Nombres 22 - Ma Zhiklè

Balaam

¹ A ndohi Israel to do a ma, a ta nza a dal Moab, te wud woyam Jourdain, zuraʼa a ma Jéricho.

² Balak, kra Tsippor, a rka skwi tèlèba man Israel a nʼnga ta ndohi Amor.

³ A zlau a ndza ta ndohi Moab, a géɗ man ndohi kumba. A Moab a ngu zlau ndohi Israel.

⁴ A ngaɗa ta ndohi nhalaʼa te Madian: Ndohi rèdèdèa haha ta da nde nga a ma toh tèlèba, a da gi ara zlè man a ndeda kuza a ma. Te ndev nasa, Balak, kra Tsippor, bi Moab.

⁵ A nengaʼa a nzlinde ta ndohi sak a sam Balaam, kra Beor, a kokwar Pethor, a wud woyam, a kokwar gwoli na, da bahka na, da gaɗka na: Na haha, ndohi ngiɗè ta shkè auda te kokwar Egypte, ta zeda géɗ herkeda tèlèba, ta nza a ma ga.

⁶ Anai washkè, i tsa ka rai, phomde ta ndohi haha! Ta fena wuɗi ga. Wa ngiɗè ba i da slaha a i bazl ta, a i dzam ta auda te kokwar. I suna, ndo man ka pshè na ma, a nʼngots mpshè ma. Ndo man ka phomda, mphomda.

⁷ A ndohi nhalaʼa te Moab, a ndohi nhalaʼa te Madian, to do, a skwi mbali te rai, a ta ndika a sam Balaam, a ta menda na ma Balak.

⁸ A nenga a ngaɗa ta: Va-mana haha, a i da menda kinè skwi man Ndo nzi pèc pècèk a da ngrayè. A ndohi Moab nhalaʼa ta mana a sam Balaam.

⁹ A Bi Zhiklè a mshkè, a ngaɗa na Balaam: Ndohi man a sam ngaya haha, wa?

¹⁰ Balaam a ngaɗa na Bi Zhiklè: Balak, kra Tsippor, bi Moab, a nzlindeka ta, aman ta gaɗayè:

¹¹ Na haha, ndohi man ta shkè auda te kokwar Egypte, ta zeda géɗ herkeɗa tèlèba, Anai washkè, phomde ta! Wa ngiɗè ba i da slaha a i bazl ta, a i dzam ta.

¹² Aman Bi Zhiklè a ngaɗa na Balaam: Ko do a verzi ta bai, ka phomde ta ndohi bai, te man ta ngots mpshè ma.

¹³ Balaam a nslambaɗa a prèk te gai, a ngaɗa ta ndohi man Balak a nzlinde ta: Vo-do a deɓa a kokwar kinè! Ndo nzi pèc pècèk a woya man a i dè a verzi kinè bai.

¹⁴ A ndohi Moab ta slambaɗa, a ta shkè a deɓa a sam Balak, a ta gada na: Balaam a woya a shkè a verzi nga bai.

¹⁵ A Balak a nzlinde ta ndohi ngiɗè, mbibihiaʼa mba tengaʼa a nshèlèk urhiaʼa sa.

¹⁶ A ta shkè a sam Balaam, a ta gada na: Balak, kra Tsippor, a goɗ ar haha: Skwi ngiɗè da gs ka a hi bai, i tsa ka rai, sèi ka shkè a sam ga,

¹⁷ i woy a i nzal ka a vata, a i da gi skwi tèlèba man ka gadayè: washkè, phomde ta ndohi haha!

¹⁸ A Balaam a mʼmbeɗa ta a ma ndohi sak Balak: Ko Balak a vay skwi nte gi na, gurso a guro tèlèba, i slaha a i tawaɗaha ma nkwèr Ndo nzi pèc pècèk ga, azbai, ko te skwi nkèshèa, ko te skwi mbiaʼa.

¹⁹ Aman va-mana haha genè, a i jhèɗè a sam Ndo nzi pèc pècèk, ma man a woya a ngaɗayè.

²⁰ A Bi Zhiklè a nshkè, a ngaɗa na Balaam, a vaɗ: Aman ndohi ta da shkè aman ta baha ka, slambaɗa, do a verzi tengaʼa; aman ka da gi sèi skwi man i da gada ka.

²¹ Angoslèm a prèk te gai, Balaam a nslambaɗa, a mpeda skwi a deɓ kɗèh, a mdo a verzi ndohi Moab.

²² Aman a mdo, Zhiklè a ngu ndav worworaʼa, a gol Ndo nzi pèc pècèk a nzlatska na ma a civèɗ, man a dè a deɓ kɗèh, a ɓèlhi cèw a verziaʼa.

²³ A kɗèh a nrka gol Ndo nzi pèc pècèk man a nzlatska ta ma a civèɗ, a gidè tsakwal te rai. A kɗèh a njèkeda civèɗ, a dè na zlawa. A Balaam a ntsu kɗèh, a woya a nʼngalda na ma a civèɗ.

²⁴ Aman gol Ndo nzi pèc pècèk a nzlatsa a zlerɗi gi lak, a zlazlar te tsagi cèw.

²⁵ A kɗèh a mrka gol Ndo nzi pèc pècèk, a nʼngalda verzi na a va zlazlar, a ndeɗatsama na sak a Balaam, a Balaam a hüno a ntsu zaʼa.

²⁶ A gol Ndo nzi pèc pècèk a nherda va na a ma zaʼa, a nzlatsa a zlerɗi man a ma zaʼa, sam nʼngèldè va ngiɗè, ko civèɗ ri mandai, ko civèɗ ri gula asaɓai.

²⁷ A kɗèh a mrka gol Ndo nzi pèc pècèk, a ngurɓahai, a Balaam a deɓa. A Balaam a ngu ndav holholaʼa, a ntsu kɗèh a gada.

²⁸ Te deɓaʼa Ndo nzi pèc pècèk a mwinè ma a kɗèh, a ngaɗa na Balaam: I ga ka mè? Sak makar ka tsyè ma!

²⁹ A Balaam a ngaɗa na kɗèh: A géɗ man ka mbèhwali a iyè. Aman agassa gwèsh te ri ga, ar i zlama ka daʼai, a nasa nasa.

³⁰ A kɗèh a ngaɗa na Balaam: I kɗèh ngaya man ka dè a deɓ ga pèc pècèk, ha patsna ka bi dè? I gu arsa pats ngiɗè dè? A nengaʼa a ngaɗa: Aʼai!

³¹ Te debaʼa Ndo nzi pèc pècèk a nzlatsa a civèɗ, a gidè tsakwal te rai. A nengaʼa a ngurɓahai, a nkalahi a deɓ sak nengaʼa.

³² A gol Ndo nzi pèc pècèk a ngaɗa na: Ka tsu kɗèh ngaya sak makarèhèmè? I shkè aman i zlatska ka ma, a géɗ man ka slambaɗkaɗi tsam-tsam, ara man i woya ka bai.

³³ Aman kɗèh a rkayè, a bezla va na auda a sam ga sak makar. Aman agassa a mbezla va na auda a sam ga ɓai, ar i keɗe ka, a i jèka na nshèffè a kɗèh.

³⁴ Balaam a ngaɗa na gol Ndo nzi pèc pècèk: I gu malai. I sun a i gada ka zlatsa a ma ga a civèɗ ɓai. Aman antanta, man skwi haha ambaha ka ɓai, i dè a deɓa a ngwai.

³⁵ Aman gol Ndo nzi pèc pècèk a ngaɗa na Balaam: Do a verzi ndohai! Aman ka da gèɗè sèi skwi man i da gada ka. Balaam a mdo a verzi ndohi Balak.

³⁶ Balak a ntsenaha, Balaam a shkè, a ndo aman a ta zli gèɗ te Ar-Moab, a ma woyam Arnon, kuma ta.

³⁷ A Balak a ngaɗa na Balaam: I bahka ka bi dè? Ka shkè a sam ga bi èhèmè? Ka hur i slaha a i pela ka skwi ntul ngaya bi dè?

³⁸ A Balaam a ngaɗa na Balak: Anai i shkè ma. I slaha a i gèɗè ma mè? Sèi i gèdèʼa, ara man Bi Zhiklè agadayè.

³⁹ Te deɓaʼa Balaam a Balak to do, a ta shkè a Kirjath-Hutsoth.

⁴⁰ A Balak a nzloho zlèhi a tambakihi, a ntsaka ta a Balaam a ndohi man ta zhè a sam na.

⁴¹ A prèk, Balak a nco Balaam, a ndaʼa a géɗèʼa, a Bamoth-Baal. Te pa Balaam a nrka rèta ndohi Israel.