Nombres 27 - Ma Zhiklè

A man dalahi ta ndi gai

¹ Te deɓaʼa dalahi Tselophchad, kra Hépher, te verzi Galaad, kra Makir, te verzi Manassé, te va gwoli Manassé, kra Joseph, ta shkè. Nzlembaɗ dalahai: Machla, Noa, Hogla, Milca a Thirtsa.

² Ta shkè a sam Moise a Eléazar, ndo mvi skwi a Zhiklè, a sam tsuvomhi mpi ndohi tèlèba, a ma gi nkezlaʼa, a ta gada:

³ Bab nga a mʼmets na tʼhèshèkèɗ. Nengaʼa a te va ndohi Koré man ta humda na va a gèɗ a Ndo nzi pèc pècèk bai. A mʼmets na a géɗ mali na. Kra na nguraʼa azbai.

⁴ Nzlembaɗ bab nga a zi na èhèmè, aman a nya kra nguraʼa bai? Va-va nga skwi nʼndi gai a nda kramam babhi nga!

⁵ Moise a ncko ma tengaʼa a sam Ndo nzi pèc pècèk.

⁶ A Ndo nzi pèc pècèk a ngaɗa na Moise:

⁷ Dalahi Tselophchad, ta goɗ amba. Sèi ka va ta skwi nʼndi gai te ndev kramam babhi ta. Ta ngècè skwi nʼndi gi bab ta.

⁸ A ka gada ta ndohi Israel ar haha:

⁹ Aman ndo ngiɗè a mʼmets na, kra na nguraʼa azbai, kin va na skwi nʼndi gi nengaʼa a dem nengaʼa. Aman dem na azbai, kin va ta skwi nʼndi gi nengaʼa a kramamhi nengaʼa.

¹⁰ Aman kramamhi nengaʼa azbai, kin va na skwi nʼndi gi nengaʼa a kramam babhi na.

¹¹ Aman kramam babhi na azbai, va-va ta skwi nʼndi gi na a gwoli na, te verzi ta, a nengaʼa da co. Nasa ma kita ndohi Israel, ara man Ndo nzi pèc pècèk a njè na a gèɗ a Moise.

Moise a feda Josué a mizline na

¹² Te debaʼa Ndo nzi pèc pècèk a ngaɗa na Moise: Do a géɗ za Abarim haha, war kokwar man i va ta ndohi Israel!

¹³ Aman ka rka ma, ka da metsi ngaya a va babhi ngaya. Ka ba, lèmèlèmè ara Aaron, kramam ngaya.

¹⁴ A géɗ man kin gu mèdègèɗ, a kin fu gèɗ a ma ga bai tʼhèshèkèd Tsin, man mpi ndohai ta gu ndzoan, aman i woy a kin nzalyè a sam di ta, a iyam a hakaɗauda. Nasa iyam Meriba, te Kades, tʼhèshèkèɗ Tsin.

¹⁵ Te debaʼa Moise a ngaɗa na Ndo nzi pèc pècèk:

¹⁶ Ndo nzi pèc pècèk, Zhiklè, Bab nshèf-fè skwi tèlèba, da vau ndo ncè ta ma mpi ndohai,

¹⁷ man a feda ta ma, a hel ta a deba a ngwi ta, man bai mpi ndohi Ndo nzi pèc pècèk nara skwi man ndo mɓer ta azɓai.

¹⁸ A Ndo nzi pècè pècèk a ngaɗa na Moise: Co Josué, kra Nun, ndo man Mèzhèɓ Zhiklè te ndav na, a ka fa na ri a gèɗ.

¹⁹ Te debaʼa ka Zlatseda a sam Eléazar, ndo mvi skwi a Zhiklè, a sam mpi ndohai. Njè na ma ngaya a gèɗ, a sam di tengaʼa tèlèba.

²⁰ Ka ngela na nʼnjèl ngaya, aman mpi ndohi Israel ta da fi gèɗ a ma nengaʼa!

²¹ Nengaʼa da zlatsa a sam Eléazar, a nengaʼa da bazla kita Urim a géɗ nengaʼa, a sam Ndo nzi pèc pècèk. A géɗ ma nengaʼa ta dè auda te kokwar, a géɗ ma nengaʼa ta shkè a deɓa a ngwi ta; nengaʼa, a ndohi Israel tèlèba a nda nengaʼa, mpi ndohi tèlèba.

²² A Moise a ngau ara man Ndo nzi pèc pècèk a njè na ma a gèɗ. A nco Josué, a nzlatseda a sam Eléazar, ndo mvi skwi a Zhiklè, a sam mpi ndohi tèlèba.

²³ A Eléazar a mfa na ri a gèɗ, a njè na ma nengaʼa, ara man Ndo nzi pèc pècèk a goɗ te ma Moise.