Nombres 4 - Ma Zhiklè

Mizline ndohi Lévi

¹ A Ndo nzi pèc pècèk a ngaɗa na Moise a Aaron:

² Va-nger ta ndohi Kehath tèlèba te va ndohi Lévi, te verzi ta, te verzi ta, ara ndohi gi ta, ara ndohi gi ta,

³ a hinè te mvi 30 a ndè a ma ma, ha ndikè na ma mvi 50, ndohi mizlinè tèlèba man ta gi mizlinè a sam gi mɓicè-va.

⁴ Na haha mizlinè man ndohi Kehath ta gia a sam gi mɓicè-va: ta wèr di sam nkezli nkezlaʼa.

⁵ Aman ndohi Israel ta dè a ma ma, Aaron a wudahi nengaʼa sèi ta dè a gai, ntʼhwaɗaʼa, a ta cè na maslaka auda a ntamagai, a ta fa na a deɓa a koti ma kita.

⁶ A ta mbè na bkwi bhual a deɓa, a ta va na maslaka mʼmadza a deɓa zaʼa, a ta tarda gada a tsagiaʼa.

⁷ Table movar nkezlaʼa ba, sèi ta pizlèda pa a maslaka mʼmadzaʼa. A ta peda shiɗèf a gandaf a kokwai a ndèlèk mbèd iyam a géɗ table.

⁸ Skwi haha tèlèba sèi ta pizlèda pa a maslaka vèvèzh, a ta mbè a pa a bkwi bhwal, a ta tarda gada a tsagiaʼa.

⁹ Te deɓaʼa sèi ta pizl ta skwi nfi vogwa a gandaf a pidök a hototokaʼa a ndèlèk mbar man ta gi mizlinè a vna a samaʼa, a maslaka mʼmadzaʼa.

¹⁰ A ta paɗda pa a bkwi bhwal, a ta manda a kaf, a ta zhüɓèʼa a vna.

¹¹ Sam mvi skwi a Zhiklè nʼngaʼa a guro, sèi ta pizlèda pa a maslaka mʼmadzaʼa, a ta mbè na bkwi bhwal a deɓa, a ta pi a deɓ kaf man ta zhüɓèʼa a vna.

¹² Ta da hil kolongwi tèlèba man ta gi mizlinè a vna a sam nkezlaʼa, a ta paɗda pa a maslaka mʼmadzaʼa, a ta pizlèda pa a bkwi bhual, a ta manda a kaf.

¹³ Te deɓaʼa ta patsa na mèrwèc auda a sam nʼndèr skwi a Zhiklè, a ta pizlèda pa a a maslaka vèvèzh,

¹⁴ a ta pa na kolongwi a deɓa, man ta gi mizlinè a vna: shiɗèf, magats, kizlèɗ züdo, kokwi nguc Pombaz, kolongwi sam mvi skwi a Zhiklè tèlèba, a ta mbè na bkwi bhwal a deɓa, a ta tarda gada a tsagiaʼa.

¹⁵ Aman ndohi Israel ta dè a ma ma, a Aaron a wudahi nengaʼa ta ɓicè kolongwi nkezlaʼa tèlèba ma, a ta paɗda kolongi mizlinè nengaʼa a pa tèlèba, ndohi Kehath ta shkè a ta zhüɓèʼa. Aman sèi da lama na skwi nkezlaʼa ɓai, man ɓai ta mets ta. Nasa mizlinè ndohi Kehath a sam gi mɓicè-va.

¹⁶ Mizlinè Eléasar, kra Aaron, ndo mvi skwi a Zhiklè, a haha: a til mbar skwi nfi vogwa; a ɓurdi man ta ndara na Zhiklè; a movar man ta va na Zhiklè a nciɗ sam a nciɗ sam, a mbar man ta fèɗè a va; a ɓer gi tèlèba, a skwi te pa, a kolongwi nkezlaʼa, a skwi mizlinè man ta gi mizlinè a vna a samaʼa.

¹⁷ A Ndo nzi pèc pècèk a ngaɗa na Moise a Aaron:

¹⁸ Va-gu maya, a verzi ndohi Kehath da zakaɗ ta auda te va ndohi Lévi ɓai!

¹⁹ Va-gu maya ar haha: aman ta dè a sam nkezli nkezlaʼa, aman ta nzi a nshèffè, a ta metsi ta azbai, Aaron a wudahi nengaʼa do do a gi nshèlèkuraʼa, a ta ngra na mizlinè a ndo staɗ staɗ tèlèba, a skwi man ta zhüɓèʼa.

²⁰ Aman tengaʼa ta dè a gi azɓai, sèi man koti mpizlèa pa ma. Man ɓai ta metsi ta.

²¹ A Ndo nzi pèc pècèk a ngaɗa na Moise:

²² Nger ta ndohi Guershon lèmèlè-mè arsa, te verzi ta, ara ndohi gi ta, ara ndohi gi ta,

²³ a hinè te mvi 30 a ndè a ma ma, ha ndikè na ma mvi 50. Ka nger ta ndohi mizlinè tèlèba man ta gi mizlinè a sam gi mɓicè-va.

²⁴ Na haha mizlinè ndohi te verzi Guershon, a skwi man ta giaʼa, aman ta zhüɓèʼa:

²⁵ Maslaka gai, a gi nkezlaʼa, a maslaka a géɗ giaʼa, a bkwi bhwal, man a deɓaʼa, a maslaka a ntamagi nkezlaʼa,

²⁶ a maslaka a der gai, a maslaka man a dalmagai nʼngalda pa, man a tèuda gi a sam mvi skwi a Zhiklè a pa, a teɓa nengaʼa, a kolongwi tèlèba man ta gi mizlinè a vna. Mizlinè haha tèlèba, sèi ta giaʼa.

²⁷ Ndohi Guershon sèi ta gi mizlinè ta, ara man Aaron a wudahi na ta ngra ta, a géɗ skwi man ta zhüɓèʼa, a géɗ mizlinè man ta giaʼa. Va-ngra ta mizlinè a ndo staɗ staɗ tèlèba, ara man a giaʼa.

²⁸ Na haha mizlinè ndohi te verzi Guershon a sam gi mɓicè-va. Ithamar, kra Aaron, ndo mvi skwi a Zhiklè, a ɓer mizlinè tengaʼa.

²⁹ A ka nger ta ndohi Merari ba, te verzi ta, te verzi ta, ara ndohi gi ta, ara ndohi gi ta,

³⁰ a hinè te mvi 30 a ndè a ma ma, ha ndikè na ma mvi 50, ka nger ta tèlèba, man ta gi mizlinè a sam gi mɓicè-va.

³¹ Na haha mizlinè tengaʼa a sam gi nkezlaʼa: Ta zhüɓ kaf a skwi nderzlè kaf, sak gai, a sak kaf,

³² sak dalmagi nʼngalaʼa, a sak kaf nengaʼa, a cègwèd, a teɓa, a kolongwi te pa tèlèba, a kolongwi tengaʼa man ta gi mizlinè a vna. Va-ngreda ta nzlembaɗ skwi staɗ staɗ tèlèba man ta zhübèʼa.

³³ Nasa mizlinè ndohi te verzi Merari, tèlèba man ta gia a sam gi mɓicèva, a verzi Ithamar, kra Aaron, ndo mvi skwi a Zhiklè.

³⁴ A Moise a Aaron a tsuvomhi mpi ndohai ta nger ta ndohi Kehath, te verzi ta, te verzi ta, ara ndohi gi ta, ara ndohi gi ta,

³⁵ a hinè te mvi 30, a nde a ma ma, ha ndikè na ma mvi 50, ndohi mizlinè tèlèba man ta gi mizlinè a sam gi nkezlaʼa.

³⁶ Ndohi man ta nger ta, te verzi ta, te verzi ta, 2.750.

³⁷ Nasa ndohi man ta par ta te va ndohi Kehath, tèlèba man ta gu mizlinè a sam gi nkezlaʼa, man Moise a Aaron ta par ta, ara man Ndo nzi pèc pè-cèk a njè na a gèɗ a Moise.

³⁸ A ndohi Guershon ba ta par ta, te verzi ta, te verzi ta, ara ndohi gi ta, ara ndohi gi ta,

³⁹ a hinè te mvi 30 a ndè a ma ma, ha ndikè na ma mvi 50, ndohi mizlinè tèlèba, aman ta gi mizlinè a sam gi nkezlaʼa.

⁴⁰ Ndohi man ta nger ta, te verzi ta, te verzi ta, ara ndohi gi ta, ara ndohi gi ta, 2.630.

⁴¹ Nasa ndohi man ta par ta te va ndohi Guershon, tèlèba, man ta gi mizlinè a sam gi nkezlaʼa, man Moise a Aaron ta par ta, ara man Ndo nzi pèc pècèk a goɗa.

⁴² A ndohi Merari ba ta par ta, te verzi ta, te verzi ta, ara ndohi gi ta, ara ndohi gi ta,

⁴³ a hinè te mvi 30, a ndè a ma ma, ha ndikè na ma mvi 50, ndohi mizlinè tèlèba, aman ta gi mizlinè a sam gi nkezlaʼa.

⁴⁴ A ndohi man ta nger ta, te verzi ta, te verzi ta, 3.200.

⁴⁵ Nasa ndohi man ta par ta te va ndohi Merari, man Moise a Aaron ta par ta, ara man Ndo nzi pèc pè-cèk a njè na a gèɗ a Moise.

⁴⁶ Ndohi man ta par ta tèlèba te va ndohi Lévi, a tsuvomhi Israel, man Moise a Aaron ta par ta, te verzi ta, te verzi ta, ara ndohi gi ta, ara ndohi gi ta,

⁴⁷ a hinè te mvi 30 a ndè a ma ma, ha ndikè na ma mvi 50, tèlèba man to do a ta gi mizlinè te gai, a mizlinè nzhüɓ skwi a sam gi nkezlaʼa –

⁴⁸ ndohi man ta par ta tèlèba, 8.580.

⁴⁹ A ta va na mizlinè a ndo staɗ staɗ tèlèba, ara man Ndo nzi pèc pècèk a gada na Moise. A ta ngra na skwi man ta giaʼa a ta zhübèʼa a ndo staɗ staɗ tèlèba, ara man Ndo nzi pèc pècèk a goɗ te ma Moise.