Nombres 24 - Ma Zhiklè

¹ Balaam a nrka, ambaha Ndo nzi pèc pècèk, aman a pshè ta ma ndohi Israel, a ngau ara mpèc pècèk man a jhèɗèʼa a sam Zhiklè bai, aman a ngwoda na ma a hèshèkèɗ.

² A Balaam a nʼngul dai, a nrka ta ndohi Israel, ta nza te pa, ta ngela va, ara verzi ta, ara verzi ta, a mèzhèɓ Bi Zhiklè a zhè a géɗ nengaʼa.

³ A nhüno ngèɗè, a ngaɗa: Balaam, kra Beor, a goɗ ar haha: Ndo man di na mwinèa, a goɗ ar haha;

⁴ ndo man a tsena ma Zhiklè, a goɗ ar haha; ndo man a rka skwi man Zhiklè, Bi-wuɗai, a ngra na, man a kalahi a deɓ sak nengaʼa, a di nengaʼa a win na.

⁵ Jacob, gi ngaya, Israel, sam nʼnzi ngaya, mbikaɓai.

⁶ A dè dra ara woyam. Nara gi lak a ma woyam. Nara wof ɗawai man Zhiklè a ngeda pa. Nara lakalak a ma iyam.

⁷ Iyam a hakaɗauda te duzlak nengaʼa. Tser skwai a nʼngots iyam kumba, bi nengaʼa a fena Gog, kokwar-bi nengaʼa nʼnzala a vata.

⁸ Aman Zhiklè a nckoɗauda te kokwar Egypte, wuɗi nengaʼa ara wuɗi kevar. A nʼnde ta ndohi herkeda, mayamhi nengaʼa, a ma, a nkerda vatasl tengaʼa, a ntsede ta ndohi nʼnga na matakwan, a hai.

⁹ Te deɓaʼa a mènèhi ara marizhèlè, ara mam marizhèlè. Nda slambaɗda wa? Ndo man a pshè ka ma, sèi ta pshè na ma; ndo man a phomde ka, sèi da phomda!

¹⁰ A Balak a ngu ndav kumba a géɗ Balaam, a ntsa na ri a dai, a Balak a ngaɗa na Balaam: I baha ka, aman ka phomde ta mayamhi ga, anai ka pshè ta ma sak makar!

¹¹ Anai hu a deɓa a ngwai! I hur i da nzal ka, antanta Ndo nzi pèc pècèk a woya a mva ka nʼnjèlè bai.

¹² Aman Balaam a ngaɗa na Balak: Ko a ndohi man ka zlindeka ta a sam ga, i gada ta bi dè:

¹³ Ko man Balak a vay skwi te gi nengaʼa, gurso a guro tèlèba, i slaha a i tawaɗaha ma nkwèr Ndo nzi pèc pècèk azbai, i gi skwi a ri ga azbai, ko skwi man amba, ko skwi man ambaɓai. I gèɗè ara man Ndo nzi pèc pècèk a gadayè.

¹⁴ Anai i dè a deɓa a sam ndohi ga. A i woy a i ngra ka skwi man ndohi haha ta da ga ta ndohi ngaya a pats ngiɗè.

¹⁵ Te debaʼa a hüno ngèɗè nengaʼa, a ngaɗa: Balaam, kra Beor, a goɗ ar haha; ndo man di nengaʼa mwinea, a goɗ ar haha;

¹⁶ ndo man a tsena ma Zhiklè, a goɗ ar haha; ndo man a sun skwi man Zhiklè te géɗèʼa a hérèʼa; ndo man a rka skwi man Zhiklè Bi-wuɗai a ngra na; man a kalahi a deɓ sak nengaʼa, a di nengaʼa a win na.

¹⁷ I rkaʼa, aman antanta di ka bai – i wèrèʼa, aman ndul ndul di ka bai – bantai a vangkaɗauda te verzi Jacob. Gaɗa bi a shkè auda te Israel, a mbatsama ta gèɗ a ndohi Moab, a vatasl gèɗ ndohi Seth tèlèba.

¹⁸ Ta da dum Edom, mayamhi nengaʼa. Ta da ceda Seir a ma, a Israel a ngècè wuɗai.

¹⁹ Bai a shkè auda te Jacob, man a da zede ta ndohi man ta hu ta te kokwar.

²⁰ Te deɓaʼa a nrka Amalek. A nhüno ngèɗè nengaʼa, a ngaɗa: Ndohi Amalek, tsuvomhi ndohi herkeda; aman ndikè-ma tengaʼa ngédèshè.

²¹ Te deɓaʼa a nrka ta ndohi Ken. A hüno ngèɗè nengaʼa, a ngaɗa: Sam nʼnzi ngaya gedeng-gedengaʼa, gi ngaya ngaʼa a géɗ pra.

²² Aman a pats man Assur a da hel ta a ɓèlè, ta ksarda ndo Ken aussa.

²³ A nhüno ngèɗè nengaʼa, a ngaɗa: Wobau! Aman Zhiklè a da gi skwi ar haha, nda nzi a nshèffè wa?

²⁴ Wuromhi ta shke te Kittim, ta manda na gèɗ a hai a Assur, ta manda na gèɗ a hai a Hébreu. Ko nengaʼa ba a da gédèsh na.

²⁵ A Balaam a nslambaɗa, a ndo na ngwai. A Balak a ndo na a civèɗ na.