Nombres 28 - Ma Zhiklè

Mvi skwi a Zhiklè

¹ A Ndo nzi pèc pècèk a ngaɗa na Moise:

² Fa ta ma a gèɗ a ndohi Israel, a ka gada ta: Aman kin vay movar, a skwi man kin vayè te vogwa, aman ambahayè, va-gu a pats man i ngreda kinè sa.

³ Ka gaɗa ta a vaʼa: Na haha skwi man kin va na Ndo nzi pèc pècèk te vogwa: wud tambaki cèw, mvi staɗ, nsuɗekɗekaʼa, a pèc pècèk; skwi haha kin ndarayè a pèc pècèk a mèdèp.

⁴ Nshèlèkuraʼa ka vayè a prèk, kra tambak macecèwaʼa a dakwaɗ;

⁵ a gufa dau agoda cèw a movar, mbsoma a géɗ mbar koloba staɗ.

⁶ Nasa skwi man ta ndara na Zhiklè a pats a pats a der za Sinai, skwi man ta va na Ndo nzi pèc pècèk te vogwa, aman ambaha.

⁷ A géɗ kra tambak staɗ, kin va na skwi nsai koloba staɗ. Sèi ta bada barassa a hai a sam Ndo nzi pèc pècèk te gi nkezlaʼa.

⁸ Kra tambak ngiɗè, ka va na Zhiklè a dakwaɗ. Ka viaʼa, a movar a skwi nsi lèmèlèmè ara prèk. Nasa skwi man ka va na Ndo nzi pèc pècèk te vogwa, aman ambaha.

⁹ A pats nshèk va, wud tambakihi cèw, mvi staɗ, nsuɗekɗekaʼa, a gufa dau agoda cèw, mbsoma a mbar, a movar a skwi nsi a vaʼa.

¹⁰ Nasa skwi man ka ndara na Zhiklè a pats nshèk va pèc pècèk, a va skwi man ka ndara na, a va skwi nsi man ka va na, a pats a pats pèc pècèk.

¹¹ A mvèng kia, a pats nshèlèkuraʼa, va-ndara na skwi a Ndo nzi pèc pècèk: matsaraɗ zlèhi cèw, drok staɗ, wud tambaki 7, mvi staɗ, nsuɗekɗekaʼa.

¹² A gufa dau agoda 6, mbsomaʼa a mbar, a géɗ drok a movar.

¹³ A gufa agoda cèw, mbsoma a mbar, a géɗ kra tambak staɗ staɗ tèlèba, a movar, aman ambaha Ndo nzi pèc pècèk.

¹⁴ Skwi nsi a géɗ tengaʼa, koloba cèw, a géɗ zlè, koloba a rètaʼa a géɗ drok, koloba staɗ a géɗ kra tambak. Nasa man kin ndara na a kia kia tèlèba tʼhwaɗ mvai, a skwi man kin va na Zhiklè te vogwa, aman ambaha.

¹⁵ A kin va na mazawal a vaʼa staɗ a géɗ malai, a va skwi man ta ndara na, a skwi nsi man ta va na pèc pècèk.

¹⁶ A ki nshèlèkuraʼa, mʼmèn 14, ngolala Pâque a sam Ndo nzi pèc pècèk.

¹⁷ Mʼmèn 15 te ki sa, ngolala. Mʼmèn tsaraɗ, ta ndi movar man skwi nshégèrè a te dia bai.

¹⁸ A pats nshèlèkuraʼa, mɓicè-va a sam ngolala nkezlaʼa. Kin gu mizlinè a pats sa bi fèt!

¹⁹ A kin va na skwi a Ndo nzi pèc pècèk, ara skwi man kin ndara na: zlèhi cèw, matsaraɗ marai, drok staɗ, wud tambaki 7, mvi staɗ, nsuɗekɗekaʼa.

²⁰ A movar a vaʼa, gufa dau mbsoma a mbar, gufa agoda 6, 6, a géɗ mari staɗ staɗ tèlèba, agoda 4 a géɗ drok.

²¹ Agoda 2 a géɗ wud tambaki 7 staɗ staɗ tèlèba.

²² A vaʼa mazawal staɗ agédmalai, askwi mpil gèɗkinè.

²³ Skwi haha tèlèba sèi kin viaʼa, a va skwi man kin ndara na a prèk, pèc pècèk.

²⁴ Skwi man kin va na Zhiklè ar haha, kin va na a pèc pècèk, mʼmèn tsaraɗ, a skwi man kin va na Ndo nzi pèc pècèk te vogwa, aman ambaha, Ta va na a va skwi man ta ndara na, a skwi nsi man ta va na, a pats a pats.

²⁵ A pats matsaraɗaʼa, kin ɓicè va a sam ngolala nkezlaʼa. A pats nasa kin gu mizlinè bai!

²⁶ A pats mɓicè skwi nshèlèkuraʼa, aman kin va na movar a dau mɓuaʼa a Ndo nzi pèc pècèk: aman luma klèng, va-ɓica va a sam ngolala nkezlaʼa, kin gu mizlinè bai!

²⁷ A kin ndara na skwi a Ndo nzi pèc pècèk, aman ambaha: zlèhi cèw, matsaraɗ marai, drok staɗ, wud tambaki mvi staɗ.

²⁸ Movar a va tengaʼa, gufa dau, mbsoma a mbar, agoda 6 a géɗ mari staɗ, agoda faɗ a géɗ drok,

²⁹ agoda 2 a géɗ kra tambak staɗ staɗ 7 tèlèba.

³⁰ Mazawal staɗ a vaʼa a géɗ skwi mpil gèɗ kinè.

³¹ Kin va na a vaʼa, a va skwi man kin ndara na, a movar man kin va na, a skwi nsi man kin va na Zhiklè.