk aranta.

¹² Te deɓaʼa ndohi Lévi ta nga ta ri a gèɗ a géɗ matsaraɗ marihai. A ka da zlaha na ngiɗè a Ndo nzi pèc pècèk a géɗ malai, ngiɗè ka ndara na, a skwi mpil gèɗ ndohi Lévi.

¹³ Ka baha ta ndohi Lévi a ta zlècè a sam Aaron, a sam wudahi nengaʼa, a ka Zlatseda ta a sam Ndo nzi pèc pècèk, a skwi man ka va na Zhiklè.

¹⁴ Ka pe ta ndohi Lévi te va ndohi Israel tèlèba a géɗ ta; aman ndohi Lévi, ta a ga.

¹⁵ Te deɓaʼa ndohi Lévi ta da gi mizlinè te gi mɓicè-va, a géɗ man ka til ta, a ka Zlatseda ta a Ndo nzi pèc pècèk a skwi man ka va na Zhiklè.

¹⁶ Ndohi Israel ta pokoy a iyè, te di man a tsuvomhi tengaʼa tèlèba, te di skwi nkaldeka ma hai tèlèba. I parka ta auda a ndohi ga.

¹⁷ Aman tsuvom Israel tèlèba a ga ga, ko ndohai, ko skwai. A pats man i bazl ta te kokwar Egypte, i kezl ta, a i ge ta a skwi ga,

¹⁸ a i hel ta ndohi Lévi a tsuvomhi Israel. I pe ta ndohi Lévi te di man a ndohi Israel,

¹⁹ a nda Aaron a wudahi nengaʼa, a ngi mizlinè a géɗ Israel te gi mɓicè-va, a ndohi Israel ta ngècè skwi mpil gèɗ; a matakwan a da ga ta asaɓai, aman ta herda va a sam nkezlaʼa.

²⁰ A Moise a Aaron a mpi ndohi Israel tèlèba ta gu a sam ndohi Lévi, ara man Ndo nzi pèc pècèk a njè na a gèɗ a Moise a géɗ tengaʼa. Ndohi Israel ta gu arsa a sam ta.

²¹ A ndohi Lévi ta til va ta, a ta pana maslaka ta. A Aaron a nzlatseda ta a sam Ndo nzi pèc pècèk ara skwi man a va na Zhiklè, a nʼngatsa ta skwi mpil gèɗ, aman a til ta.

²² Te deɓaʼa ndohi Lévi ta shkè, aman ta gi mizlinè tengaʼa te gi mɓicè-va, a verzi Aaron a wudahi nengaʼa. Ara man Moise a njè ta a géɗ ndohi Lévi, ta gu arsa a sam ta.

²³ A Ndo nzi pèc pècèk a ngaɗa na Moise aranta:

²⁴ Nasa ma a géɗ ndohi Lévi: A hinè te mvi 25, a ndè a ma ma, sèi ta gi mizlinè a sam gi mɓicè-va.

²⁵ Man mvi 50 ma, ta jèkeda mizlinè, ta ndohi mizlinè asakaɓai.

²⁶ Te deɓaʼa ta nza a ta takaha ta kramamhi tengaʼa a sam mizlinè tengaʼa te gi mɓicè-va, aman ta wèr kolongwai, aman ndo a dzhaɗ ta mizlinè asaɓai. Sèi ka gi ar haha a sam ndohi Lévi, a géɗ mizlinè Zhiklè tengaʼa.