Nombres 35 - Ma Zhiklè

Kokwar ndohi Lévi

¹ A Ndo nzi pèc pècèk a ngaɗa na Moise, a dal Moab, a ma woyam Jourdain, zuraʼa a Jéricho, ar haha:

² Fa ta ma a gèɗ a ndohi Israel, aman ta va ta kokwar a ndohi Lévi, aman ta nzi a pa, te di skwi nʼndi gi tengaʼa. A kin va ta sam mwèr skwai a tsagi kokwar a vaʼa.

³ Kokwar, aman ta nzi a pa, sam mwèr skwi a tsagiaʼa, a skwi ta, a kolongwi, a skwi ngwi tèlèba.

⁴ Sam a dal kokwar man kin da va ta ndohi Lévi, va-lüv samaʼa, a hiné te zlazlar kokwar, a tsi ri 2.000.

⁵ A dal kokwar, te civèɗ mvèng pats, a tsi ri 2.000; te civèɗ ndè iyam, a tsi ri 2.000; te civèɗ nkèl pats, a tsi ri 2.000; te civèɗ te man a géɗèʼa, a tsi ri 2.000, kokwar te ndevaʼa. Nasa kuma kokwar ta, a sam mwèr skwi ta.

⁶ Te va kokwarhi man kin da va ta ndohi Lévi, kokwar matarai 6, a kin va ta, a ndo nkeɗe ndo a nhi a pa. A kin pa ta kokwar a vaʼa 42.

⁷ Kokwar tèlèba man kin da pa ta ndohi Lévi: 48, kokwar, a sam mwèr skwai.

⁸ Sam man kin va ta a haha, kin cè te va skwi nʼndi gi Israel. A sam tengaʼa man ta ngots herkeda kumba, kin cè auda kumba. A sam tengaʼa man ta ngots ketè genè, kin cè kètè genè. Ndo staɗ staɗ da vau kokwar te skwi nʼndi gi nengaʼa man a ngotso, a ndohi Lévi.

Kokwar matarai

⁹ Ndo nzi pèc pècèk a ngaɗa na Moise a vaʼa:

¹⁰ Gaɗa ta ndohi Israel ar haha: Aman kin tawaɗa woyam Jourdain, a kin ndika a kokwar Canaan ma,

¹¹ va-woy kokwar man ta giaʼa a kokwar matarai. Ndo man a nkeda ndo, man nʼnga na a rai, a da hi a pa.

¹² A kokwarhi sa ta ga kinè a sam nlèaʼa. Ndo man a hèsh skwi mpil gèɗ, a ndo nkeɗe ndo, a metsi azbai, ga ta ngela na kita a gèɗ a sam mpi ndohai.

¹³ Kokwarhi man kin da pa ta, kokwar matari 6.

¹⁴ Kin da pa ta makar te wud woyam Jourdain, makar te kokwar Canaan, a kokwar matarai.

¹⁵ Kokwar matari 6 haha, ta gi a sam ndohi Israel nlèaʼa, ko ndo mbrok, ko ndo te verzi tsaɗ man a zhè te ndev ndohi Israel, ko wawa man ndo a ga na a rai, a hi a pa.

¹⁶ Aman a nkeda ndo, a züdo, a ndo sa a mʼmets na, nasa ndo nkeɗe ndo. Ndo nkeɗe ndo, sèi ta keɗaʼa.

¹⁷ Aman a nkolo a kwa, a mʼmets na, nasa ndo nkeɗe ndo. Ndo nkeɗe ndo, sèi ta keɗaʼa.

¹⁸ Aman a ntsau a gada wof, a mʼmets na, nasa ndo nkeɗe ndo. Ndo nkeɗe ndo, sèi te keɗaʼa.

¹⁹ Ndo man a woya aman a ta pela na, da kuɗo. Aman ta zli gèɗ a vna, da keɗa langa.

²⁰ Aman a ntsau a shèwa, a nʼnga na a ri ka bai, a mʼmets na,

²¹ man bai aman a ntsau ara ndo mayam na, a rai, a ngiɗè a mʼmets na, sèi ta keɗa ndo ntsau, nengaʼa ndo nkeɗe ndo. Ndo man a woya aman a ta pela na, da kuɗo, aman ta zli gèɗ a vna.

²² Aman a ntsau ambalai, a mayam ka bai, aman a nkolo a kwa, a ndza na, nsenaha bai,

²³ man bai kwa a kala na gèɗ, a mʼmets na, a nkolo a ri ka bai, a ndo a mʼmets na, nengaʼa ndo mayam na ka bai, a woya a ga na skwi ambaɓiaʼa bai,

²⁴ mpi ndohi da bazla kita te ndev ndo nkeɗaʼa a ndo man a woya aman a ta pela na, ara ma nkwèr haha.

²⁵ Mpi ndohai da prokodi ndo nkeɗe ndo auda te ri ndo man a woya aman a ta pela na, a ta va na civèɗ a deɓa a kokwar matarai man a hu a pa. A da nzi te pa, ha bi ndohi mvi skwi a Zhiklè a mʼmets na, man ta bada na mbar nkezlaʼa a gèɗ.

²⁶ Aman ndo nked ndo a shkè auda te kokwar matarai, man a hu a pa,

²⁷ a ndo man a woya aman a ta pela na a ngècèʼa a dal kokwar matarai, a nkeda ndo nkeɗe ndo sa, mali na ka ɓai.

²⁸ Ndo nkeɗe ndo sa sèi a nzi a kokwar matarai, ha bi ndohi mvi skwi a Zhiklè a mʼmets na. Te deɓ mʼmetsi bi ndohi mvi skwi a Zhiklè, a slaha a minè a deɓa a kokwar na.

²⁹ Nasa ma kita kinè te verzi wud wud kinè te kokwar kinè tèlèba.

³⁰ Ko wawa man a ntsu ndo, ndohi malwuɗihi ta zhè, aman ta gi kita. Aman ta keɗa ndo a gèɗ ma malwuɗi stadgenè ka bai.

³¹ A kin co skwi mpil nshèffè ndo nkeɗe ndo bai, sèi ta keɗaʼa.

³² Ndo man a woya a ndè a kokwar matarai azɓai, a woya aman a shkè a deɓa a nzi a kokwar na, a mpilèʼa, ha ndo mvi skwi a Zhiklè mbiaʼa a mʼmets na, kin co bai!

³³ Kin lizha kokwar man kin nza te pa bai! Ndo nkeɗe ndo a lizhè kokwar, a kokwar a ngècè skwi mpil gèɗ azbai, sèi man ta keɗa ndo nkeɗe ndo.

³⁴ Kin lizha kokwar man kin da nzi a pa, kokwar man kin nzi a ndevaʼa, bai; te man iyè, Ndo nzi pèc pècèk, i da nzi a ndev ndohi Israel.