Nombres 26 - Ma Zhiklè

Nʼnger ndohi Israel

¹ Aman matakwan haha klèng ma, Ndo nzi pèc pècèk a ngaɗa na Moise a Eléazar, kra Aaron, ndo mvi skwi a Zhiklè:

² Va-nger ta mpi ndohi Israel tèlèba, a hinè te mvi 20 a ndè a ma ma, ara ndohi gi ta, ara ndohi gi ta, ta tèlèba man ta slaha ta gi var te Israel!

³ A Moise a Eléazar, ndo mvi skwi a Zhiklè, ta nger ta a dal Moab, a ma woyam Jourdain, zuraʼa a Jéricho,

⁴ a hinè te mvi 20 a ndè a ma ma, ara man Ndo nzi pèc pècèk a njè na ma a gèɗ a Moise. Ndohi Israel man ta shkè auda te kokwar Egypte, ta a haha:

⁵ Ruben, tsuvom Israel. Wudahi Ruben: Hénoc a ndohi te verzi nengaʼa. Pallu, a ndohi te verzi nengaʼa.

⁶ Hetsron, a ndohi te verzi nengaʼa. Carmi, a ndohi te verzi nengaʼa.

⁷ Nasa gwoli Ruben; ndohi man ta nger ta, 43.730.

⁸ Kra Pallu: Eliab.

⁹ Wudahi Eliab: Nemuel, Dathan a Abiram. Nasa Dathan a Abiram man mpi ndohai ta baha ta, man ta ga ta ma a va Moise a Aaron, a verzi ndohi Koré, man ta ga na ma a va Ndo nzi pèc pècèk.

¹⁰ A herkeda a mwinè ma na, a ngerɗ ta ma, a nda Koré, a ndohi ta bazl ta, vogwa a nʼnde ta ndohi 258 a ma, a ngu a skwi malwudai.

¹¹ Wudahi Koré ta bazl ta bai.

¹² Wudahi Simèon, ara ndohi gi ta, ara ndohi gi ta: Nemuel a ndohi te verzi nengaʼa. Jamin, a ndohi te verzi nengaʼa. Jakin, a ndohi te verzi nengaʼa.

¹³ Zérach, a ndohi te verzi nengaʼa. Saul, a ndohi te verzi nengaʼa.

¹⁴ Nasa gwoli Simèon: 22.200.

¹⁵ Wudahi Gad, ara ndohi gi ta, ara ndohi gi ta: Tsephon, a ndohi te verzi nengaʼa. Haggi, a ndohi te verzi nengaʼa. Shuni, a ndohi te verzi nengaʼa.

¹⁶ Ozni, a ndohi te verzi nengaʼa. Eri a ndohi te verzi nengaʼa.

¹⁷ Arod, a ndohi te verzi nengaʼa. Areli, a ndohi te verzi nengaʼa.

¹⁸ Nasa gwoli Gad; ndohi man ta nger ta, 40.500.

¹⁹ Wudahi Juda: Er a Onan. Aman ta bazl ta te kokwar Canaan.

²⁰ Na haha wudahi Juda, ara ndohi gi ta, ara ndohi gi ta: Shéla, a ndohi te verzi nengaʼa. Pé-rets, a ndohi te verzi nengaʼa. Zérach, a ndohi te verzi nengaʼa.

²¹ Wudahi Perets: Hetsron a ndohi te verzi nengaʼa. Hamul a ndohi te verzi nengaʼa.

²² Nasa gwoli Juda; ndohi man ta nger ta, 76.500.

²³ Wudahi Issacar, ara ndohi gi ta, ara ndohi gi ta: Thola a ndohi te verzi nengaʼa. Puva, a ndohi te verzi nengaʼa.

²⁴ Jachub, a ndohi te verzi nengaʼa. Shimron, a ndohi te verzi nengaʼa.

²⁵ Nasa gwoli Issacar; ndohi man ta nger ta, 64.300.

²⁶ Wudahi Zabulon, ara ndohi gi ta, ara ndohi gi ta. Séred, a ndohi te verzi nengaʼa. Elon, a ndohi te verzi nengaʼa. Jaheel, a ndohi te verzi nengaʼa.

²⁷ Nasa gwoli Zabulon; ndohi man ta nger ta, 60.500.

²⁸ Wudahi Joseph; ara ndohi gi ta, ara ndohi gi ta: Manassé a Ephraim.

²⁹ Wudahi Manasse: Makir a ndohi te verzi nengaʼa. Makir a myau Galaad. Galaad a ndohi te verzi nengaʼa.

³⁰ Na haha wudahi Galaad: Jézer a ndohi te verzi nengaʼa. Hélek, a ndohi te verzi nengaʼa.

³¹ Asriel, a ndohi te verzi nengaʼa. Sichem, a ndohi te verzi nengaʼa.

³² Shemida, a ndohi te verzi nengaʼa.

³³ Hépher a ndohi te verzi nengaʼa. Tselophad, kra Hépher, kra na azbai, a yia dalahi gene. Nzlembaɗ dalahi Tselophchad: Machla, Noa, Hogla, Milca a Thirtsa.

³⁴ Nasa gwoli Manassé; ndohi man ta nger ta, 52.700.

³⁵ Na haha wudahi Ephraim, ara ndohi gi ta, ara ndohi gi ta: Shutélach a ndohi te verzi nengaʼa. Béker, a ndohi te verzi nengaʼa. Thachan, a ndohi te verzi nengaʼa.

³⁶ Na haha wudahi Shutélach: Eran a ndohi te verzi nengaʼa.

³⁷ Nasa gwoli Ephraim; ndohi man ta nger ta, 32.500. Na haha wudahi Joseph, ara ndohi gi ta, ara ndohi gi ta.

³⁸ Wudahi Benjamin, ara ndohi gi ta, ara ndohi gi ta: Béla a ndohi te verzi nengaʼa. Ashbel, a ndohi te verzi nengaʼa. Achiram, a ndohi te verzi nengaʼa.

³⁹ Shupham, a ndohi te verzi nengaʼa. Hupham, a ndohi te verzi nengaʼa.

⁴⁰ Wudahi Béla: Ard a Naaman. Ard a ndohi te verzi nengaʼa. Naaman a ndohi te verzi nengaʼa.

⁴¹ Nasa gwoli Benjamin; ara ndohi gi ta, ara man ta nger ta, 45.600.

⁴² Na haha wudahi Dan, ara ndohi gi ta, ara ndohi gi ta. Shucham, a ndohi te verzi nengaʼa. Nasa gwoli Dan, ara ndohi gi ta.

⁴³ Gwoli ndohi Shucham tèlèba man ta nger ta, 64.400.

⁴⁴ Wudahi Aser, ara ndohi gi ta, ara ndohi gi ta. Jimna a ndohi te verzi nengaʼa. Jishvi, a ndohi te verzi nengaʼa. Beria, a ndohi te verzi nengaʼa.

⁴⁵ Wudahi Beria: Héber, a ndohi te verzi nengaʼa. Malkiel, a ndohi te verzi nengaʼa.

⁴⁶ Nzlembaɗ dem Aser, Sérach.

⁴⁷ Nasa gwoli Aser; ndohi man ta nger ta, 53.400.

⁴⁸ Wudahi Nephthali, ara ndohi gi ta, ara ndohi gi ta. Jahtseel, a ndohi te verzi nengaʼa. Guni, a ndohi te verzi nengaʼa. Jetser, a ndohi te verzi nengaʼa.

⁴⁹ Shillem, a ndohi te verzi nengaʼa.

⁵⁰ Nasa gwoli Nephthali, ara ndohi gi ta, man ta nger ta, 45.400.

⁵¹ Ndohi Israel tèlèba man ta nger ta, 601.730.

Jimèr a géɗ kokwar

⁵² Ndo nzi pèc pècèk a ngaɗa na Moise:

⁵³ Va-kezla ta kokwar a skwi nʼndi gai, ara nʼngér nzlembaɗ ta.

⁵⁴ Ndo man verzi na a vata, skwi nʼndi gi a vata: a ndo man verzi na az a vata bai, skwi nʼndi gi az a vata bai. Staɗ staɗ da ngots skwi nʼndi gai, ara ndohi man ta nger ta.

⁵⁵ Da kezlau a jimèr. Ta ndi gai ara nzlembaɗ ta, te verzi bab ta.

⁵⁶ Ndo man verzi na a vata, a ndo man verzi na az a vata bai, ta kezla ta ara man jimèr a kala a géɗèʼa.

Ndohi te verzi Lévi

⁵⁷ Na haha ndohi man ta nger ta te va ndohi Lévi, ara ndohi gi ta, ara ndohi gi ta: Guershon, a ndohi te verzi nengaʼa. Kehath, a ndohi te verzi nengaʼa. Merari, a ndohi te verzi nengaʼa.

⁵⁸ Nasa gwoli Lévi: Ndohi te verzi Libni, te verzi Hébron, te verzi Machli, te verzi Mushi, te verzi Koré. Kehath a myau Amram.

⁵⁹ Nzlembaɗ ngwoz Amram, Jokébed, dem Lévi, man Lévi a myau te Egypte. Wudahi man a ya na Amram: Moise a Aaron a Miriam, demam ta.

⁶⁰ Wudahi Aaron: Nadab, Abihu, Eléazar, a Ithamar.

⁶¹ Aman Nadab a Abihu ta bazl ta, a géɗ man ta vatsa na vogwa a Zhiklè, man mizlinè tengaʼa ka bai.

⁶² Tengaʼa man ta nger ta, ngurhi ngurhi tèlèba, a hinè te kra man ki staɗ di genè, a ndè a ma ma, 23.000. Ta nger ta a va ndohi Israel ngiɗè bai, te man ta ngatsa skwi nʼndi gai a nda ndohi Israel bai.

⁶³ Nasa tengaʼa man Moise a Aaron, ndo mvi skwi a Zhiklè, ta nger ta te va ndohi Israel, a dal Moab, a ma woyam Jourdain, zuraʼa a Jéricho.

⁶⁴ Ndohi man ta nger ta a haha, ndohi nya deɓa tèlè; te va ndohi man Moise a Aaron, ndo mvi skwi a Zhiklè ta nger ta tʼhèshèkèɗ, a der za Sinai, ko staɗ a te va ɓai.

⁶⁵ Te man Ndo nzi pèc pècèk a goɗ a géɗ tengaʼa: Sèi ta bazl ta tʼhèshèkèɗ! Ko staɗ te va tengaʼa njèka ɓai; sèi Caleb, kra Jephunné, a Josué, kra Nun.