Nombres 5 - Ma Zhiklè

Ma nkwèr Zliiklè a géɗ metsar, srak, skwi nhzhèʼa

¹ A Ndo nzi pèc pècèk a ngaɗa na Moise:

² Fa ta ma a gèɗ a ndohi Israel, a ta dzam ta ndohi hutsoɗ, a ndohi man mblè a va, a ndohi man ta lizhè va ta a sam nckondo, auda te va ndohai.

³ Ko ngurhi, ko ngwozai, kin dzam ta auda a samaʼa, a ta nzi tʼuda, a ta lizhè sam man i nzi a pa te ndev kinè azbai.

⁴ A ndohi Israel ta gu arsa, a ta dzam ta auda a samaʼa, ara man Ndo nzi pèc pècèk a njè na a gèɗ a Moise: a ndohi Israel ta gu arsa.

⁵ A Ndo nzi pèc pècèk a ngaɗa na Moise:

⁶ Gaɗa ta ndohi Israel: Ko nguraʼa, ko ngwoz, man agi malai, ara man ndohi ta giaʼa, a gi skwi man ambaɓai a sam Ndo nzi pèc pècèk, a mali a zhè a gèɗ ndo sa,

⁷ sèi ta ngreda mali man ta gau, a ta pil skwaʼa tèlèba, a ta vi skwi staɗ a vaʼa a verzi skwi 5, a ta va na ndo man ta gu metsar a sam na.

⁸ Aman ndo man ta pela na skwi azbai, ta va na a Zhiklè, a ndo mvi skwi a Zhiklè a cèʼa, lèmèlèmè ara drok man ta pil mali a vna, man ndo mvi skwi a Zhiklè a via a skwi mpil gèɗ.

⁹ A skwi man ta tsakala te va skwi nkezlaʼa tèlèba, man ta va na Zhiklè, man ndohi Israel ta ckoɗa a sam ndo mvi skwi a Zhiklè, ndo mvi skwi a Zhiklè a ngècèʼa.

¹⁰ A skwi man ndo a viaʼa, a va na Zhiklè, ndo mvi skwi a Zhiklè a ngècèʼa. Skwi ko mèmè man ta va na ndo mvi skwi a Zhiklè, a nengaʼa.

¹¹ A Ndo nzi pèc pècèk a ngaɗa na Moise:

¹² Gaɗa ta ndohi Israel: Aman ngwoz ndo ngiɗè agi mphömè a sam baki na,

¹³ a mʼmana a ndo ngiɗè, a baki nengaʼa a sun ɓai, ko ndo ngiɗè a sun mali na man a lizhè va na a vna bai, ndo a nʼngotso a géɗ mali ɓai,

¹⁴ aman te deɓ nengaʼa baki na a nʼngul srak te gèɗ na, a gi srak a sam ngwoz na, a gèɗ man a ngu malai – man bai baki na a nʼngul srak te gèɗ na, a gi srak a sam ngwoz na, ko man a nʼnga mali ɓai –

¹⁵ baki da ckodɗ ngwoz na a sam ndo mvi skwi a Zhiklè, da va na skwi a Zhiklè a géɗ ngwoz na: gufa dau agoda staɗ, da ga na mbar a va bai, ko burdi da ga na va bai, te man ta va na skwi a Zhiklè a géɗ srak; skwi man ta vau, aman Zhiklè a hér mali ngwoz.

¹⁶ A ndo mvi skwi a Zhiklè da baha na ngwoz, aman a zlècè a sam Ndo nzi pèc pècèk.

¹⁷ Te deɓaʼa ndo mvi skwi a Zhiklè da ɓalda iyam nkezlaʼa a shiɗèf. Da hul herkeda tʼhai te gi nkezlaʼa, da wusheda va iyam.

¹⁸ Te deɓaʼa ngwoz da zlatsa a sam Ndo nzi pèc pècèk, a ndo mvi skwi a Zhiklè da proko na salabi auda te gèɗ, da va na skwi man ta va na Zhiklè a gèɗ srak, a skwi man ta va na, aman a hér malai, a ri na. Ndo mvi skwi a Zhiklè a iyam mphomdaʼa man wobau a géɗèʼa, te rai.

¹⁹ A ndo mvi skwi a Zhiklè da gada na ngwoz, da mbada: Aman ndo ngiɗè a mʼmana a ka bai, aman ka ga mali a sam baki ngaya bai, va ngaya nlizhɓai, iyam mphomdaʼa haha man wobau a géɗèʼa, a ga ka skwa azbai.

²⁰ Aman ka gu mali a sam baki ngaya, a ka lizhè va ngaya, a ndo ngiɗè a mʼmana a ka…

²¹ Ndo mvi skwi a Zhiklè da gaɗa na ngwoz, da mbada: Ndo nzi pèc pècèk da phomda nzlembaɗ ngaya a mʼmbèdè a sam ndohi ngaya, aman a sheɓa ka hwaɗ a gèɗ, a derzlama ka godor,

²² a iyam mphomdaʼa haha man wobau a géɗèʼa, da tezama ka vayats, da sheɓa ka hwaɗ a gèɗ, da derzlama ka godor. A ngwoz da goɗa: Amen! Amen!

²³ Te deɓaʼa ndo mvi skwi a Zhiklè da windeda ma mphomdaʼa haha a ɗèlèwèr, da panda skwi mwindèa a va iyam mphomdaʼa.

²⁴ Te deɓaʼa da va na iyam mphomdaʼa man wobau a géɗèʼa, a ngwoz a nsiaʼa, da da na hwaɗ a nʼnga a wobau-mbiaʼa.

²⁵ Te deɓaʼa ndo mvi skwi a Zhiklè da co skwi man ta va na Zhiklè a gèɗ srak te ri ngwoz, da geda na gèɗ movar a sam di Ndo nzi pèc pècèk, da ckoɗa a sam mvi skwi a Zhiklè.

²⁶ Da hul gufa zlukri staɗ, a nkutèda a gèɗeʼa, a ndara na a sam mvi skwi a Zhiklè, a va na iyam a ngwoz a nsiaʼa.

²⁷ Aman a mva na iyam ma, va nengaʼa nlizhèa, a mʼmana a ndo ngiɗè, iyam mphomdaʼa a da na hwaɗ a ngi a wobau mbiaʼa, a sheɓa na hwaɗ a gèɗ, a derzlama na godor, a ngaʼa a ngwoz mphomdaʼa te va ndohai.

²⁸ Aman ngwoz nʼnga mali ɓai, va nengaʼa nlizhɓai, ar skwa a ga na azɓai, a slaha a ngècè kra.

²⁹ Nasa kita man a gèɗ srak, aman ngwoz ndo a gi mphöme, a lizhè va na.

³⁰ Man bai, aman baki a ngul srak te gèɗ na, a gi srak a géɗ ngwoz na, da cko ngwoz aman a zlècè a sam Ndo nzi pèc pècèk, a ndo mvi skwi a Zhiklè da ga na ara ma kita haha.

³¹ Ta fa na mali a gèɗ baki ngwoz azɓai. Aman ngwoz a ngècè kita a géɗ mali na.