Nombres 31 - Ma Zhiklè

Ndohi Israel ta bazl ta ndohi Madian

¹ A Ndo nzi pèc pècèk a ngaɗa na Moise:

² Sèi ka dè aman ndohi Madian ta pela ta gèɗ a ndohi Israel. Te deɓaʼa ka da metsi ngaya a va babhi ngaya.

³ A Moise a ngaɗa ta ndohai: Va-par ta ndohi te ndev kinè, aman ta da gi var a ndohi Madian, aman ndohi Madian ta pil gèɗ, ara man Ndo nzi pèc pècèk a dzhoɗo.

⁴ Te verzi Israel staɗ, te verzi Israel staɗ, ndohi gozhèm staɗ, va-zlinde ta a var!

⁵ A ta par ta te va ndohi Israel gozhèm gozhèm, te verzi staɗ staɗ tèlèba, gozhèm staɗ, a gi 12.000 man ta dè var.

⁶ Moise a nzlinde ta a var, ndohi gozhèm te verzi staɗ; Phinées, kra Eleazar, ndo mvi skwi a Zhiklè, a nzuɓ kolongwi nkezlaʼa a tolom var te rai.

⁷ A ta gu var a nda ndohi Madian, ara man Ndo nzi pèc pècèk a njè na a gèɗ a Moise, a ta bazl ta ngurhi tèlèba.

⁸ A va ndohi tèlèba, ta bazla bihi Madian zlam: Evi, Rékem, Tsur, Hur a Réba, bihi Madian zlam. Te deɓaʼa ta keɗa Balaam, kra Beor, a tsakwal.

⁹ Te deɓaʼa ndohi Israel ta ge ta ngwozi Madian a wudahi tengaʼa a ɓèlè. Skwai, a zlèhai, skwi gi tèlèba, a kolongwi gi tèlèba, ta heldama a skwi ndümè.

¹⁰ A kokwarhi tengaʼa, a gi tengaʼa, a zlazlar tengaʼa tèlèba, ta fa na vogwa,

¹¹ a ta dumda ma tèlèba, ndohai, a skwihai,

¹² a ta hulkoɗi skwi man ta dumkodai tèlèba, a bèlèlihi ba a sam Moise, a sam Eléazar, a sam mpi ndohi Israel, a dal Moab, a ma woyam Jourdain, zuraʼa a Jericho.

Ntil skwi ndümè

¹³ Moise, a Eléasar, ndo mvi skwi a Zhiklè, a tsuvomhi mpi ndohai to do aman ta zli gèɗ a nda ta a dal kokwar.

¹⁴ A Moise a ngu ndav a géɗ tsuvom ndohi 1.000, a tsuvom ndohi 100, man ta shkè ngwi te var.

¹⁵ A Moise a ngaɗa ta: Kin jèka ta nshèffè a ngwozi dè?

¹⁶ Tengaʼa man ta pe ta ndohi Israel a wai a ma Balaam, a ta gu mali a sam Ndo nzi pèc pècèk, a géɗ Peor, a Ndo nzi pèc pècèk a mfaha ta matakwan a ndohi tèlèba.

¹⁷ Anai va-bazla wudahi ngurhi tèlèba, a ngwozi tèlèba man ta gu baki ma.

¹⁸ Aman dalahi nkè-shèa man ta sun baki di bai, va-jèka ta nshèffè, a géɗ kinè.

¹⁹ Aman kinè, kin shkè ngwi di bai, va-nza a dal kokwar mʼmèn tsaraɗ! Ko wawa man a keɗa ndo, man bai a lama na ndo mʼmetsaʼa, va-pana mali kinè, te mʼmèn mamakraʼa, te mʼmèn matsaraɗaʼa, kinè a ɓèlèlihi kinè!

²⁰ Maslaka tèlèba, a hutèd tèlèba, a bkwi ɓok tèlèba, kolongwi wof tèlèba, vo-ponko mali auda te pa!

²¹ Te debaʼa Eléazar a ngaɗa ta ndohi var man to do var sa: Nasa ma nkwèr a ma kita man Ndo nzi pèc pècèk a njè na a gèɗ a Moise:

²² Guro, gurso, züdo, verzhègenè,

²³ skwi tèlèba man vogwa a ndi azbai, va-bezda a ndev vogwa, te deɓaʼa mwosla; aman sèi ta ponko mali auda te pa dai, a iyam mpèn malai.

²⁴ Maslaka kinè ba, va-panaʼa, te mʼmèn matsaraɗaʼa, a kin pana te malai. A kin shkè a deɓa a hwaɗ kokwar.

Nkezli skwi ndümè

²⁵ Ndo nzi pèc pècèk a ngaɗa na Moise:

²⁶ Nger ta ndohi man ta ge ta a ɓèlè, a skwihi man ta dumkoɓi tèlèba! Kinè a Eléazar, ndo mvi skwi a Zhiklè, a tsuvomhi ndohi gai ndohi gai te mpi ndohi tèlèba.

²⁷ Va-hela rèta skwi ndümè, va-pa ta ndohi man to do var; rèta ngiɗè a mpi ndohi tèlèba.

²⁸ Te va skwi man ndohi var ta ngotso, ka cè skwi auda a kin va na Ndo nzi pèc pècèk: Te va 500, staɗ, ko ndohai, ko zlè, ko kɗèh, ko tambak.

²⁹ Te va rèta man a tengaʼa, vo-co auda, a kin va na Eléazar, ndo mvi skwi a Zhiklè, ara skwi man ta co auda a ta va na Ndo nzi pèc pècèk.

³⁰ Te va rèta ngiɗè, man ndohi Israel ta ngotso, ka co auda te va 50, staɗ, ko ndohai, ko zlè, ko kɗèh, ko tambak, skwi kudom tèlèba, a ka pa ta ndohi Lévi man ta ɓer gi Ndo nzi pèc pècèk.

³¹ A Moise a Eléazar, ndo mvi skwi a Zhiklè, ta gau ara man Ndo nzi pèc pècèk a njè na ma a gèɗ a Moise.

³² A skwi man ta dumkodai, njèkèɗia skwi man ndohi var ta ngotso: tambaki 675.000.

³³ Zlèhi 72.000.

³⁴ Kɗèhi 61.000.

³⁵ Ndohai: Dalahi man ta sun baki di ɓai tèlèba 32.000.

³⁶ Te va skwi haha, ndohi man to do var, ta ngotso: Tambaki 337.500.

³⁷ Tambaki 675 te vaʼa ta co auda a ta va na Ndo nzi pèc pècèk.

³⁸ Zlèhi 36.000. 72 te vaʼa ta co auda a ta va na Ndo nzi pèc pècèk.

³⁹ Kdèhi 30.500. 61 te vaʼa ta co auda a ta va na Ndo nzi pèc pècèk.

⁴⁰ Ndohi 16.000. 32 te vaʼa ta co auda a ta va na Ndo nzi pèc pècèk.

⁴¹ A Moise a mpa na skwi man ta co auda a ri a Eléazar, a skwi Zhiklè, ara man Ndo nzi pèc pècèk a gada na Moise.

⁴² Rèta skwai a njèkèdia ndohi Israel ngiɗè, man Moise a mfedahai, a ndohi var ka bai,

⁴³ rèta mpi ndohai: tambaki 337.500.

⁴⁴ Zlèhi 36.000.

⁴⁵ Kdèhi 30.500.

⁴⁶ Ndohai 16.000.

⁴⁷ Te va skwi man a ndohi Israel, Moise a nco auda staɗ te va 50; te va ndohi, te va skwihi ba, a mpa ta ndohi Lévi man ta gu mizlinè a sam gi Ndo nzi pèc pècèk, ara man Ndo nzi pèc pècèk a gada na Moise.

⁴⁸ Tsuvomhi a géɗ ndohi var gozhèm gozhèm, a bihi gozhèm gozhèm, a 100, 100, ta shkè a sam Moise,

⁴⁹ a ta gada na: ɓèlèlihi ngaya ta nger ta ndohi var nga tèlèba, ko staɗ nze na ɓai.

⁵⁰ Gar haha nga hulkoɗi skwi man nga va na Ndo nzi pèc pècèk, staɗ staɗ ara man nga ngotskoɗai: skwi guro, skwi rai, dasirai, skwi daʼai, skwi zlembaɗ, skwi htsan, skwi wi tèlèba, a nga ngècè skwi mpil gèɗ a sam Ndo nzi pèc pècèk.

⁵¹ A Moise a Eléazar, ndo mvi skwi a Zhiklè, ta hul guro a skwi wi tsaɗ tsaɗ te ri tengaʼa.

⁵² A guro tèlèba man tsuvomhi a bihi a géɗ gozhèm, a géɗ 100, ta ckoɗauda a ta va na Zhiklè, ta livèʼa kilo 200.

⁵³ Ndohi var tèlèba ta dumkoɗi skwi a va ta, a va ta.

⁵⁴ A Moise a Eléazar, ndo mvi skwi a Zhiklè, ta co guro te ri tsuvomhi a géɗ gozhèm, a géɗ 100, a ta ckoɗa gi nkezlaʼa, a skwi malwuɗi ndohi Israel a sam Ndo nzi pèc pècèk.