Nombres 3 - Ma Zhiklè

Ndohi Lévi

¹ Na haha ndohi nte verzi Aaron a Moise, a pats man Ndo nzi pèc pècèk a ngaɗa na Moise te za Sinai.

² Nzlembaɗ wudahi Aaron: Nadab, tsuvomaʼa, Abihu, Eléazar a Ithamar.

³ Nasa nzlembaɗ wudahi Aaron, ndohi mvi skwi a Zhiklè man ta bada ta mbar a gèɗ, man ta pa ta skwi a rai a ta gi mizlinè mvi skwi a Zhiklè.

⁴ Aman Nadab a Abihu ta bazl ta a sam di Ndo nzi pèc pècèk, a gèɗ man ta vatsa vogwa man Ndo nzi pèc pècèk, a woya ɓai, te hèshèkèɗ, a der za Sinai. Wudahi ta azɓai. Eléazar a Ithamar ta gu mizlinè mvi skwi a Zhiklè a sam Aaron, bab ta.

⁵ A Ndo nzi pèc pècèk a ngaɗa na Moise:

⁶ Baha ta ndohi te verzi Lévi, a ta zlècè a sam Aaron, ndo mvi skwi a Zhiklè, a ta ga na mizlinè.

⁷ Ta ga na mizlinè nengaʼa a mizlinè mpi ndohi tèlèba a sam gi mɓicè-va, a ta gi mizlinè Zhiklè,

⁸ a ta til kolongwi gi mɓicè-va tèlèba, a ta gi mizlinè ndohi Israel tèlèba te gi nkezlaʼa.

⁹ Ka da pe ta ndohi Lévi a ri a Aaron a wudahi nengaʼa. Tengaʼa te va ndohi Israel, ka pe ta a ri a tengaʼa.

¹⁰ A ka pe ta nda Aaron a wudahi nengaʼa a mizlinè, a ta gi mizlinè mvi skwi a Zhiklè. Aman ndo ngiɗè man ta fa a mizlinè bai, a giaʼa, sèi ta keɗaʼa.

¹¹ Ndo nzi pèc pècèk a ngaɗa na Moise.

¹² Na haha, i parka ta ndohi Lévi auda te va ndohi Israel, te di man a tsuvomhi Israel tèlèba, te di skwi nkaldeka ma hai, a ndohi Lévi ta ndi a ndohi ga.

¹³ Te man tsuvomaʼa staɗ staɗ tèlèba, a ga ga. A pats man i bazl ta tsuvomhi te kokwar Egypte tèlèba, i ge ta tsuvomhi te Israel tèlèba a ndohi nkezlaʼa man a ga ga, a ndo ba a skwi ba, aman a ga. Iyè Ndo nzi pèc pècèk.

¹⁴ A Ndo nzi pèc pècèk a ngaɗa na Moise, tʼhèshèkèɗ Sinai:

¹⁵ Nger ta ndohi Lévi, ara ndohi gi ta, ara gwoli ta, ka nger ta, ahinète kra man ki staɗ di genè, a ndè a ma ma, ngurhi tèlèba.

¹⁶ A Moise a nger ta, ara man Ndo nzi pèc pècèk a ndzhodo, ara man a njè na a gèɗ.

¹⁷ Na haha nzlembaɗ wudahi Lévi: Guershon, Kehath a Merari.

¹⁸ Na haha nzlembaɗ wudahi Guershon, ara ndohi gi ta: Libni a Shimei.

¹⁹ Na haha wudahi Kehath, ara ndohi gi ta: Amram, Jitshar, Hébron a Uziel.

²⁰ A wudahi Merari, ara ndohi gi ta: Machli a Mushi. Nasa ndohi te verzi Lévi, ara ndohi gi ta.

²¹ Te verzi Guershon, ndohi Libni a Shimei ta shkè auda, nasa ndohi Guershon.

²² Nʼngér tengaʼa, ngurhi tèlèba, a hinè te kra man ki staɗ di genè a nde a ma ma, ndohi tèlèba, 7.500.

²³ Ndohi Guershon ta mana a sam gi mɓicè-va, te man a daɓagai, te man a civèɗ nkèl pats.

²⁴ Eliasaph, kra Lael, tsuvom ndohi Guershon.

²⁵ Mizline ndohi Guershon a sam gi mɓicè-va: ta til gai, a maslaka, a géɗ gai, a maslaka a ntamagai,

²⁶ a maslaka gi man a ma, a maslaka a ntamagi man a ma, maslaka man ta pizlè gai a sam mvi skwi a Zhiklè a pa, a teɓaʼa man ta gi mizlinè a vna tèlèba.

²⁷ Te verzi Kehath, ndohi Amram a Jitshar, ndohi Hébron a Uziél ta shkè auda; nasa ndohi Kehath.

²⁸ Nʼngér tengaʼa, ngurhi tèlèba, a hinè te kra man ki staɗ di genè, a ndè a ma ma, 8.600. Tengaʼa ta gu mizlinè a sam nkezlaʼa.

²⁹ Ndohi Kehath ta mana a sam gi mɓicè-va, a daɓagai, te civèɗ te man a dukwad.

³⁰ Eltsaphan, kra Uziel, tsuvom ndohi Kehath.

³¹ Tengaʼa ta gu mizlinè a sam koti ma kita, a sam table, a sam skwi nfi vogwa, a samhi mvi skwi a Zhiklè, a sam kolongwi man ta gu mizlinè a vna a sam nkezlaʼa, a maslaka a sam nkezli nkezlaʼa, a mizlinè nengaʼa tèlèba.

³² Eléasar, kra Aaron, ndo mvi skwi a Zhiklè, ngul ndohi Lévi, bi mizlinè a sam nkezlaʼa tèlèba.

³³ Te verzi Merari, ndohi Machli a Mushi ta shkè auda. Nasa ndohi Merari.

³⁴ Nʼngér tengaʼa, ngurhi tèlèba, a hinè te kra man ki staɗ di genè, a ndè a ma ma, 6.200.

³⁵ Tsuriel, kra Abihail, tsuvom ndohi te verzi Merari. Ta mana a daɓagai te civèɗ te man a géɗèʼa.

³⁶ Ta pe ta ndohi Merari a mizlinè wof, wof gai a skwi nderzlè ntamagai, a sak gai ngurgurèa, a sak gai ntüsltüslèa, a kolongwi, a mizlinè sa tèlèba;

³⁷ a mizlinè sak gai man ta tèu-da gi man a ma a pa, a sak giaʼa, cègwèd a teɓa.

³⁸ A Moise a Aaron a wudahi nengaʼa ta mana a ma gi nkezlaʼa, te civèɗ mveng pats, a ma gi mɓicè-va, a ta gu mizlinè a sam nkezlaʼa, mizlinè ndohi Israel tèlèba. Aman ndo ngiɗè man ta fa a mizlinè ɓai, a ngau, ta keɗaʼa.

³⁹ Nʼngér ndohi Lévi tèlèba, man Moise a Aaron ta nger ta, ara man Ndo nzi pèc pècèk a njè ta a gèɗ, ara ndohi gi ta, ngurhi tèlèba, a hinè te kra man ki staɗ di genè, a ndè a ma ma, 22.000.

Tsuvomhai

⁴⁰ A Ndo nzi pèc pècèk a ngaɗa na Moise: Nger ta tsuvomhai, ngurhi te va ndohi Israel tèlèba, a hinè te kra man ki staɗ di genè, a ndè a ma ma, a ka nguro nzlembaɗ tengaʼa tèlèba.

⁴¹ A ka par ta ndohi Lévi a skwi ga; Iyè Ndo nzi pèc pècèk; te di man a tsuvomhi ndohi Israel tèlèba. A skwi kudom ndohi Lévi ba, te di tsuvom skwi ndohi Israel tèlèba.

⁴² A Moise a nʼnger ta tsuvomhi ndohi Israel tèlèba, ara man Ndo nzi pèc pècèk a njè na a gèɗ.

⁴³ Nʼngér tsuvomhi, ngurhi, nʼngér nzlembaɗ ta a hinè te kra man ki staɗ di genè, a ndè a ma ma, tèlèba 22.273.

⁴⁴ Te deɓaʼa Ndo nzi pèc pècèk a ngaɗa na Moise:

⁴⁵ Hul ndohi Lévi te di man a tsuvomhi ndohi Israel tèlèba. A skwi ndohi Lévi te di man a skwi ta. Ndohi Lévi, ndohi ga. Iyè Ndo nzi pèc pècèk.

⁴⁶ Mba tengaʼa a ndohi Lévi, ta nger ta 273.

⁴⁷ A ka tsakala suli 5.000 a géɗ ndo staɗ staɗ, ara skwi nlivè nkezlaʼa, a skwi mpil gèɗ.

⁴⁸ A ka va na suli a Aaron a wudahi nengaʼa; a skwi mpil gèɗ ndohi man mba tengaʼa a ndohi Lévi.

⁴⁹ A Moise a ntsakala Suli mpil gèɗ a sam ndohi man mba tengaʼa a ndohi Lévi.

⁵⁰ A ntsakala Suli te ri tsuvomhi ndohi Israel: Suli 1.365.000, ara skwi nlivè nkezlaʼa.

⁵¹ Te deɓaʼa Moise a mva na Suli mpil gèɗ a Aaron a wudahi nengaʼa, ara man Ndo nzi pèc pècèk a njè na a gèɗ, ara man Ndo nzi pèc pècèk a fa na ma a gèɗ.