Nombres 32 - Ma Zhiklè

Ndohi Ruben a ndohi Gad a ma woyam Jourdain, te civèɗ mveng pats

¹ A ndohi Ruben a ndohi Gad ta ngots rèwè skwi mbiaʼa. Ta rkaʼa, kokwar Jaezer a kokwar Galaad, sam mwèr skwi a zhè te pa.

² A ndohi Gad a ndohi Ruben ta shke a sam Moise a Eléazar, ndo mvi skwi a Zhiklè, a sam tsuvom mpi ndohai, a ta gada ta:

³ Atharoth, Dibon, Jaezer, Nimra, Hesbon, Eleale, Sebam,

⁴ Nebo a Beon, kokwar man Ndo nzi pèc pècèk a mpa ta a ri ndohi Israel, sam mwèr skwai. Anai ɓèlèlihi kine ta ngots rèwè skwai.

⁵ Aman nga ngots pombai a sam ngaya, va ta kokwar sa a ɓèlèlihi ngaya, a ta nzi a pa. Ka de nga a wud woyam Jourdain asaɓai!

⁶ Te deɓaʼa Moise a ngaɗa ta ndohi Gad a ndohi Ruben: Gwoli kinè ta dè var, a kinè kin nzi a haha dè?

⁷ Kin mbeɗama ta ndav a ndohi Israel, a kin gedassa civèɗ tengaʼa a ta dè a kokwar man Ndo nzi pèc pècèk a va ta azbai, èhèmè?

⁸ Babhi kinè ta gau arsa, man i zlinde ta te Kades-Barnea, aman ta ngél di a kokwar.

⁹ To do a slrats Eshcol, a ta rka kokwar; te deɓaʼa ta mbeɗama ta ndav a ndohi Israel, a ta woy a ta dè a kokwar man Ndo nzi pèc pècèk a va ta, asaɓai.

¹⁰ A Ndo nzi pèc pècèk a ngu ndav te va nasa, a goɗ a mbèɗè:

¹¹ Ndohi man ta shkè auda te kokwar Egypte, a hinè te mvi 20 a ndè a ma ma, ta da rka herkeda man i pasla ta ri a hi a mʼmbèɗè a Abraham, Isaac a Jacob, asaɓai, a géɗ man ta dozodzor ma ga tèlè ɓai;

¹² sèi Caleb, kra Jephunné, ndo Keniz, a Josué, kia Nun. Tengaʼa ta dzodzor Ndo nzi pèc pècèk a sam tèlèba.

¹³ A Ndo nzi pèc pècèk a ngu ndav worworaʼa a géɗ Israel, a nzlinde ta ndohi Israel, a ta sawala tʼhèshèkèɗ mvi 40, ha ndohi tèlèba man ta gu malai a sam Ndo nzi pèc pècèk ta ndev ta ma.

¹⁴ Antanta kinè a zhè te di man a babhi kinè, wud ndohi malai, a kin poko na gèɗ ndav auda a Ndo nzi pèc pècèk, a ngi ndav holholaʼa.

¹⁵ Aman kin da jèkeda nengaʼa zaʼa, a de kinè a deɓa a hèshèkèɗ, a ndohi haha tèlèba ta da zi ta a géɗ kinè.

¹⁶ A ta herda na va a Moise, a ta gaɗa na: Na haha, nga da ngèl zlazlar a skwi nga, a nga gi gi wudahi nga.

¹⁷ Aman nga, nga dè var a verzi ndohi Israel, ha ta ndikè a sam nʼnzi ta. Aman wudahi nga ta da nzi a kokwar nʼngalaʼa, a géɗ ndohi kokwar man ta a tsagi ta.

¹⁸ Nga shkè a deɓa a ngwi azbai, sèi a pats man ndohi Israel staɗ staɗ tèlèba ta ngots skwi nʼndi gi ta.

¹⁹ Aman nga woy skwi nʼndi gi te wud woyam Jourdain, ko a ndè a ma ma, asaɓai. Skwi nʼndi gi nga, nga ngots te wud nana, te civèɗ mvèng pats.

²⁰ A Moise a ngaɗa ta: Aman kin da gi ar haha, a kin dè var a ma Ndo nzi pèc pècèk,

²¹ aman staɗ staɗ te ndev kinè, a skwi var a va, a tawaɗa woyam Jourdain a ma Ndo nzi pèc pècèk, ha nga dzam ta mayamhi nga tèlèba,

²² a Ndo nzi pèc pècèk a nduma kokwar tèlèba ma, a kin shkè ngwi te deɓaʼa, mali kinè asaɓai a sam Ndo nzi pèc pècèk, a sam ndohi Israel. A herkeda a gi a skwi kinè a sam Ndo nzi pèc pècèk.

²³ Aman kin da gi arsa azbai, kin gu mali a sam Ndo nzi pèc pècèk, a kin da suna, kita a da gs kinè.

²⁴ Va-gu gi wudahi kinè, va-ngala zlazlar skwi kinè, va-gu ara man kin goɗa.

²⁵ A ndohi Gad a ndohi Ruben ta gada na Moise: ɓèlèlihi ngaya ta da gi ara man bi nga a godo.

²⁶ Wudahi nga, a ngwozi nga, rèwè skwi nga, skwi kudom nga, sèi ta nzi a kokwar Galaad;

²⁷ aman ɓèlèlihi ngaya tèlèba man ndohi var, ta dè var a ma Ndo nzi pèc pècèk, ara man bi nga a goɗo.

²⁸ A Moise a ngaɗa na Eléazar, ndo mvi skwi a Zhiklè, a Josué, kra Nun, a tsuvom ndohi gi te verzi Israel, a géɗ tengaʼa.

²⁹ Moise a ngaɗa ta: Aman ndohi Gad a ndohi Ruben, ndohi var tèlèba, ta dè var a ta tawaɗa woyam Jourdain a nda kinè a ma Ndo nzi pèc pècèk, a kin duma kokwar ma, va-va ta kokwar Galaad a skwi ta.

³⁰ Aman ta dè var a nda kinè azbai, ta da nzi a kokwar Canaan, te ndev kinè.

³¹ A ndohi Gad a ndohi Ruben ta mbeda na a ma, a ta gaɗa: Skwi man Ndo nzi pèc pècèk a ngaɗa ta ɓèlèlihi ngaya, nga da giaʼa!

³² Nga, nga dè var a ma Ndo nzi pèc pècèk, a kokwar Canaan. Aman skwi nʼndi gi nga a zhè a ma woyam Jourdain, te wud nana.

³³ A Moise a mva ta kokwar bi Sihon, bi Amor, a kokwar bi Og, bi Basan, sam kokwar, a nda kokwar a samaʼa a tsagiaʼa tèlèba, a ndohi Gad a ndohi Ruben, a rèta ndohi Manassé, kra Joseph.

³⁴ A ndohi Gad ta rom Dibon, Atharoth, a Aroer,

³⁵ Athroth-Shophan, Jaezer, Jogbeha,

³⁶ Beth-Nimra a Beth-Haran, ta ngal ta a pa, a ta gu zlazlar rèwè skwi ta.

³⁷ A ndohi Ruben ta rom Hesbon, Eleale a Kirjathaim,

³⁸ Nebo a Baal-Meon, a ta humbaɗa nzlembaɗ kokwar Baal, a Sibma; a ta va ta nzlembaɗ mɓuaʼa a kokwarhi man ta roma.

³⁹ A wudahi Makir, kra Manassé, to do a ta gu var a Galaad, a ta dumaʼa, a ta dzam ta ndohi Amor man ta nza te pa.

⁴⁰ A Moise a mva na kokwar Galaad a Makir, kra Manassé, a nengaʼa a nʼnza a pa.

⁴¹ Te deɓaʼa Jair, kra Manassé, a ndo a nduma kokwarhi man a tsagi kokwar mbiaʼa, a mbaha ta kokwar Jair.

⁴² Te deɓaʼa Nobach a mdo a nduma Kenath a kokwarhi man a tsagiaʼa, a mbaha na Nobach, a nzlembaɗ na.