Nombres 34 - Ma Zhiklè

Nkezli kokwar

¹ A Ndo nzi pèc pècèk a ngaɗa na Moise:

² Fa ta ma a gèɗ a ndohi Israel, a ka gada ta: Aman kin da dè a kokwar man a gi a skwi nʼndi gi kinè, kokwar Canaan, a kuma ngiɗè a ndè a kuma ngiɗè.

³ Kuma te civèɗ dukwad: Hèshèkèd Tsin, a ma Edom; a ndikè a sam woyam mbiaʼa, te civèɗ mvèng pats.

⁴ A dè a ma a civèɗ dukwad, a njèjèr hèshèkèɗ Tsin, a ndè a der za Akrabbim, a ndè a ma ma a Kades-Barnea, ha a ndikè a Hatsar-Addar, a bizhè auda a Atsmon,

⁵ a ndè a ma woyam Egypte, a ndikè a ma woyam mbiaʼa.

⁶ Kuma te civèɗ nkèl pats: woyam mbiaʼa, nasa kuma kinè te civèɗ nkèl pats.

⁷ Kuma te man a géɗèʼa: Te woyam mbiaʼa, a ndè a za Hor,

⁸ te za Hor, a ndè a civèɗ Hamath, ha ndikè a Tsedad.

⁹ A ndè a ma ma a Ziphron, ha ndikè a Hatsar-Enan. Nasa kuma kinè te civèɗ te man a géɗèʼa.

¹⁰ Kuma te civèɗ mvèng pats a hinè te Hatsar-Enan, ha ndè Shepham.

¹¹ A dè hai a Shepham, a civèɗ ndè Ribla, a tsagi Ain, te civèɗ mvèng pats, a dè hai a ma woyam mbiaʼa Kinnéreth, te civèɗ mvèng pats.

¹² A dè a ma woyam Jourdain, ha ndikè a ma iyam mbiaʼa, iyam boma. Nasa kuma man a tèuda kokwar kinè a pa.

¹³ A Moise a mfa ta ma a gèɗ a ndohi Israel ar haha: Nasa kokwar man kin da kezli a va kinè a jimèr, man Ndo nzi pèc pècèk a gada a da va ta ndohi te verzi Israel tsaɗ tsaɗ, verzi 9 a rètaʼa.

¹⁴ Ndohi te verzi Ruben, ara ndohi gi ta, ara ndohi gi ta, ndohi te verzi Gad, ara ndohi gi ta, ara ndohi gi ta, a rèta ndohi Manassé ta ngots skwi nʼndi gi ta ma.

¹⁵ Verzi ndohi cèw a rètaʼa, ta co skwi nʼndi gi ta a ma woyam Jourdain, te wud nana, te civèɗ mvèng pats, zuraʼa a Jericho.

¹⁶ Te deɓaʼa Ndo nzi pèc pècèk a ngaɗa na Moise aranta:

¹⁷ Na haha nzlembaɗ ndohi man kin da kezli kokwar a va kinè; Eleazar, ndo mvi skwi a Zhiklè, a Josué, kra Nun, ta da kezliaʼa.

¹⁸ Tsuvomaʼa, te verzi staɗ staɗ tèlèba, tsuvomaʼa staɗ, da takaha kinè a nkezli kokwar.

¹⁹ Na haha nzlembaɗ ndohi sa: te verzi Juda, Caleb, kra Jephunné.

²⁰ Te verzi Siméon, Samuel, kra Ammihud.

²¹ Te verzi Benjamin, Elidad, kra Kislon.

²² Te verzi Dan, Buki, kra Jogli.

²³ Te verzi Joseph, a géɗ Manassé: Hanniel, kra Ephod.

²⁴ A géɗ Ephraim, Kemuel, kra Shiphtan.

²⁵ Te verzi Zabulon, Elisphan, kra Parnac.

²⁶ Te verzi Issacar, Paltiel, kra Azzan.

²⁷ Te verzi Aser, Ahihud, kra Schelumi.

²⁸ Te verzi Nephthali, Pedahel, kra Ammihud.

²⁹ Nasa ndohi man Ndo nzi pèc pècèk a ngaɗa ta, a ta kezli kokwar Canaan a va ndohi Israel.